លោកឧកញ៉ា សុខ គង់ រកស៊ីដំបូងត្រឹមដើមទុនមាសមួយជី ប្រកបអាជីវកម្មផលិត កង់កៅស៊ូដើម្បីលក់
ភ្នំពេញ៖ លោកឧកញ៉ា សុខ គង់ ដែលជាអ្នកជោគជ័យក្នុងអាជីវកម្មរហូតក្លាយទៅជាអ្នកមាន ឬក៏អាចហៅបានថាជាសេដ្ឋីស្រុកខ្មែរក៏អាចថាបាន។ លោកឧកញ៉ាជាម្ចាស់ក្រុមហ៊ុនប្រេងសូគីម៉ិច គ្រុប ជាម្ចាស់សណ្ឋាគារសុខាទល់មុខព្រះបរមរាជវាំងបច្ចុប្បន្ន ហើយក៏ជាម្ចាស់ក្រុមហ៊ុនសំខាន់ផ្សេងៗទៀតដែរ។ តែអ្វីដែលគេនឹកស្មានមិនដល់នោះ ដំណើរជីវិតជោគជ័យនៃអាជីវកម្មរបស់លោកឧកញ៉ានេះ គឺផ្តើមចេញពីទុនមាសត្រឹមតែមួយជីប៉ុណ្ណោះ ដោយចាប់មុខរបបជាអ្នកផលិតកង់កៅស៊ូ។
ជាអ្នកមានកំណើតកើតជាអ្នកខេត្តព្រៃវែង លោកឧកញ៉ាបានភៀសខ្លួនជាមួយគ្រួសារទៅប្រទេសវៀតណាមកំឡុងពេលសម័យសង្គ្រាមស៊ីវិលនៅឆ្នាំ១៩៧៥ ដោយការរស់នៅវៀតណាមលោកឧកញ៉ាគ្រាន់តែជាអ្នកប្រកបរបរកសិកម្មប៉ុណ្ណោះ។ ក្រោយពីរបបប៉ុលពតដួលរលំនៅឆ្នាំ១៩៧៩ លោកក៏បានត្រឡប់ប្រទេសកម្ពុជាវិញ ដែលមិនបានទៅនៅរស់នៅខេត្តព្រៃវែងនោះទេ ដោយមករស់នៅ និងធ្វើការរកស៊ីនៅភ្នំពេញ ដោយផ្តើមចេញពីរកស៊ីការផលិតកង់កៅស៊ូដោយផ្តើមពីទុនមាស១ជីប៉ុណ្ណោះ។
លោកឧកញ៉ាក៏បានទៅរៀនពីមិត្តភក្តិម្នាក់នៅទួលគោកអំពីការផលិតកង់កៅស៊ូ ហើយក៏បានចាប់ផ្តើមបើកសិប្បកម្មផលិតកង់កៅស៊ូខ្លួនឯង ក៏ប៉ុន្តែក្រោយមកដោយសិប្បកម្មនេះគ្មានជំហររឹងមាំ លោកក៏បានបង្កើតក្រុមហ៊ុនប្រេងសូគីម៉ិចឡើងហើយក៏ទទួលបានជោគជ័យជាហូរហែរ ហើយក៏បានបង្កើតនៅក្រុមហ៊ុនថ្មីៗបន្ថែមទៀត ដូចជាសណ្ឋាគារសុខាដ៏ប្រណិតជាដើម។ លោកថាការជោគជ័យក្នុងអាជីវកម្ម គឺត្រូវក្លាហានដើម្បីសិក្សា ហើយធ្វើវាតែម្តង៕