ចាប់ផ្សឹក សង្ឃ ហោ សុខុន ព្រះចៅអធិការវត្តច្បារអំពៅ ទាំងយប់ , បណ្តាញសង្គមបរិយាយពីរឿងហោ សុខុនជាមួយLDP
ភ្នំពេញ៖ នៅទីបំផុត សង្ឃទីប្រឹក្សា ហោ សុខុន ព្រះចៅអធិការវត្តច្បារអំពៅ នៅយប់ថ្ងៃទី១៣ ខែកុម្ភៈ ឆ្នាំ២០១៩នេះ ត្រូវបានចាប់ផ្សឹកបានសម្រេចហើយ។ ពិធីផ្សឹកត្រូវបានធ្វើឡើងនៅវត្តបុទុមវតី ចំពោះព្រះភក្ត្រសម្តេចសង្ឃនាយក នន្ទ ង៉ែត និងមន្ត្រីថ្នាក់ដឹកនាំសង្ឃជាច្រើនអង្គផ្សេងទៀត។ ការចាប់ផ្សឹកទាំងបង្ខំបែបនេះ ដោយសារព្រះចៅអធិការវត្តច្បារអំពៅអង្គនេះ បានប្រព្រឹត្តខុសធម៌វិន័យពាក់ព័ន្ធនឹងការឡាយវីដេអូ មានសង្ឃដីកាទាក់ទងនឹងបញ្ហានយោបាយ បញ្ហាប្រទេសជាតិ និងបញ្ហាការដកការអនុគ្រោះពន្ធរបស់សហភាពអឺរ៉ុប មកលើប្រទេសកម្ពុជា។
ពិធីផ្សឹកព្រះតេជគុណ ហោ សុខុន ក៏មានការអញ្ជើញចូលរួមពីមន្ត្រីជាន់ខ្ពស់ក្រសួងធម្មការ និងសាសនា។ មុនពេលផ្សឹកព្រះតេជគុណ ត្រូវបានគេដឹកចេញពីវត្តច្បារអំពៅ សម្តៅទៅវត្តបុទុវតី ហើយធ្វើពិធីផ្សឹកតែម្តង យ៉ាងតក់ក្រហល់តែម្តង។
សមត្ថកិច្ចបានឲ្យដឹងថា បន្ទាប់ពីបែកធ្លាយសំឡេងជេរពុទ្ធបរិស័ទ សង្ឃ ហោ សុខុន ព្រះចៅអធិការវត្តច្បារអំពៅ ក្នុងរាជធានីភ្នំពេញ ត្រូវបាននាំទៅវត្តបទុមវត្តីហើយ។
បណ្តាញទំនាក់ទំនងសង្គមហ្វេសប៊ុក នៅថ្ងៃទី១៣ ខែកុម្ភៈ ឆ្នាំ២០១៩ បានទម្លាយសំឡេងព្រះសង្ឃ ហោ សុខុន ជេរបុរសម្នាក់ដោយពាក្យសម្តីអសុរោះ ប្រមាថ អាម៉ឹង យ៉ាងគ្រោកគ្រាត ខណៈដែលបុរសនោះ បានតេទូរស័ព្ទ ហើយសួរពីករណីថា តើព្រះតេជគុណ បាត់ខ្លួនពីវត្តច្បារអំពៅ ទៅណា កាលពីយប់ថ្ងៃទី១២កុម្ភៈ? ស្រាប់តែសង្ឃ ហោ សុខុន ជេរយ៉ាងគ្រោកគ្រាត។ អ្នកតេសួរស័ព្ទនោះ បានថតសំឡេងសង្ឃ ហោ សុខុន ហើយធ្វើជាវិដេអូ បង្ហោះតាមហ្វេសប៊ុក។
នៅដើមខែកុម្ភៈនេះ សង្ឃ ហោ សុខុន បានសរសេរតាមហ្វេសប៊ុកនូវសារនយោបាយបំបែកបំបាក់ដោយបានលើកសរសើរសម្តេចក្រឡាហោម ស ខេង អនុប្រធានគណបក្សប្រជាជនកម្ពុជា ថាជាផ្កាយសំណាង និងមានគុណបំណាច់ដ៏អស្ចារ្យនៅក្នុងគណបក្សប្រជាជនកម្ពុជា ក៏ដូចជានៅក្នុងរាជរដ្ឋាភិបាល ប្រទេសជាតិ និងសង្គមកម្ពុជា។
សារនយោបាយរបស់ព្រះតេជគុណ ហោ សុខុន ដូច្នេះ នាំឲ្យសម្តេចក្រឡាហោម ស ខេង បញ្ចេញប្រតិកម្មបំភ្លឺ ដោយមិនទទួលយកការសរសើរក្នុងបំណងបំបែកបំបាក់គណបក្សប្រជាជនកម្ពុជានោះឡើយ។
ជាការកត់សម្គាល់ ព្រះសង្ឃ ហោ សុខុន មានគំនុំយ៉ាងខ្លាំងក្លានឹងក្រុមគណបក្សសម្ព័ន្ធដើម្បីប្រជាធិបតេយ្យរបស់លោក ខឹម វាសនា រហូតដល់សង្ឃ ហោ សុខុន បានហៅលោក ខឹម វាសនា ថាជាជនក្បត់ជាតិ ថែមទៀតផង។ អតីតសង្ឃ ហោ សុខុន ក៏ជាសកម្មជនយ៉ាងសកម្មរបស់អតីតគណបក្សសង្រ្គោះជាតិផងដែរ តាមរយៈការរ៉ៃអង្គាសថវិកាមូលនិធី ចូលរួមក្នុងការធ្វើបាតុកម្ម។
បើតាមគណនីហ្វេសប៊ុកឈ្មោះ មួន វេហាស៍ បានសរសេរថា នឹកឃើញកាលហោសុខុន ចោទ LDP ថាទមិឡ និងចង់បំផ្លាញសាសនា ព្រមទាំងអន្តរិយកម្ម ព្រមទាំងរឿងផ្សេងៗទៀត យ៉ាងច្រើន គឺក្នុងបំណងតែមួយ ខិតខំកៀរគរឲ្យមន្ត្រីធំៗរបស់ CPP រាប់ចាប់តាំងពីថ្នាក់ដឹកនាំកំពូល រហូតថ្នាក់ក្រោម លើសពីនេះទៀត ហោ សុខុន ក៏ខិតខំប្រម៉ែប្រមូលសង្ឃ សង្ឃរាជ មន្ត្រីសង្ឃ សម្តេចសង្ឃជាដើម និងសកម្មភាពតូចធំដូចជា កម្មវិធីមហាសង្ឃនិបាទ សង្ឃវច្ចនៈ វិទ្យុ ឡាយ។ល គឺក្នុងបំណងរំលាយ LDP ហើយខិតខំមួលបង្កាច់ បង្កើតគណនីក្លែងក្លាយ ដាក់ទំនាយ បណ្តាសា គ្រប់សព្វបែបយ៉ាង។ លទ្ធផលចុងក្រោយ ហោ សុខុន លាចាកសិក្ខាបទបានសម្រេច! អនុមោទនា! សម្ព័ន្ធ នៅតែ សម្ព័ន្ធ! នេះសមដូចព្រះពុទ្ធដីកាថា បាចអង្កាមបញ្រ្ចាស់ខ្យល់ ឬដូចបុគ្គល ដែលចាប់លាមក គប់សំដៅព្រះច័ន្ទជាដើម។ ទោសៈជាភ្លើង ដែលដុតរោលរាលបុគ្គលនេះ ទាំងយប់ទាំងថ្ងៃ ចងអាឃាត ជាលំពែងដែលបុកទម្លុះបេះដូងរបស់បុគ្គលនេះ ឲ្យអន្ទះអន្ទែងឥតស្រាកស្រាន្ត ឧបមាដូចជា មាតាបិតា ដែលទើបតែបាត់បង់កូនតែម្នាក់ ជាទីស្រឡាញ់បណ្តូលចិត្ត ហើយរងចាំផ្លូវកូនត្រឡប់មកវិញជាដើម នេះគឺជានរកលោកិយ ដែលកំពុងតែដុតហោ សុខុន ក្នុងពេលបច្ចុប្បន្ន។
