ការប្រកួតកីឡា សកលវិទ្យាល័យអាស៊ាន លើកពេលទៀតហើយ
ភ្នំពេញ៖ការប្រកួតកីឡាសាកលវិទ្យាល័យអាស៊ាន(ASEAN University Games)លើកទី២០បន្ទាប់ពីលើកពេលជាច្រើនលើកមកហើយកាលបរិច្ឆេទថ្មីគ្រោងនឹងធ្វើនៅខែមិថុនាឆ្នាំ២០២១នេះត្រូវបានលើកពេលបន្តទៀតហើយ ។
លោកបឹង គឹមតោប្រធាននាយកដ្ឋានអប់រំកាយ និង កីឡាសិស្ស និស្សិតនោះបានឲ្យដឹងថាមួយរយៈពេលចុងក្រោយនេះមេរោគកូវីដ ១៩បានរាតត្បាតខ្លាំងនៅប្រទេសថៃដែលជាប្រទេសត្រូវធ្វើជាម្ចាស់ផ្ទះនៃព្រឹត្តិការណ៍នេះហេតុនេះទើបព្រឹត្តិការណ៍នេះត្រូវបានគេប្រកាសពន្យារបន្តនោះ ។
ក្នុងលិខិតមួយច្បាប់របស់លោកMOHD Rushdan MOHD Jailani ប្រធានសហព័ន្ធកីឡាសិស្ស និស្សិតអាស៊ីអាគ្នេយ៍ផ្ញើជូនឯកឧត្តមស សុខារដ្ឋលេខាធិការក្រសួងអប់រំយុវជន និងកីឡា និង ជាប្រធានសហព័ន្ធកីឡាសិស្ស និស្សិតកម្ពុជានោះបញ្ជាក់ថាការប្រកួតកីឡាសកល
ការប្រកួតកីឡាសកលវិទ្យាល័យអាស៊ីអាគ្នេយ៍នឹងត្រូវលើកទៅធ្វើនៅឆ្នាំ២០២២គឺចាប់ពីថ្ងៃទី២០ដល់៣០ឧសភា ។
សម្រាប់ព្រឹត្តិការណ៍កីឡាចំនួន៣០ប្រភេទនឹងត្រូវដាក់ឲ្យប្រកួតតែសម្រាប់កម្ពុជានឹង បញ្ជូនទៅចូលរួមប្រកួតចំនួនតែ៧ប្រភេទប៉ុណ្ណោះ។អ្វីដែលគួរឲ្យភ្ញាក់ផ្អើលនោះគឺកម្ពុជានឹងបញ្ជូនប្រភេទកីឡាបាល់ទាត់ទៅចូលរួមជាលើកដំបូង ។
កីឡាទាំង៧ប្រភេទដែលកម្ពុជានឹងបញ្ជូនទៅចូលរួមប្រកួតនោះមានប្រភេទបាល់ទាត់ ហែលទឹក អត្តពលកម្ម ប៉េតង់ ការាតេ តេក្វាន់ដូ និង ជីជីតស៊ូ ។ក្រុមកីឡាករបាល់ទាត់ដែលចូលរួមនេះគឺជាក្រុមខ្លាំងវ័យក្មេងរបស់កម្ពុជាដែលមានកីឡាករខ្លះជាបេក្ខភាពត្រៀមស៊ីហ្គេមឆ្នាំ២០២៣ ។
សូមបញ្ជាក់ថាព្រឹត្តិការណ៍នេះត្រូវបង្កើតឡើងតាំងពីឆ្នាំ១៩៨១មកម្ល៉េះហើយមកដល់ឆ្នាំ២០២០គឺជាការប្រកួតលើកទី២០តែដោយសារការរំខាននៃមេរោគកូវីដ១៩នោះទើបព្រឹត្តិការណ៍នេះត្រូវពន្យារពេលមកដល់ពាក់កណ្ដាលឆ្នាំ២០២១ ។ពេលនេះព្រឹត្តិការណ៍នេះត្រូវ
ពន្យារដល់ជិតពាក់កណ្ដាលឆ្នាំ២០២២ ។
សម្រាប់ការប្រកួតកីឡាសាកលវិទ្យាល័យអាស៊ាន(ASEAN University Games)លើកទី២០នេះធ្វើនៅខេត្តUbon Ratchathani ។
នេះជាលើកទី៥ហើយដែលប្រទេសថៃទទួលធ្វើជាម្ចាស់ផ្ទះនៃព្រឹត្តិការណ៍នេះ។លើកដំបូងគឺធ្វើនៅខេត្តឈៀងម៉ៃឆ្នាំ១៩៨១លើកទី២ធ្វើនៅទីក្រុងប៉ាតាយ៉ាឆ្នាំ១៩៨៨លើកទី៣ធ្វើនៅទីក្រុងបាងកកឆ្នាំ១៩៩៩លើកទី៤ធ្វើនៅទីក្រុងបាងកកឆ្នាំ១០១០និងលើកទី៥ឆ្នាំ២០២១ធ្វើនៅខេត្តUbon Ratchathani ៕
