ប្រធានអាជ្ញាធរជាតិប្រយុទ្ធប្រឆាំងគ្រឿងញៀន អះអាងថា គ្រឿងញៀន នៅតាមភូមិឃុំគ្មានការថយចុះ ហើយនៅតាមទីកម្សាន្ត ស្ទើរតែទាំងអស់ មានប្រើប្រាស់គ្រឿងញៀន
ភ្នំពេញ ៖ នៅថ្ងៃទី១៩ ខែមីនា ឆ្នាំ២០១៩ នៅក្រសួងមហាផ្ទៃ បើកកិច្ចប្រជុំពេញអង្គ របស់អាជ្ញាធរជាតិប្រយុទ្ធប្រឆាំងគ្រឿងញៀន អធិបតីដឹកនាំដោយលោកនាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ។ ឧបនាយករដ្ឋមន្ត្រី កែ គឹមយ៉ាន បានថ្លែងអះអាងថា ការចែកចាយគ្រឿងញៀន នៅតាមទីជនបទ តាមភូមិ ឃុំគ្មានការថយចុះនៅឡើយបើទោះបីជារយៈពេលចុងក្រោយនេះ អាជ្ញាធរធ្វើការបង្ក្រាបករណីធំៗ បានជាបន្តបន្ទាប់ក៏ដោយ។
លោក ឧបនាយករដ្ឋមន្ត្រី កែ គឹមយ៉ាន បានលើកឡើងថា “ពីមុន ខ្ញុំសន្និដ្ឋានថា ករណីគ្រឿងញៀន វានឹងអាចថយ ដោយសារចាប់ករណីធំៗបានច្រើន ប៉ុន្តែអាចែកតាមភូមិឃុំហ្នឹង គឺវាមិនថយនោះឡើយ។ ចំណែកទីកម្សាន្តនានា ស្ទើរតែទាំងអស់ ដែលមានប្រើប្រាស់គ្រឿងញៀន”។
លោក ឧបនាយករដ្ឋមន្ត្រី បានធ្វើការអំពាវនាវដល់ស្ថាប័ន ពាក់ព័ន្ធទាំងអស់ ត្រូវរួមគ្នា ស៊ើបអង្កេតស្វែងរកម្ចាស់ និងអ្នកពីក្រោយខ្នងនៃការនាំចូលនូវគ្រឿងញៀននេះ បន្ថែមទៀត ក្នុងគោលបំណងធ្វើយ៉ាងឲ្យករណីនេះ មានការថយចុះ ដើម្បីសុវត្ថិភាពដល់បងប្អូនប្រជាពលរដ្ឋ ក៏ដូចជាសង្គមជាតិខ្មែរទាំងមូល។ បញ្ហាគ្រឿងញៀននេះ គឺមិនមែនតែកម្ពុជាយើងនោះទេ គឺពិភពលោក មានការព្រួយបារម្ភគ្រប់ៗគ្នា ប៉ុន្តែមន្ត្រីពាក់ព័ន្ធទាំងអស់ ត្រូវតែចាត់វិធានការ ឲ្យបានម៉ឺងម៉ាត់បំផុត ដើម្បីប្រទេសជាតិ ហើយត្រូវតែរួមសហការគ្នាឲ្យបានខ្លាំងក្លាបន្ថែមទៀត ក្នុងការបង្ក្រាប និងលុបបំបាត់។
យោងតាមរបាយការណ៍របស់ អាជ្ញាធរជាតិប្រយុទ្ធប្រឆាំងគ្រឿងញៀន បានឲ្យដឹងថា ក្នុងឆ្នាំ២០១៨ កន្លងទៅនេះ បទល្មើសគ្រឿងញៀន សរុបដែលបង្ក្រាបបានចំនួន ៨.០០២ករណី ដោយឃាត់ខ្លួនជនជាប់ពាក់ព័ន្ធ បានចំនួន១៦.២១៦នាក់ និងគ្រឿងញៀនជាង០,៥តោន៕
