ប្រជាកសិករខេត្តបន្ទាយមានជ័យកំពុងមមាញឹក បង្កបង្កើនផលរដូវវស្សា
បន្ទាយមានជ័យ៖ ប្រជាកសិករនៅខេត្តបន្ទាយមានជ័យកំពុងមមាញឹកការងារបង្កបង្កើនផលរដូវវស្សា បន្ទាប់ពីទទួលបានទឹកភ្លៀងធ្លាក់ជាបន្តបន្ទាប់ទៅតាមទម្លាប់របស់ពួកគាត់ត្រូវតែធ្វើឱ្យបានទាន់រដូវកាលនោះ ។
លោក ប៉ាង វណ្ណសេដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបន្ទាយមាន ជ័យ បានឱ្យដឹងកាលពីរសៀលថ្ងៃចន្ទ ១០រោច ខែពិសាខ ឆ្នាំកុរ ឯកស័ក ព.ស ២៥៦៣ ត្រូវនឹង ថ្ងៃទី២៨ខែឧសភា ឆ្នាំ២០១៩នេះថា រដូវវស្សាឆ្នាំ២០១៩នេះគិតត្រឹមថ្ងៃទី២៨ ខែឧសភានេះ ប្រជាកសិករនៅទូទាំងខេត្ត បានភ្ជួរដាស់ដីស្រូវវស្សាបានជិត ២០ម៉ឺនហិកតា និងព្រោះស្រូវបានជាង ៨ម៉ឺនហិកតា ស្មើនឹងជាង ៣៥ភាគរយ នៃផែនការធ្វើស្រូវវស្សាប្រចាំឆ្នាំជាង ២៥ម៉ឺនហិកតា នោះគឺយឺតជាងឆ្នាំ២០១៨ ក្នុងរយៈពេលដូចគ្នាប្រមាណ ១០ភាគ រយ។ រីឯការធ្វើ ស្រូវប្រាំងដើមរដូវវស្សា មកទល់ពេលនេះសម្រេចបានជាង ២៥.០០០ហិកតា។
លោកបានបញ្ជាក់ថា ការយឺតយ៉ាវបន្តិចនេះ អាចមកពីកត្តាអាកាសធាតុប្រែប្រួល ការឡើងក្តៅខ្លាំង និងរបាយទឹកភ្លៀងមិនទៀងទាត់។ រីឯការដាំដុះដំណាំរដូវវស្សាវិញអនុវត្តន៍បានដំណាំរួមផ្សំចំនួន ៥៥ហិកតា ដំណាំបន្លែបានជិត ៣០០ហិកតា និងដំណាំឧស្សាហកម្ម ពិសេសដំឡូងមី បានជាង ៤ម៉ឺនហិកតា លើផែនការ ៨៥.០០០ហិកតា។
លោក ប៉ាង វណ្ណសេដ្ឋ បានបញ្ជាក់ទៀតថា នៅក្នុងរយៈពេលដូចគ្នានេះភ្លៀងធ្លាក់ដោយកន្លែង កម្រិតទឹកភ្លៀងសរុបជាមធ្យមគិតពីដើមវគ្គ មានចំនួន ១៤៨,១៥មីលីម៉ែត្រ បើធៀបនឹងឆ្នាំកន្លងទៅ មានកម្រិតទាបជាងចំនួន ១៨០,៥៩មីលីម៉ែត្រ។
លោកបានឱ្យដឹងបន្ថែមទៀតថា សម្រាប់ខេត្តបន្ទាយមានជ័យ បច្ចុប្បន្ននេះប្រភពទឹក នៅទូទាំងខេត្ត អាចជួយស្រោចស្រពដីស្រែបានកាន់តែប្រសើរឡើង ខណៈសព្វថ្ងៃរាជរដ្ឋាភិ បាល តាមរយៈក្រសួងធនធានទឹក និងឧតុនិយម ក៏ដូចជាដៃគូអភិវឌ្ឍន៍ បានបន្តជួយស្ដារប្រឡាយ ធ្វើប្រឡាយ និងធ្វើអាងស្តុកទឹក ទំនប់ស្ទាក់ទឹកជាច្រើនកន្លែងជាបន្តបន្ទាប់ ដើម្បីជួយសម្រួលដល់ការធ្វើស្រែរបស់ប្រជាពលរដ្ឋ ក្នុងមួយឆ្នាំអាចធ្វើបានចាប់ពី២ ទៅ៣ដង ទៅតាមតំបន់ភូមិសាស្ត្រជាក់ស្ដែង។
ជាមួយនេះដែរការប្រែប្រួលវិជ្ជមានរបស់ប្រជាកសិករនៅប៉ុន្មានឆ្នាំចុងក្រោយនេះ គឺពួកគាត់បានផលិតពូជស្រូវខ្លួនឯងបាន តែក្រោមការជ្រោមជ្រែងបច្ចេកទេសពីមន្ត្រីជំនាញ។ ប្រជាកសិករបានចងក្រងជាសហគមន៍ ដើម្បីជួយគ្នាលើបច្ចេកទេស ការទប់ទល់នឹងហានិ ភ័យ ការរកទីផ្សារ ជាដើម ៕ ដោយ៖ សារីទ្ធី
