លម្អិតករណីឃាតកម្មប្ដីសម្លាប់ប្រពន្ធ និងកូន នៅស្រុកកណ្ដាលស្ទឹង ខេត្តកណ្ដាល, ជនដៃដល់ត្រូវតាមចាប់ខ្លួនបាននៅក្រុងប៉ោយប៉ែត

ខេត្តបន្ទាយមានជ័យ ៖ បន្ទាប់ពីស្រាវជ្រាវយ៉ាងយកចិត្តទុកដាក់ កម្លាំងនាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ ពាក់ព័ន្ធករណីឃាតកម្មសម្លាប់ប្រពន្ធ និងកូនស្រី កាលពីថ្ងៃ០៦ ខែតុលា ឆ្នាំ២០២៣ នៅចំណុចភូមិពោធិ៍ស្មាត ឃុំជើងកើប ស្រុកកណ្ដាលស្ទឹង ខេត្តកណ្ដាល។

ក្រោយពីទទួលបានព័ត៌មាន កម្លាំងនាយកដ្ឋាននគរបាលព្រហ្មទណ្ឌបានក្រសួងមហាផ្ទៃ នៃអគ្គស្នងការនគរបាលជាតិ ដោយបានចង្អុលបង្ហាញផ្ទាល់ពីឯកឧត្តម ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ និងបង្ក្រាបដឹកនាំផ្ទាល់ដោយលោកឧត្តមសេនីយ៍ត្រី ហ៊ុន មុន្នីរ័ត្ន, លោកឧត្តមសេនីយ៍ត្រី ខេង ម៉េងឈាង, លោកវរសេនីយ៍ឯក ហែម បូណា អនុប្រធាននាយកដ្ឋាននគរបាលព្រហ្មទណ្ឌ និងវរសេនីយ៍ឯក ឆាន់ គឹមលី បានដឹកនាំកិច្ចសហប្រតិបត្តិការនេះ ព្រមទាំងមានការសហការពីនាយកដ្ឋាននគរបាលកណ្តាលសន្តិសុខ ស្នងការដ្ឋាននគរបាលខេត្តកណ្តាល ស្នងការដ្ឋាននគរបាលខេត្តសៀមរាប ស្នងការដ្ឋាននគរបាលខេត្តបន្ទាយមានជ័យ និងអធិការដ្ឋាននគរបាលក្រុងប៉ោយប៉ែត។

កម្លាំងជំនាញរបស់នាយកដ្ឋាននគរបាលព្រហ្មទណ្ឌ បានធ្វើការស្រាវជ្រាវយ៉ាងយកចិត្តទុកដាក់ ព្រមទាំងបានសាកសួរមនុស្សមួយចំនួន និងឆ្លងតាមជំនាញបានកំណត់ទីតាំងលាក់ខ្លួនរបស់ជនសង្ស័យនៅខេត្តសៀមរាប ប៉ុន្តែជនសង្ស័យខាងលើត្រូវបានបន្តរត់គេចខ្លួនទៅដល់ខេត្តបន្ទាយមានជ័យ។

បន្ទាប់មកកម្លាំងជំនាញរបស់យើងបានចង្អុលបង្ហាញ និងកំណត់ទីតាំងយ៉ាងច្បាស់លាស់ ស្ថិតនៅក្នុងភូមិចាន់គិរី សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ទើបកម្លាំងជំនាញសហការជាមួយអធិការដ្ឋាននគរបាលក្រុងប៉ោយប៉ែតធ្វើការឃាត់ខ្លួនជនសង្ស័យខាងលើ បាននៅចំណុចភូមិចាន់គិរី សង្កាត់ប៉ោយម៉ែត ក្រុងប៉ោយប៉ែត ខេត្តបន្ទាយមានជ័យ។

ជនសង្ស័យមានឈ្មោះ ម៉ែន សំអាង ភេទប្រុស អាយុ៣៦ឆ្នាំ ថ្ងៃខែឆ្នាំកំណេីត១៤-០៧-១៩៨៣ ត្រូវនគរបាលឃាត់ខ្លួន នៅចំនុចភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ពាក់ពន្ធ័ករណីឃាតកម្មនៅថ្ងៃទី០៦ ខែតុលា ឆ្នាំ២០២៣ នៅខេត្តកណ្តាល ដែលបានសម្លាប់ប្រពន្ធឈ្មោះ ឃឿន ស្រីវលក្ខ័ណ អាយុ៣២ឆ្នាំ និងកូនស្រីឈ្មោះ អឿន ចន្ទសីម៉ា អាយុ២ឆ្នាំ។

ក្រោយចាប់ខ្លួនជនដៃដល់ត្រូវបានបញ្ជូនមកកាន់នាយកដ្ឋាននគរបាលព្រហ្មទណ្ឌ ដើម្បីធ្វើការសាកសួរ និងប្រគល់ជូនស្នងការដ្ឋាននគរបាលខេត្តកណ្តាលដែលជាម្ចាស់ករណី អនុវត្តនីតិវិធីបន្ត៕