ទីតាំងលក់ឱសថបូរាណចំនួន៣ ដែលគ្នានច្បាប់អនុញ្ញត ត្រូវផ្អាកលក់ និងចែកចាយ ជាបណ្តោះអាសន្ត
ភ្នំពេញ:ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានសម្រេចឲ្យ ម្ចាស់ទីតាំងឱសថបូរាណចំនួន៣ទីតាំង ដែលគ្នានច្បាប់អនុញ្ញត ផ្អាកការលក់ និងចែកចាយឱសថបូរាណ ជាបណ្តោះអាសន្ន ហេីយរក្សាទុកឱសថទាំងនេះ កុំឲ្យបាត់បង់ និងត្រូវចូលខ្លួនមកបំភ្លឺបន្ថែម នៅគណៈកម្មាធិការប្រយុទ្ធប្រឆាំងផលិតផលក្លែងក្លាយ។
នាព្រឹកថ្ងៃទី២៧ ខែមីនា ឆ្នាំ២០១៩ ក្រុមប្រតិបត្តិការពិសេសនៃគណៈកម្មាធិការប្រយុទ្ធប្រឆាំងផលិតផលក្លែងក្លាយ ដឹកនាំដោយ វរសេនីយ៍ទោ កឹម វិសាល សហការជាមួយអាជ្ញាធរមូលដ្ឋាន ក្រោមការសម្របសម្រួលនីតិវិធីពីលោក ងិន ពេជ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានចុះត្រួតពិនិត្យផ្ទះលក់ឱសថបុរាណចិន ចំនួន៣ទីតាំង មានផ្ទះលេខ ១០២ ផ្ទះលេខ ១០៤ និងផ្ទះលេខ ១០៦ ស្ថិតនៅតាមបណ្តោយផ្លូវលេខ ២១៧ ហៅថាវិថី (ហ្សាដឺហ្គោល) ក្នុងសង្កាត់អូរឬស្សី ៤ ខណ្ឌ៧មករា រាជធានីភ្នំពេញ។
នៅក្នុងប្រតិបត្តិការនេះ សមត្ថកិច្ចចម្រុះនៃគណៈកម្មាធិការ បានរកឃេីញថា:
-ទីតាំងផ្ទះលេខ ១០២ មានឱសថមួយចំនួន មិនមានចុះបញ្ជីការ គ្មានលិខិតអនុញ្ញាតនាំចូលនិងចែកចាយ ពីក្រសួងសុខាភិបាល ។
-ដោយឡែកទីតាំងផ្ទះលេខ ១០៤ និងផ្ទះលេខ ១០៦ ខាងលេី មានឱសថមួយចំនួន មិនមានចុះបញ្ជីការ គ្មានលិខិតអនុញ្ញាតនាំចូលនិងចែកចាយ ពីក្រសួងសុខាភិបាល ឱសថហួសកាលបរិច្ឆេទកំណត់ ព្រមទាំងមានការស្តុកទុក ការលក់ និងចែកចាយជាច្រេីននូវឱសថជំនួយផ្លូវភេទ ឱសថបង្កេីនអារម្មណ៍ផ្លូវភេទជាច្រេីនប្រភេទផ្សេងទៀត ដែលក្រសួងសុខាភិបាលហាមឃាត់។
ក្រោយពីការត្រួតពិនិត្យរបស់សមត្ថកិច្ចចម្រុះរួចមក លោកព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានសម្រេចឲ្យ ម្ចាស់ទីតាំងទាំង ៣ខាងលេី ផ្អាកការលក់និងចែកចាយឱសថបូរាណ របស់ខ្លួនជាបណ្តោះអាសន្ន ហេីយរក្សាទុកឱសថទាំងនេះកុំឲ្យបាត់បង់ និងត្រូវចូលខ្លួនមកបំភ្លឺបន្ថែម នៅគណៈកម្មាធិការប្រយុទ្ធប្រឆាំងផលិតផលក្លែងក្លាយ ព្រមទាំងឲ្យសមត្ថកិច្ចនៃ គណៈកម្មាធិការប្រយុទ្ធប្រឆាំងផលិតផលក្លែងក្លាយ ដកហូតយកនូវវត្ថុតាងខុសច្បាប់មួយចំនួន មករក្សាទុកនៅ គណៈកម្មាធិការ ដេីម្បីរៀបចំកសាងសំណុំរឿង បញ្ជូនទៅតុលាការចាត់ការតាមនីតិវិធី។
