សម្ដេចតេជោ ប្រកាសផ្ដល់ក្នុង១ខែ៥០ម៉ឺនរៀល ជូនលោកយាយលក់សណ្ដែកដីស្ងោរ នៅភ្នំពេញពេលព្រឹក ត្រឡប់ទៅខេត្តតាកែវវិញពេលល្ងាច រាល់ថ្ងៃ
រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា នាយប់ថ្ងៃទី២ ខែមករា ឆ្នាំ២០២៤នេះ បានប្រកាសឧបត្ថម្ភថវិកា ក្នុង១ខែ ៥០ម៉ឺនរៀល ជូនដល់លោកយាយម្នាក់ អាយុ៨៧ឆ្នាំ ក្នុងដែលបានមកលក់សណ្ដែកដីស្ងោ ដល់រាជធានីភ្នំពេញ ហើយត្រឡប់ទៅខេត្តតាកែវ វិញជារៀងរាល់ថ្ងៃ ។
តាមរយៈបណ្ដាញសង្គមរបស់សម្ដេចតេជោ បានបញ្ជាក់ថា ៖ «ថ្ងៃនេះ តាមរយៈលោកសេង ទៀង ខ្ញុំឲ្យរកលោកយាយលក់សណ្តែកដីស្ងោរ ដែលមានព្រះជន្ម ៨៧ឆ្នាំ។ គាត់ចេញពីខេត្តតាកែវ មកលក់នៅភ្នំពេញ មកព្រឹក ត្រឡប់ទៅវិញពេលល្ងាច ។ ខ្ញុំសំណូមពរឲ្យគាត់ឈប់លក់សណ្តែកដី ដែលធ្វើដំណើរផ្លូវឆ្ងាយ ដោយជំនួសវិញ នូវការផ្តល់ថវិការបស់ខ្ញុំ ៥០ម៉ឺនរៀលក្នុងមួយខែ។ ទឹកប្រាក់នេះ មានចំនួនច្រើន ជាងប្រាក់ ដែលគាត់លក់បាន ៥ពាន់ ទៅ១ម៉ឺនរៀល ក្នុងមួយថ្ងៃ។ ថ្ងៃនេះ ក៏បានផ្តល់ថវិកាជូនលោកយាយ ២លានរៀលផងដែរ» ៕
