តារាកំប្លែងវណ្ណ នីឡា នៅតែបដិសេធរឿងចូលរោងការ
ភ្នំពេញ៖ កូនស្រីផលិតករទូរទស្សន៍ និងជាតារាកំប្លែង កញ្ញា នីឡា បានធ្វើឲ្យមហាជនចាប់អារម្មណ៍ជាមួយនឹងការបង្ហាញមុខគូស្នេហ៍ថ្មីជាសាធារណៈក្រោយពីបែកបាក់គូស្នេហ៍កូនថៅកែល្ខោនបាសាក់នោះ។ ថ្មីៗនេះគេបានឃើញពីរូបថត តុបតែងខ្លួនបែបមង្គលការហើយត្រូវបានគេចែកចាយបន្តជាមួយនឹងដំណឹងត្រៀមចូលរោងការ ប៉ុន្តែត្រូវបានតារាស្រីរូបនេះច្រានចោល។
កូនស្រីសំណព្វចិត្តលោក សុវណ្ណ ឬទ្ធី ហៅតាវ៉ិចទ័រ កញ្ញា នីឡា បាននាំអនាគតឪពុកម្តាយក្មេកឲ្យមកស្គាល់ផ្ទះខ្លួន ជាផ្លូវការជាការបើកផ្លូវ និងទទួលស្គាល់ពេញលេញ និងកាន់តែធ្វើឲ្យស្នេហានេះកក់ក្តៅ ខណៈ នីឡា ក៏ហៅឪពុកម្តាយខាងប្រុសថាម៉ាក់ប៉ាក្មេកពេញៗមាត់។ កាន់តែពិសេសក្រោយពីពួកគេបានថតរូបសម្រាប់មុនពិធីអាពាហ៍ពិពាហ៍មួយរួមគ្នារហូតអ្នកគាំទ្រថាពួកគេអាចនឹងចូលរោងការឆាប់ៗ។ តាមការបញ្ជាក់របស់តារាស្រីរូបនេះបញ្ជាក់ថា គម្រោងរៀបការពិតជាមានប៉ុន្តែមិនមែនភ្លាមៗទេគឺអាចនៅឆ្នាំក្រោយ ស្របតាមការចង់បានរបស់ចាស់ទុំ និងគូស្នេហ៍ទាំងសងខាង។ នាងថាការជួបជុំនេះគឺជារឿងធម្មតាសម្រាប់គ្រួសារទាំងសងខាង ដើម្បីឲ្យស្គាល់គ្នាកាន់តែស្និទ្ធិស្របពេលដែលមេបាទាំងសងខាងសុទ្ធតែមមាញឹករៀងខ្លួន។
គួរបញ្ជាក់ដែរថាកញ្ញា នីឡា តារាកំប្លែងស្រីវ័យ ១៩ ឆ្នាំដែលមានទំនាក់ទំនងស្នេហាជាមួយគូស្នេហ៍ថ្មីអស់រយៈពេលជិត ២ ឆ្នាំនេះ និងត្រូវបានឪពុកម្តាយទាំងសងខាងបានដឹងឮ និងយល់ស្របអស់ហើយ តែក្នុងខណៈពេលនេះគ្រួសារទាំង ២ ក៏នៅមិនទាន់បានគិតរឿងភ្ជាប់ពាក្យ ឬមួយក៏រៀបការនោះឡើយ។ ទំនាក់ទំនងស្នេហ៍ថ្មីនេះគឺក្រោយពីនីឡាបានភ្ជាប់ពាក្យជាមួយកូនប្រុសថៅកែល្ខោនបាក់ដ៏ល្បីល្បាញភី សុគន្ធីគឺ លោកផន រង្សី មានវ័យ២៥ឆ្នាំ កាលពីថ្ងៃទី១៩ ឧសភា ២០១៦ កន្លងទៅ ហើយបានបែកបាក់គ្នាក្នុងអំឡុងឆ្នាំ២០១៨ ។តែអ្វីដែលធ្វើឲ្យអ្នកគ្រប់គ្នាចាប់អារម្មណ៍នោះគឺសាវតារគ្រួសារម្ចាស់ចិត្តនាង ដោយ លោក សក្ការៈ ជាគូស្នេហ៍ថ្មីរបស់នីឡាគឺជាអ្នកមានមុខមាត់គួរសម ព្រោះឪពុករបស់ខាងប្រុសគឺជាលោក ឡុង ឌីម៉ង់ដែលគេ ដឹងថាជាអតីតឯកអគ្គរាជទូតនៃសាធារណរដ្ឋកូរ៉េ ចំណែកម្តាយជាអ្នកជំនួញផងដែរ៕
