អ្វីខ្លះជាចំណុចប្រឈម សម្រាប់ស៊ីហ្គេម ឆ្នាំ២០២៣ ដែលកម្ពុជាធ្វើជាម្ចាស់ផ្ទះ?
ភ្នំពេញ៖ក្រសួងអប់រំយុវជន និង កីឡា និងគណៈកម្មាធិការជាតិអូឡាំពិកកម្ពុជាបានត្រៀមខ្លួនស្ទើរតែ១០ឆ្នាំហើយដើម្បីទទួលធ្វើ ជាម្ចាស់ផ្ទះនៃការប្រកួតកីឡាអាស៊ីអាគ្នេយ៍(SEA Games)នាឆ្នាំ២០២៣តែមកទល់ពេលនេះសហព័ន្ធខ្លះហាក់ដូចជានៅតែមិនទាន់រៀបចំខ្លួននៅឡើយ ។
ជាទូទៅសហព័ន្ធកីឡាបាល់ទាត់បានត្រៀមខ្លួនល្អជាងគេគឺទាំងកីឡាករ មន្ត្រីបច្ចេកទេស អាជ្ញាកណ្ដាល សហព័ន្ធកីឡាហែលទឹកវាយសីក៏បានប្រុងប្រៀបខ្លួនដែរ ចំពោះសហព័ន្ធអត្តពលកម្មដែលមានជាង៤០វិញ្ញាសានោះទោះបីគុណផលរបស់កីឡាករ កីឡាការិនីបង្ហាសញពីការរីកចម្រើនជាងមុនក៏ពិតមែនតែក្នុងចំណោមវិញ្ញាសាជាង៤០នោះកម្ពុជាលេងបានមិនដល់១០វិញ្ញាសាផងទេ ។
អត្តពលកម្មជាវិញ្ញាសាដែលមានមេដាយច្រើនជាងគេតែកម្ពុជាលេង បានត្រឹមតែវិញ្ញាសារត់ លោត គប់ ចោល និង វិញ្ញាសាខ្លះទៀតប៉ុណ្ណោះ ។ដូច្នេះសម្រាសប់ប្រភេទកីឡាអត្តពលកម្មកម្ពុជាខ្វះខាតទាំងទីលានសម្រាប់ប្រកួត សម្ភារៈសម្រាប់ប្រកួតដែលបញ្ហាទាំងនេះកម្ពុជាត្រូវតែដោះស្រាយដោយបន្ទាន់តែម្ដង ។
ប្រមុខកីឡាអត្តពលកម្មកម្ពុជាលោកអ៊ុក សិទ្ធិជាតិទទួលស្គាល់ថាអត្តពលកម្មកម្ពុជាពិតជានៅសល់វិញ្ញាសាច្រើនដែលមិនទាន់បានលេង ។លោកបញ្ជាក់ថាកីឡាករ កីឡាការិនីភាគច្រើនគេមិនចង់លេងវិញ្ញាសាដែលលំបាកលេង ឬ ពុំសូវមានគេលេងច្រើននៅក្នុងប្រទេស ទោះបីវិញ្ញាសានោះនៅក្រៅប្រទេសមានគេលេងច្រើនក៏ពិតមែន ។
វិញ្ញាសាជាច្រើនមិនមានអ្នកលេងដោយសារតែគ្មានសម្ភារៈហ្វឹកហាត់ ឬ សម្ភារៈសម្រាប់ប្រកួតបើមានក៏សម្ភារៈនោះមិនត្រឹមត្រូវតាមស្ដង់ដារដែរ ។សម្រាប់ប្រភេទកីឡាហែលទឹកទោះបីកន្លងមកនៅមិនទាន់ដណ្ដើមបានមេដាយក៏ពិតមែនតែប្រភេទកីឡានេះមានហេដ្ឋរចនាសម្ព័ន្ធគ្រប់គ្រាន់ ដូចជានៅពហុកីឡដ្ឋានជាតិ ពហុកីឡដ្ឋានមរតកតេជោ មជ្ឈហែលទឹកតេជោសែនខេត្តកំពង់ចាម ហាងហែលទឹកស្រុកកោះធំដែលទើបតែបញ្ចប់ការសាងសង់ មជ្ឈហែលទឹកខេត្តបាត់ដំបងដែលកំពុងតែសាងសង់ ។
ចំពោះប្រភេទកីឡាបាល់ទាត់គឺមានសាលាបាល់ទាត់បាទី ការប្ដេជ្ញាចិត្តរបស់លោកនាយឧត្តមសេនីយ៍សៅ សុខាក្នុងការធ្វើទីលានឲ្យបានគ្រប់ទាំង២៥រាជធានី ខេត្តដែលមកទល់ពេលនេះលោកកំពុងតែឈរនៅលើផ្លូវជោគជ័យដូចការប្ដេជ្ញាចិត្តរបស់លោក ។កីឡាវាយសីក៏មានទីលានអាចប្រកួតបាន ប៉េតង់ និងប្រភេទកីឡាក្នុងសាលមួយចំនួនធំមិនសូវជាខ្វាយខ្វល់ពីទីលាននោះទេ ។
លោកវ៉ាត់ ចំរើនអគ្គលេខាធិការគណៈកម្មាធិការជាតិអូឡាំពិកកម្ពុជាទទួលស្គាល់ថាធនធានមនុស្សពិតជាបញ្ហាខ្វាយខ្វល់មែនសហព័ន្ធមួយចំនួនធ្វើអ្វីៗហាក់មិន បានពេញដៃពេញជើង ។សហព័ន្ធខ្លះមិនបានបង្កើតឪ្យមានការប្រកួតណាផ្សេងក្រៅពីការប្រកួត ដោយប្រើប្រាស់ថវិការបស់ក្រសួងអប់រំយុវជន និង កីឡា ៕