ឧត្តមសេនីយ៍ឯក ឆាយ គឹមខឿនដឹកនាំកិច្ចប្រជុំជាមួយស្នងការ នគរបាលខេត្តចំនួន០៧ អំពីបញ្ហានៃការខ្វះកងកម្លាំងមានសមត្ថកិច្ចការពារការិយាល័យបោះឆ្នោត
រាជធានីភ្នំពេញ ៖ នាព្រឹកថ្ងៃទី២៨ ខែកញ្ញា ឆ្នាំ២០២១ ឯកឧត្តម ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានអញ្ជើញដឹកនាំកិច្ចប្រជុំជាមួយស្នងការ នៃស្នងការដ្ឋាននគរបាលខេត្តចំនួន ០៧ រួមមាន ÷ខេត្តបាត់ដំបង កំពង់ស្ពឺ ព្រះវិហារ ព្រៃវែង តាកែវ កំពង់ធំ និងខេត្តត្បូងឃ្មុំ។
កិច្ចប្រជុំនេះ ត្រូវបានប្រព្រឹត្តទៅពីចម្ងាយតាមរយៈប្រព័ន្ធបច្ចេកវិទ្យាព័ត៌មាន និងមានការចូលរួមពីថ្នាក់ដឹកនាំ នៃនាយកដ្ឋានសរុប-ផែនការ និងស្នងការ នៃស្នងការដ្ឋាននគរបាលខេត្តទាំង ០៧ សរុបសមាសភាពចូលរួមចំនួន ២៧នាក់។
ក្នុងកិច្ចប្រជុំនេះ បានពិភាក្សា និងប្រមូលធាតុចូលអំពីបញ្ហានៃការខ្វះកងកម្លាំងមានសមត្ថកិច្ចការពារការិយាល័យបោះឆ្នោត ជ្រើសរើសក្រុមប្រឹក្សាឃុំ-សង្កាត់ដែលនឹងប្រព្រឹត្តទៅ នាឆ្នាំ២០២២ ខាងមុខនេះ។
ឯកឧត្តម ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិបានបញ្ជាក់ឲ្យដឹងថា បន្ទាប់ពីបានស្ដាប់សេចក្តីរាយការណ៍ និងសំណូមពីស្នងការ នៃស្នងការដ្ឋាននគរបាលខេត្តចំនួន០៧ខាងលើ ឯកឧត្តម ទទួលបានធាតុចូលគ្រប់គ្រាន់ដើម្បីជាមូលដ្ឋានបូកសរុបគោរពស្នើសុំគោលការណ៍ និងអនុសាសន៍ដឹកនាំពី ឯកឧត្តម នាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិ៕
