ជ័យលាភី នៃការប្រកួតកីឡា វាយកូនបាល់ ជើងឯកថ្នាក់ជាតិ
ភ្នំពេញ៖ ការប្រកួតកីឡាវាយកូនបាល់ ជ្រើសរើសជើងឯកថ្នាក់ជាតិប្រចាំឆ្នាំ២០២០បានបញ្ចប់ដោយជោគជ័យ នៅល្ងាចថ្ងៃទី១០ ខែកុម្ភៈ ឆ្នាំ២០២១ នៅពហុកីឡដ្ឋានជាតិអូឡាំពិក ។
លោកជំទាវ ឧត្តមសេនីយ៍ស៊ុ សុខា នាយករងមជ្ឈមណ្ឌលកីឡាកងយោធពលខេមរភូមិន្ទ នៃក្រសួងការពារជាតិ, លោក ទេព រិទ្ធិវិទ្ធអគ្គលេខាធិការសហព័ន្ធកីឡាវាយកូនបាល់កម្ពុជាព្រមទាំងតំណាងក្រសួងអប់រំយុវជននិងកីឡាបានអញ្ជើញចូលរួមក្នុងពិធីបំពាក់មេដាយដល់ជ័យលាភី ។
លោក ជា ពៅ អគ្គលេខាធិការរង សហព័ន្ធកីឡាវាយកូនបាល់កម្ពុជាបញ្ជាក់ថា ព្រឹត្តិការណ៍កីឡាវាយកូនបាល់ជើងឯកថ្នាក់ជាតិ ដែលបានដំណើរការអស់រយៈពេល៤ថ្ងៃនេះបានបញ្ចប់ជាមួយនឹងលទ្ធផលល្អប្រសើរ។ការប្រកួតយនេះធ្វើឡើងក្រោមគម្រោងគម្រោងថវិកាគាំទ្ររបស់ក្រសួងអប់រំយុជននិងកីឡា។មន្ត្រីនិងអនុគណៈកម្មការគ្រប់ផ្នែកទាំងអស់បានបំពេញតួនាទីដោយការទទួលខុសត្រូវខ្ពស់លើ
ភារកិច្ចរបស់ខ្លួន ។
អគ្គលេខាធិការរងរូបនេះបន្ថែមថា វិញ្ញាសាដែលដាក់ឲ្យប្រកួតមានចំនួន៤ ដោយមានប្រកួតសរុបចំនួន៣៧ប្រកួត និងមានក្លិប រាជធានី-ខេត្តចូលរួមចំនួន១០ សរុបកីឡាករ ៤៤នាក់ និងកីឡាការិនី ៤នាក់។
ក្រោយពីបញ្ចប់ការប្រកួតនេះទៅ សហព័ន្ធកីឡាវាយកូនបាល់កម្ពុជាសម្រិតសម្រាំងបានកីឡាករ កីឡាការិនី ដែលមានបច្ចេកទេសខ្ពស់ ប្រកបដោយទេពកោសល្យ និងសមត្ថភាព ដែលអាចទៅចូលរួមការប្រកួតប្រជែង លើឆាកអន្តរជាតិ ជាពិសសេគឺការប្រកួតប្រជែង ស៊ីហ្គេម លើកទី៣១ នាខែវិច្ឆិកា-ធ្នូ ឆ្នាំ២០២១ នៅប្រទេសវៀតណាម។
ជ័យលាភីទាំង៤វិញ្ញាសានេះរួមមាន៖ វិញ្ញាសាវាយឯកត្តជននារី លេខ១មេដាយមាស កីឡាការិនី ញែម ស្រីណុច ខេត្តសៀមរាប, វាយឯកត្តជនអាយុក្រោម១៨ឆ្នាំ មេដាយមាស ឡេង សារិនរាជ ក្លិបក្រសួងសេដ្ឋកិច្ច និងហិរញ្ញវត្ថុ, វាយគូបុរស មេដាយមាស កីឡាករ ប៊ុន កេន្នី និងកីឡាកីឡាករ ទេព ទីម៉ូធី ក្លិបឌីវេនខូ និងវិញ្ញាសាវាយឯកត្តជន បុរសម្នាក់ទល់ម្នាក់ មេដាយមាស កីឡាករ ប៊ុន កេន្នី ក្លិបឌីវេនខូ។ ក្រៅពីមេដាយមាសក៏មានជ័យលាភីមេដាយប្រាក់និងសំរឹទ្ធលើវិញ្ញាសាទាំង៤នេះដូចៗគ្នាដែលក្នុងនោះក្រសួងការពារជាតិឈ្នះមេដាយមាស២វិញ្ញាសា និងមេដាយសំរឹទ្ធ២វិញ្ញាសា៕