សន្តិភាពផ្ដល់ឱកាសដល់យុវជន ទទួលបានការសិក្សាខ្ពស់
រាជធានីភ្នំពេញ៖ “សន្តិភាពផ្ដល់ឱកាសដល់យុវជន ទទួលបានការសិក្សាខ្ពស់” នេះជាប្រសាសន៍លោកបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ក្នុងឱកាសថ្លែងសន្ទរកថា ក្នុងកម្មវិធីសិក្ខាសាលាផ្សព្វផ្សាយស្ដីពី ការលើកកម្ពស់តម្លៃសន្តិភាពក្នុងវិស័យអប់រំ។
ក្នុងឱកាសនោះ លោកបណ្ឌិត បានមានប្រសាសន៍បន្ថែមទៀតថា រាជរដ្ឋាភិបាល បានដាក់ចេញនូវយុទ្ធសាស្ត្រចតុកោណ ដំណាក់កាលទី៤ ធានាបាននូវការអភិវឌ្ឍធនធានមនុស្ស ប្រកបដោយគុណភាព ដែលជាកត្តាដ៏សំខាន់បំផុត ក្នុងការធានា បាននូវសង្គមមួយប្រកបដោយសន្តិភាព និងសមធម៌ ហេតុនេះទើបក្រសួងអប់រំ យុវជន និងកីឡា បានបញ្ចូលការអប់រំប្រកបដោយសន្តិភាព និងធ្វើជាពលរដ្ឋល្អ ដល់យុវជន។
ជាមួយសន្តិភាព កម្ពុជាសម្រេចបាននូវកំណើនសេដ្ឋកិច្ច កាត់បន្ថយភាពក្រីក្រ ចំនួនសាលារៀន និងចំនួនកុមារចូលរៀនក៏មានការកើនឡើង។ កម្មវិធីសិក្ខាសាលាផ្សព្វផ្សាយ ស្ដីពីការលើកកម្ពស់តម្លៃសន្តិភាព ក្នុងវិស័យអប់រំ ប្រព្រឹត្តទៅនារសៀលថ្ងៃសុក្រ ទី២២ខែកុម្ភៈ នៅសាកលវិទ្យាល័យភូមិន្ទភ្នំពេញ៕
