បង្ក្រាបជនសង្ស័យ ៣នាក់ ព្រួតគ្នាវាយយុវជន២នាក់ កំពុងអូសម៉ូតូរកកន្លែងប៉ះកង់ បណ្ដាលឲ្យបាត់បង់ជីវិតម្នាក់
ភ្នំពេញ ៖ ក្រោមការបញ្ជាផ្ទាល់ពីឯកឧត្តម ឧត្ដមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានី លោកវរសេនីយ៍ឯក ម៉ន វុធី អធិការនៃអធិការដ្ឋាននគរបាលខណ្ឌពោធិ៍សែនជ័យ បានដឹកនាំកងកម្លាំងដោយផ្ទាល់ចុះបង្ក្រាបជនសង្ស័យចំនួន៣នាក់ ក្រោយពីបានព្រួតគ្នាវាយទៅលើយុវជន២នាក់ កំពុងអូសម៉ូតូរកកន្លែងប៉ះកង់ បណ្ដាលឲ្យបាត់បង់ជីវិតម្នាក់។
ករណីឃា.ត.កម្មខាងលើនោះ បានកើតឡើងកាលពីវេលាម៉ោង ៦និង២០នាទីល្ងាចថ្ងៃទី៥ ខែកញ្ញា ឆ្នាំ២០២១ នៅភូមិចែងម៉ែង សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
សាកសពជនរងគ្រោះដែលត្រូវវា.យស.ម្លាប់.នោះមានឈ្មោះ សួន ឃាង អាយុ១៧ឆ្នាំ មុខរបរបុគ្គលិកហាង ស្នាក់នៅផ្ទះជួលក្នុងភូមិចំការឪឡឹក២ សង្កាត់កាកាបទី២ ខណ្ឌពោធិ៍សែនជ័យ។ ចំណែកម្នាក់ទៀត មានសំណាងរត់រួចឈ្មោះ ហម ទ្រួស អាយុ១៧ឆ្នាំ មុខរបរកម្មកររោងចក្រ មានស្រុកកំណើតនៅភូមិជម្រៅ ឃុំកំពង់សឹង្ហ ស្រុកព្រះស្តេច ខេត្តព្រៃវែង (ពុំមានរងរបួសឡើយ)។ ដោយឡែកក្រុមជនដៃដល់ មានគ្នាចំនួន ៣នាក់ ក្នុងនោះរួមមាន ១) ឈ្មោះវុទ្ធី សុីលន អាយុ១៧ឆ្នាំ មានទីលំនៅក្នុងភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ។ ២) ឈ្មោះជេត វីយូ អាយុ១៧ឆ្នាំ។ ៣) ឈ្មោះធឿន សុខលីន អាយុ២០ឆ្នាំ មានទីលំនៅភូមិកើតហេតុខាងលើ ។
តាមការបំភ្លឺរបស់ជនរងគ្រោះឈ្មោះ ហម ទ្រួស បានឲ្យដឹងថា នៅមុនពេលកើតហេតុខ្លួន (ជនរងគ្រោះទាំង២នាក់) បាននាំគ្នាជិះម៉ូតូចេញពីផ្ទះជួល នៅភូមិចំការឪឡឹកទៅរកទិញអីហូប។ លុះទៅដល់ត្រង់ចំណុចកើតហេតុ ម៉ូតូបែកកង់ទៅមុខលែងរួច។ ពេលនោះ ក៏បាននាំគ្នាបណ្ដើរម៉ូតូដេីម្បីរកកន្លែងប៉ះកង់ជិះបន្តទៀត។ ប៉ុន្តែកំពុងអូសម៉ូតូដើរសុខៗ ស្រាប់តែលេចមុខក្រុមជនដៃដល់ កាន់ដំបងឈើមូលទៅដល់ ដេញមកវា.យជនរងគ្រោះទាំង២នាក់ ។ ខណៈនោះខ្លួន (ជនរងគ្រោះឈ្មោះ ហម ទ្រួស) ក៏លោតចូលទៅក្នុងទឹក និងរត់រួច រីឯជនរងគ្រោះឈ្មោះសួន ឃាង រត់អត់ទាន់ ក៏ត្រូវជនដៃដល់វា.យចំកញ្ចឹងក និងក្បាលរបួសធ្ងន់ធ្ងរ បន្ទាប់មកជនដៃដល់ រត់គេចខ្លួនបាត់។ ក្រោយពេលកើតហេតុ គេបានបញ្ជូនជនរងគ្រោះ ទៅសង្រ្គោះបន្ទាន់ តែដោយសារតែរបួសធ្ងន់ពេក ក៏បានស្លា.ប់នៅតាមផ្លូវ។
បន្ទាប់មកបងស្រីជនរងគ្រោះ បានទៅដាក់ពាក្យប្ដឹង សុំឲ្យនគរបាលជួយអន្តរាគមន៍ ភ្លាមៗនោះកម្លាំងនគរបាល ខណ្ឌពោធិ៍សែនជ័យ ដឹកនាំដោយលោកវរសេនីយឯក ម៉ន វុធី អធិការនគរបាលខណ្ឌ ។ ក្រោមការចង្អុលបង្ហាញ ដោយឯកឧត្តម ឧត្តមសេនីយឯកស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានបើកការស្រាវជ្រាវ ហើយដល់ថ្ងៃទី៦ ខែកញ្ញា ឆ្នាំ២០២១ ឈានដល់ការឃាត់ខ្លួន បានចំនួន៣នាក់ នាំយកទៅសាកសួរ និងកសាងសំណុំរឿងចាត់ការតាមច្បាប់៕
