សហព័ន្ធកីឡាវាយសីកម្ពុជា ពង្រីកក្លិបចំណុះ និងកីឡាករ-កីឡាការិនីពីមួយឆ្នាំទៅមួយឆ្នាំក៏កាន់តែកើនឡើង
ភ្នំពេញ៖នាព្រឹកថ្ងៃទី២៨ ខែសីហា ឆ្នាំ២០២០ លោក លី កុសល ប្រធានសហព័ន្ធកីឡាវាយសីកម្ពុជា លោក ម៉ិល កាដូ អគ្គនាយករងនៃអគ្គនាយកដ្ឋានកីឡា លោក ឯម ហៀង តំណាងឲ្យគណៈកម្មការធិការជាតិអូឡាំពិកកម្ពុជា និងតំណាងក្លិបវាយសីចំនួន៣០បានអញ្ជើញចូលរួមពីមហាសន្និបាតអាណត្តិទី៤ឆ្នាំ២០១៦-២០២០ និងបន្តអាណត្តិទី៥ ២០១៦-២០២៤នៅគណៈកម្មការធិការជាតិអូឡាំពិកកម្ពុជា។
ក្នុងឳកាសមហាសន្និបាតគណៈកម្មការប្រវតិបត្តិសម្រាបជ្រើសរើសលោក លី កុសលជាអង្គមហាសន្និបាតនេះលោកក៏បានមានប្រសាសន៍ថា យើងបានយកចិត្តទុកដាក់ពង្រីកក្លិបចំណុះកាន់តែច្រើនឡើង ហើយចំនួនកីឡាករ-កីឡាការិនីពីមួយឆ្នាំទៅមួយឆ្នាំក៏កាន់តែកើនឡើងដែរ ទាំងបរិមាណនិងគុណភាព។ ទន្ទឹមនឹងនេះបានយកចិត្តទុកដាក់បណ្តុះបណ្តាលគ្រូបង្វឹក អាជ្ញាកណ្តាល កីឡាករ ការិនី ទាំងក្នុងនិងក្រៅប្រទេស ព្រមទាំងបានទំនាក់ទំនងគ្រូវាយសីអន្តរជាតិមកជួយបង្វឹក ដល់កីឡាករកម្ពុជារយៈពេលយូរទៀតផង។ លោកបានជំរុញ និងរៀបចំការប្រកួតនានាក្នុងស្រុក ព្រមទាំងបញ្ជូនកីឡាករ-ការិនីទៅប្រកួតក្នុងតំបន់និងនៅលើឆាកអន្តរជាតិរៀងរាល់ឆ្នាំដោយទទួលបានជ័យជំនះជាបន្តបន្ទាប់ផងដែរ។
លោក ជាម សុភា អគ្គលេខាធិការស្តីទីបានមានប្រសាសន៍ថា ទិសដៅផែនការសកម្មភាពអនុវត្តបន្ត សហព័ន្ធមានគោលការណ៍កែទម្រង់យ៉ាង ស្រេចស្រាវបន្ថែមទៀត លើប្រព័ន្ធដឹកនាំជាសារវ័ន្តគ្រប់វិស័យដូចជា រៀបចំការប្រកួតពានរង្វាន់៧មករារៀងរាល់ឆ្នាំ ប្រកួតជំរើសជាតិរៀងរាល់ឆ្នាំ និង ប្រកួតពានរង្វាន់ឯកឧត្តមប្រធានសហព័ន្ធរៀងរាល់ឆ្នាំ។
បញ្ជូនកីឡាករទៅបណ្តុះបណ្តាល Asia development Team រៀបចំវគ្គបណ្តុះបណ្តាល Coach Level I ២ឆ្នាំម្តង – រៀបចំវគ្គ Shuttle Times ២ឆ្នាំម្តង ចូលរួមប្រកួតរាល់ព្រឹត្តិការណ៍ថ្នាក់តំបន់ និងអន្តរជាតិ ត្រៀមបើកវគ្គបណ្តុះបណ្តាលអាជ្ញាកណ្តាល និងចៅក្រមក្នុងស្រុក និងអន្តរជាតិ និងជ្រើសរើសអត្តពលិកវ័យក្មេងសម្រាប់បង្វឹកត្រៀមលក្ខណៈសម្បត្តិដើម្បីមេដាយនៅស៊ីហ្គេមទី៣២ ឆ្នាំ២០២៣ នៅព្រះរាជាណាចក្រកម្ពុជា៕
