ឥណ្ឌូនេស៊ី នឹងបន្តជួយបណ្តុះបណ្តាល កងពលតូចទ័ពពិសេសឆត្រ័យោងលេខ៩១១ និងបញ្ជាការដ្ឋានអង្គរក្សកងទ័ពកម្ពុជា
ប្រទេសថៃ៖ ឥណ្ឌូនេស៊ី នៅតែបន្តកិច្ចសហប្រតិបត្តិការ និងជួយឧបត្ថម្ភដល់កម្ពុជាយ៉ាងច្រើន ក្នុងនោះលើផ្នែកវិស័យយោធា ឥណ្ឌូនេស៊ីបានជួយបណ្តុះបណ្តាល ហ្វឹកហ្វឺនកងយោធពលខេមរភូមិន្ទ ដល់កងពលតូចទ័ពពិសេសឆត្រ័យោងលេខ៩១១ និងបញ្ជាការដ្ឋានអង្គរក្សជាបន្តបន្ទាប់។ រដ្ឋមន្ត្រីការពារជាតិឥណ្ឌូនេស៊ី ដែលទើបបានទទួលមុខដំណែងថ្មី បានបញ្ជាក់ថា៖ នឹងបន្តជួយបណ្តុះបណ្តាល ដល់កងទ័ពកម្ពុជា តាមសំណើរដែលអាចធ្វើទៅបាន។
បើតាមការផ្សាយព័ត៌មានលើគេហទំព័ររបស់ក្រសួងការពារជាតិ បានឲ្យដឹងថា ក្នុងឱកាសការអញ្ជើញចូលរួមនៅក្នុងកិច្ចប្រជុំចង្អៀត រដ្ឋមន្រ្តីការពារជាតិអាស៊ាន (ADMM Retreat) និងកិច្ចប្រជុំរដ្ឋមន្រ្តីការពារជាតិអាស៊ាន-បូក លើកទី៦ (6th ADMM-Plus) នៅទីក្រុងបាងកក ព្រះរាជាណាចក្រថៃ កាលពីល្ងាចថ្ងៃទី១៦ ខែវិច្ឆិកា ឆ្នាំ២០១៩ សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ អមតំណើរដោយ នាយឧត្តមសេនីយ៍ ណឹម សុវត្ថិ ទីប្រឹក្សាពិសេស និងជាអគ្គនាយក អគ្គនាយកដ្ឋាននយោបាយ និងកិច្ចការបរទេស ក្រសួងការពារជាតិ បានចូលជួបពិភាក្សាការងារទ្វេភាគីជាមួយ លោក PROBOVO SUBIANTO រដ្ឋមន្ត្រីការពារជាតិឥណ្ឌូនេស៊ី។
នៅក្នុងជំនួបនោះ តាមរយៈសម្តេចពិជ័យសេនា ទៀ បាញ់, លោក PROBOVO SUBIANTO រដ្ឋមន្ត្រីការពារជាតិឥណ្ឌូនេស៊ី បានសំដែងការសាកសួរសុខទុក្ខចំពោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
មានមតិឆ្លើយតបវិញ សម្តេចពិជ័យសេនា ទៀ បាញ់ បានសំដែងការអបអរសាទរចំពោះ លោក PROBOVO SUBIANTO ដែលបានទទួលមុខតំណែងជារដ្ឋមន្ត្រីការពារជាតិឥណ្ឌូនេស៊ី។ សម្តេចពិជ័យសេនា បានបញ្ជាក់ថា៖ កម្ពុជា និងឥណ្ឌូនេស៊ី មានប្រពៃណី ទំនាក់ទំនងមិត្តភាព និងកិច្ចសហប្រតិបត្តិការល្អជាមួយគ្នា តាំងពីយូរយារណាស់មកហើយ ហើយឥណ្ឌូនេស៊ីបានជួយស្វែងរកសន្តិភាពជូនប្រទេសកម្ពុជា ក្នុងអំឡុងសម័យអ៊ុនតាក់។
សម្តេចពិជ័យសេនា បានបញ្ជាក់ទៀតថា៖ ចាប់តាំងពីពេលនោះមក ឥណ្ឌូនេស៊ីនៅតែបន្តកិច្ចសហប្រតិបត្តិការ និងជួយឧបត្ថម្ភដល់កម្ពុជាយ៉ាងច្រើន ក្នុងនោះលើផ្នែកវិស័យយោធា ឥណ្ឌូនេស៊ីបានជួយបណ្តុះបណ្តាល ហ្វឹកហ្វឺនកងយោធពលខេមរភូមិន្ទ ដល់កងពលតូចទ័ពពិសេសឆត្រ័យោងលេខ៩១១ និងបញ្ជាការដ្ឋានអង្គរក្សជាបន្តបន្ទាប់។
សម្តេចពិជ័យសេនា ទៀ បាញ់ បានបន្តថា៖ នៅលើវេទិកាអន្តជាតិ កម្ពុជា និងឥណ្ឌូនេស៊ី បានធ្វើការផ្លាស់ទស្សនៈគ្នាទៅវិញទៅមក និងបានរិះរកវិធី ដើម្បីបម្រើផលប្រយោជន៍រួម ហើយសម្តេចសង្ឃឹមថា៖ តាមរយៈកិច្ចប្រជុំរដ្ឋមន្រ្តីការពារជាតិអាស៊ាន យើងនឹងបានពិភាក្សាគ្នា ជាមួយប្រទេសជាដៃគូរ ក្នុងកិច្ចប្រជុំរដ្ឋមន្រ្តីការពារជាតិអាស៊ាន-បូក។ ឆ្លៀតក្នុងឱកាសនោះសម្តេចពិជ័យសេនា ទៀ បាញ់ ក៏បានអញ្ជើញ លោកPROBOVO SUBIANTO ដែលទើបបានទទួលមុខដំណែងជារដ្ឋមន្ត្រីការពារជាតិឥណ្ឌូនេស៊ី ទៅធ្វើទស្សនកិច្ចជាផ្លូវការនៅកម្ពុជា។
ជាចុងក្រោយ លោក PROBOVO SUBIANTO បានបញ្ជាក់ថា៖ កម្ពុជា និងឥណ្ឌូនេស៊ី មានទំនាក់ទំនងមិត្តភាពជាមួយគ្នា តាំងពីរយូរលង់ណាស់មកហើយ។ លោក រដ្ឋមន្ត្រីការពារជាតិឥណ្ឌូនេស៊ីបានបញ្ជាក់ទៀតថា៖ នឹងបន្តជួយបណ្តុះបណ្តាលដល់កងទ័ពកម្ពុជា តាមសំណើរដែលអាចធ្វើទៅបាន ៕
