នៅ៨ថ្ងៃទៀត ដល់ថ្ងៃចូលឆ្នំាថ្មី សូម បងប្អូនជនរួមជាតិ សប្បាយរីករាយ ក្នុងការធ្វើដំណើរទៅកំសាន្តទីជិតឆ្ងាយទាំងក្នុង និងក្រៅប្រទេសដោយសេរី

ភ្នំពេញ៖ តាមរយៈ facebook ផ្លូវការ នៅថ្ងៃទី 6 ខែមេសានេះ សម្ដេចតេជោនាយករដ្ឋមន្ត្រីបានផ្ញើសារជូនជនរួមជាតិដោយបានលើកឡើងថានៅសល់ 8 ថ្ងៃទៀតប៉ុណ្ណោះនឹងដល់ថ្ងៃចូលឆ្នាំថ្មីប្រពៃណីជាតិខ្មែរយើង ហើយដូច្នេះសូមបងប្អូនអត់សប្បាយរីករាយក្នុងការធ្វើដំណើរទៅជិតទាំងឆ្ងាយជាពិសេសជួបជុំបងប្អូនសាច់ញាតិក្នុងឱកាសចូលឆ្នាំថ្មីនេះ។

សម្ដេចតេជោហ៊ុនសែនបានថ្លែងថា សុខសប្បាយជាទេ បងប្អូនជនរួមជាតិ និងកូនក្មួយជាទីស្រឡាញ់?

នៅ៨ថ្ងៃទៀត ថ្ងៃចូលឆ្នំាថ្មីប្រពៃណីជាតិយើងនឹងមកដល់។ ស្រុកទេសមានសុខសន្តិភាព បងប្អូនជនរួមជាតិក៏មានឱកាសបានសប្បាយរីករាយ ក្នុងការធ្វើដំណើរទៅកំសាន្តទីជិតឆ្ងាយទាំងក្នុង និងក្រៅប្រទេសដោយសេរី។

ឆ្នាំនេះ នៅតាមបណ្តាខេត្តនានាក៏មានរៀបចំកម្មវិធីសង្រ្កាន្តអបអរសាទរឆ្នាំថ្មី ដើម្បីផ្តល់នូវការកំសាន្តរីករាយជូនដល់បងប្អូនប្រជាពលរដ្ឋ ក៏ដូចជាទេសចរណ៍ជាតិ និងអន្តរជាតិផងដែរ។ ហើយជាពិសេសទៀតនោះ គឺបងប្អូនប្រជាពលរដ្ឋ និងកូនក្មួយកម្មករកម្មការិនីអាចជិះឡានក្រុងពីភ្នំពេញទៅកាន់ខេត្ត ឬពីខេត្តមកភ្នំពេញវិញចាប់ពីថ្ងៃទី ១២ ដល់ថ្ងៃទី ១៨ ដោយមិនបង់ប្រាក់ទៀតផង។ សាលាក្រុងរាជធានីបានត្រៀមឡាន១២០គ្រឿងរួចស្រេចហើយ។

សូមបងប្អូនប្រជាពលរដ្ឋ ជាពិសេសកូនក្មួយយុវជន បើកបរគោរពច្បាប់ចរាចរណ៍ កុំបើកវ៉ាប្រជែងយកលឿនតែម្នាក់ឯង ដែលអាចបង្កគ្រោះថ្នាក់ដល់ខ្លួនឯងផង និងអ្នកដទៃផងដែលធ្វើអោយយើងសោកស្តាយអស់មួយជីវិត ជាពិសេសនៅក្នុងរដូវបុណ្យចូលឆ្នាំថ្មី។

សុំជូនពរបងប្អូន និងកូនក្មួយធ្វើដំណើរមានសុខសុវត្ថិភាពគ្រប់ទីកន្លែង នឹងបានសប្បាយរីករាយក្នុងថ្ងៃសម្រាកចុងសប្តាហ៍៕