គ្មានការដកតំណែងសម្តេច ស ខេង និង សម្តេច សាយ ឈុំនោះ ទេ គឺ ក្រុមប្រឆាំងបំភ្លៃព័ត៌មាន ដែល ឆាំ ឆានី ជាមេខ្លោង
ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានចាត់ទុកថា ការបំផុសបំផុលរបស់ក្រុមប្រឆាំងតាមរយៈបណ្តាញសង្គមហ្វេសប៊ុក ដែលមាន ឆាំ ឆានី ជាមេខ្លោង ដែលថា គណបក្សប្រជាជននឹងដកតំណែងសម្តេច ស ខេង និង សម្តេច សាយ ឈុំនោះ គឺជារឿងភូតកុហកសុទ្ធសាធ។ ជាមួយគ្នានេះសម្តេចបានអះអាងថា ដោយសារតែក្រុមប្រឆាំង ពូកែភូតភរ បំភ្លៃនេះហើយ ទើបធ្វើឱ្យបក្សរបស់ខ្លួនរលាយ។
សម្តេច ហ៊ុន សែន បានហៅ ឆាំ ឆានី ថាជា ក្មេងពាល ដែលផ្សាយព័ត៌មានសម្ងាត់នៃកលល្បិចរបស់លោក។
ការលើកឡើងរបស់ សម្តេចតេជោ ហ៊ុន សែន បានធ្វើឡើងខណៈដែលសម្តេច បន្តអញ្ជើញជួបសំណេះសំណាលជាមួយកម្មករ ក្នុងស្រុកសំរោងទង ខេត្តកំពង់ស្ពឺ នាព្រឹកថ្ងៃទី១២ ខែធ្នូ ឆ្នាំ២០១៨នេះ។
ប្រតិកម្មរបស់សម្តេចតេជោ បានធ្វើឡើងបន្ទាប់ពីក្រុមប្រឆាំង ជាពិសេសសកម្មជនប្រឆាំង ឆាំ ឆានី បានផ្សព្វផ្សាយបំភ្លៃថា គណបក្សប្រជាជនកម្ពុជា នឹងធ្វើសមាជរបស់ខ្លួននៅពេលខាងមុខនេះ ហើយសម្តេចតេជោហ៊ុន សែន នឹងដកដំណែងពីសម្តេចក្រឡាហោម ស ខេង និងសម្តេច សាយ ឈុំ ព្រមទាំងបំភ្លៃទៀតថា សម្តេចតេជោ ហ៊ុន សែន នឹងទៅចិន ហើយគ្មានឱកាសចូលប្រទេសឡើយ។
ប៉ុន្តែសម្តេច បានតបទៅវិញថា នឹងគ្មានករណីខាងលើ កើតឡើងជាដាច់ខាត ព្រោះផ្ទៃក្នុងគណបក្ស ប្រជាជនកម្ពុជា មានភាពរឹងមាំខ្លាំង។
សម្តេចបានមានប្រសាសន៍ថា៖ «ឱ ! អាតិរច្ឆានអើយ ! ថ្ងៃ២៤ អញទៅកោះកុង ថ្ងៃ១៥ អញថ្លែងការណ៍នៅកោះកុង អញមានទៅស្រុកចិនឯណាអញ បើភូតថ្លុកភូតត្រពាំងរបៀបនេះ ឯងធ្វើៗអី? កុំភូត ដោយសារតែពួកឯងពូកែភូតហ្នឹងហើយ បានវាអញ្ចឹង វារលាយ»។
សម្តេចបានបន្តថា «ខ្ញុំនៅក្នុងស្រុកទេ ហើយក៏គ្មានរឿងហ្នឹងកើតឡើងដែរ ចាំមើលទៅ ! គណបក្សប្រជាជនគេចេះណាស់ គេចេះត្រង់ថា នៅជាមួយគ្នាជាង៤០ឆ្នាំហើយ គេអត់ទៅណាឱ្យបែកគ្នាទេ ខ្ញុំមិនចង់ថាឱ្យនរណាទេ»។
សម្តេចបានថ្លែងថា «អាហ្នឹងយើងឈ្នះគេហើយ តែយើងប៉ាន់ជំហានដើររបស់គេត្រូវ អាហ្នឹងក៏យើងឈ្នះគេ តែគេប៉ាន់ជំហានដើររបស់យើងអត់ត្រូវទេ អាហ្នឹងគឺគេចាញ់ហើយ»។
សម្តេចបន្តថា ដោយសារពួកបក្សប្រឆាំង ពូកែភូតភរបែបនេះ បានជារលាយគ្មានថ្ងៃរស់ឡើងវិញ ។
នាយករដ្ឋមន្រ្តីកម្ពុជា ក្នុងនាមជាប្រធានគណបក្ស ប្រជាជនកម្ពុជា បានបញ្ជាក់យ៉ាងច្បាស់ៗទៅអ្នកប្រឆាំង ផ្កាប់មុខទាំងនោះថា គ្មានរឿងដកតំណែងសម្តេច សាយ ឈុំ និងសម្តេច ស ខេង នោះទេ ព្រោះពួកគាត់បានធ្វើការងាររួមសុខ រួមទុក្ខជាមួយគ្នាអស់រយៈពេល៤០ឆ្នាំមកហើយ ដូច្នេះអត់មានបែកបាកគ្នានោះទេ ។ គណបក្សប្រជាជនកម្ពុជា ធ្វើការងារតាមក្បួនខ្នាតត្រឹមត្រូវ ពួកអ្នកឯងមកចង់បំបែកបំបាកមិនបាននោះទេ ៕
