ឯកឧត្តម វ៉ាត់ ចំរើន ទទួលការចាក់វ៉ាក់សាំងទប់ស្កាត់ជំងឺកូវីដ-១៩រួចហើយ
CAMSOC-ភ្នំពេញ៖ ឯកឧត្តម វ៉ាត់ ចំរើន រដ្ឋលេខាធិការ ក្រសួងទេសចរណ៍ និងជាអគ្គលេខាធិការគណៈកម្មាធិការជាតិអូឡាំពិកកម្ពុជាបានទទួលការចាក់វ៉ាក់សាំងទប់ស្កាត់ជំងឺកូវីដ-១៩ លើកទី១ រួចហើយនៅថ្ងៃទី១១ ខែកុម្ភៈ ឆ្នាំ២០២១នេះ ដើម្បីបង្ហាញពីភាពជឿជាក់ និងជាគំរូសម្រាប់កីឡាករ កីឡាការិនីជម្រើសជាតិកម្ពុជា ក្នុងការហ្វឹកហាត់ត្រៀមចូលរួមប្រកួតប្រជែងមេដាយ ក្នុងស៊ីហ្គេម លើកទី៣១ នាខែវិច្ឆិកា-ធ្នូ ឆ្នាំ២០២១ នៅប្រទេសវៀតណាម។
ឯកឧត្តម វ៉ាត់ ចំរើន បានអះអាងយ៉ាងដូច្នេះថា «ខ្ញុំបានចូលរួមទប់ស្កាត់ជំងឺ COVID-19 រួចរាល់លើកទី១ ហើយរង់ចាំ១៤ថ្ងៃទៀត ទើបចាក់បង្គ្រប់លើកទី២។ មុនពេលចាក់វ៉ាក់សាំងនេះ គឺមានការពិគ្រោះយោបល់លើបញ្ហាសុខភាពពីក្រុមគ្រូពេទ្យជំនាញ ទើបអនុញ្ញាឲ្យចាក់។ ចំពោះសេវាទទួលចាក់វ៉ាក់សាំងមានភាពល្អប្រពៃណាស់ សមរម្យ កក់ក្តៅ និងចាក់លឿនមិនឈឺ មិនដឹងថាចាក់ ប្រើពេលត្រឹមតែ ៤ឬ៥វិនាទីតែប៉ុណ្ណោះ។ សូមត្រៀមលក្ខណៈឲ្យ កីឡាករ កីឡាការិនី គ្រូបង្វឹកក្រុមជម្រើសជាតិ ត្រៀមចូលរួមចាក់ទាំងអស់គ្នា តាមការស្មគ្រ័ចិត្ត។ ប៉ុន្តែបើយកល្អពេទ្យពិនិត្យ ឬដឹងខ្លួនថាចាក់បាន គួរតែចាក់ឲ្យហើយ សម្រាប់កីឡាករ គ្រូបង្វឹក ត្រៀមការហ្វឹកហាត់ ការប្រកួត ក្រៅប្រទេស ឆ្នាំ២០២១ ជាពិសេសគឺត្រូវចូលរួមប្រកួត ស៊ីហ្គេម នៅប្រទេស វៀតណាម ចុងឆ្នាំ២០២១នេះ។ វេលាត្រូវចាក់ ខ្ញុំនឹងជម្រាប់ជូនឆាប់ៗខាងមុខនេះ។ សូមអរគុណ និងក្តីមោទនសុខភាពសាធារណៈជាតិខ្ពស់»៕