កាកបាទក្រហមកម្ពុជា ចូលរួមរំលែកទុក្ខគ្រួសារសពនិស្សិតស្រីរៀនអាហារូបករណ៍ឆ្នាំទី៤ រងគ្រោះដោយសាររថយន្ត Range Rover បុកស្លាប់
(កណ្តាល) ៖ នៅព្រឹកថ្ងៃពុធ ៧រោច ខែផល្គុន ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី ២៧ ខែមីនា ឆ្នាំ២០១៩ នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យឯកឧត្តម វេជ្ជ. អ៊ុយ សំអាត នាយកនាយកដ្ឋានគ្រប់គ្រងគ្រោះមហន្តរាយ កាកបាទក្រហមកម្ពុជា ចូលរួមរំលែកទុក្ខយ៉ាងក្រៀមក្រំជាមួយក្រុមគ្រួសារសពកញ្ញា ឌុំ រីដា អាយុ ២២ឆ្នាំ ជានិស្សិតអាហារូបករណ៍សិក្សានៅសាកលវិទ្យាល័យអន្ដរជាតិ ផារ៉ាហ្គន (អតីតហ្សាម៉ាន់) ផ្នែកវិទ្យាសាស្ដ្រនយោបាយ ឆ្នាំទី៤ ដែលជួបគ្រោះថ្នាក់ចរាចរណ៍ដោយសាររថយន្ត Range Rover បុកបណ្តាលឱ្យស្លាប់យ៉ាងអាណោចអាធ័ម កាលពីរសៀលថ្ងៃទី២៦ ខែមីនា ឆ្នាំ២០១៩នេះ ស្ថិតនៅតាមផ្លូវលេខ ៣១៧ កែង ៥២៨ សង្កាត់បឹងកក់១ ខណ្ឌទួលគោក រាជធានីភ្នំពេញ ដែលពេលនេះសពជនរងគ្រោះត្រូវបានតម្កល់ធ្វើបុណ្យតាមប្រពៃណី នៅស្រុកកំណើតស្ថិតនៅភូមិកំពង់ដំរី ឃុំព្រែកតាមាក់ ស្រុកខ្សាច់កណ្ដាល ខេត្តកណ្តាល។
ក្នុងឱកាសដ៏សោកសង្រេងនេះ កាកបាទក្រហមកម្ពុជា ចូលរួមរំលែកទុក្ខយ៉ាងក្រៀមក្រំជាមួយក្រុមគ្រួសារសព ដែលត្រូវបាត់បង់កូនស្រី និងជាសាច់ញាតិជាទីស្រឡាញ់ទាំងវ័យក្មេង ព្រមទាំងជាការបាត់បង់ធនធានមនុស្សដ៏ឆ្នើមរៀនពូកែមួយរូប និងសូមឧទ្ទិសដល់វិញ្ញានក្ខន្ធសពកញ្ញា ឌុំ រីដា បានទៅកាន់សុគតិភពកុំបីឃ្លៀងឃ្លាតឡើយ។
ក្រុមគ្រួសារសពបានសំដែងក្តីរំភើប និងថ្លែងអំណរគុណយ៉ាងជ្រាលជ្រៅបំផុតចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានគិតគូរ ចូលរួមរំលែកទុក្ខ និងជួយឧបត្ថម្ភសម្រាលការលំបាកក្នុងសមានទុក្ខដ៏ក្រៀមក្រំនេះ។
សូមបញ្ជាក់ថាសម្ភារដែលចូលបុណ្យរួមមាន ៖ អង្ករ ១០០គីឡូក្រាម ត្រីខ ៥០កំប៉ុង មី ៥កេស ទឹកក្រូច ៥កេស និងបច្ច័យមួយចំនួន៕
