នគរបាលក្រុងប៉ៃលិន បង្ក្រាបទីតាំង ហ្គេមអនឡាញ ខុសច្បាប់មួយកន្លែង ឃាត់ខ្លួនស្រ្តីម្នាក់
ខេត្តប៉ៃលិន៖ កម្លាំងការិយាល័យនគរបាលព្រហ្មទណ្ឌកម្រិតស្រាលខេត្តប៉ៃលិន ចុះបង្ក្រាបទីតាំងបើកហ្គេមអនឡាញខុសច្បាប់ ១កន្លែង និងខ្លួនបុគ្គលិកម្នាក់ កាលពីវេលាម៉ោង១៧ និង២០នាទី ថ្ងៃទី២៩ ខែវិច្ឆិកា ឆ្នាំ២០១៩ ដែលមានទីតាំងស្ថិតនៅ ភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
មន្ត្រីនគរបាលក្រុងប៉ៃលិនបានឲ្យដឹងថា ក្នុងពេលដែលសមត្ថកិច្ចចុះបង្ក្រាបទីតាំងបើកហ្គេមអនឡាញខុសច្បាប់ បាននាំខ្លួនបុគ្គលិកម្នាក់ឈ្មោះ សុខ រ៉ងរ៉ៃ ភេទស្រី អាយុ ១៧ឆ្នាំ មុខរបរ សិស្សរៀនថ្នាក់ទី៨ បច្ចុប្បន្នរស់នៅក្នុង ភូមិបរឌិននៀវ សង្កាត់ប៉ៃលិន ក្រុងប៉ៃលិន ខេត្តប៉ៃលិន មកធ្វើការសាកសួរបំភ្លឺ និងដោយមានការអនុញ្ញាតពីលោក តូច សុភក្តី ព្រះរាជអាជ្ញាអមសាលាដំបូងខេត្តប៉ៃលិន បានសម្រេចឲ្យអាណាព្យាបាលធានាត្រឡប់ទៅផ្ទះជាបណ្តោះអាសន្ន ដើម្បីបន្តនីតិវិធី ។ ចំណែកវត្ថុតាងដែលបានធ្វើការឆែកឆេរ និងដកហូតរួមមាន៖ ១-Moniter ចំនួន ៨គ្រឿង , ២-CPU ចំនួន ៣គ្រឿង , ៣-Keybord ចំនួន ៥គ្រឿង , ៤-Mouse ចំនួន ៨គ្រឿង , ៥-ម៉ាស៊ីនព្រីនធ័រ ចំនួន ១គ្រឿង , ៦-ម៉ាស៊ីនព្រីនវិក្កយបត្រ ចំនួន ១គ្រឿង , ៧-ក្រដាសវិក្កយបត្រ ចំនួន ១កេះ , ៨-ទូរដែក ចំនួន ១ , ៩-ដុំCamera ចំនួន ១គ្រឿង , ១០-ធុងដាក់វិក្កយបត្រ ចំនួន ១ , ១១-តុដាក់កុំព្យូទ័រ ចំនួន ១ , ១២-ខ្សែភ្លើង និងខ្សែNetwork មួយចំនួន , ១៣-លុយ ចំនួន ៤.៦១០.០០០រៀល។
ចំពោះវត្ថុតាងខាងលើត្រូវបានកម្លាំងរបស់ ការិយាល័យនគរបាព្រហ្មទណ្ឌកម្រិតស្រាល ធ្វើការដកហូតជាបណ្តោះអាសន្នយកមករក្សាទុកនៅស្នងការដ្ឋាននគរបាលខេត្តប៉ៃលិន ដើម្បីអនុវត្តតាមនីតិវិធី ៕