ក្រុមបាល់ទាត់យុវជន អាយុក្រោម២៣ឆ្នាំកម្ពុជា ទៅដល់ជប៉ុន ដើម្បីចូលរួមប្រកួតជម្រុះ AFC U23 Asian Cup 2022

ភ្នំពេញ៖ ក្រុមបាល់ទាត់ជម្រើសជាតិអាយុក្រោម ២៣ឆ្នាំកម្ពុជាដែលត្រូវចូលរួម ប្រកួតជម្រុះពានរង្វាន់ AFC U23 Asian Cup Uzbekistan 2022 Qualifiers ពូល K នោះបានទៅដល់ប្រទេសជប៉ុន ដែលជាកន្លែងត្រូវប្រកួតជម្រុះនៅទីនោះ ។
ក្រុមជម្រើសជាតិ U-23 កម្ពុជា បានបន្ដដំណើរទៅប្រទេសជប៉ុន កាលពីល្ងាចថ្ងៃព្រហស្បតិ៍សប្ដាហ៍កន្លងទៅ ក្រោយបញ្ចប់បេសកកម្មជាមួយ ក្រុមជម្រើសជាតិកម្ពុជា (ក្រុមធំ) ក្នុងការប្រកួតជម្រុះ AFC Asian Cup China 2023 នៅប្រទេសបារ៉ែន កាលពីថ្មីៗ ដោយបានយកឈ្នះក្រុមកោះហ្គាំរបស់សហរដ្ឋអាមេរិកទាំង ២ជើង ក្នុងលទ្ធផល ៣-១ ដើម្បីឡើងទៅវគ្គជម្រុះជុំទី៣។

បន្ទាប់ពីបញ្ចប់បេសកកម្មខាងលើ កីឡាករភាគច្រើនដែលមានអាយុក្រោម២៣ឆ្នាំ ត្រូវបន្ដបេសកកម្មថ្មីនៅប្រទេសជប៉ុន។ រីឯកីឡាករជម្រើសជាតិកម្ពុជា ១០នាក់ ត្រូវធ្វើដំណើរត្រឡប់មកមាតុភូមិមុន លើកលែងកីឡាករជម្រើសជាតិ ៦រូប ដែលឆ្លងជំងឺកូវីដ-១៩ អំឡុងពេលជួយក្រុមគោព្រៃកម្ពុជា នៅបារ៉ែន ដែលត្រូវបន្ដសម្រាកព្យាបាលនៅទីនោះ រហូតដល់ជាសះស្បើយ ទើបត្រឡប់មកមាតុភូមិវិញ។

សម្រាប់បេក្ខភាពពូល K នៃពានរង្វាន់យុវជន U-23 ជើងឯកទ្វីបអាស៊ីនេះ មាន៣ក្រុម រួមមាន កម្ពុជា ហុងកុង និងម្ចាស់ផ្ទះជប៉ុន។ ចំពោះកម្មវិធីប្រកួត ក្រុមគោព្រៃជំទង់កម្ពុជា នឹងត្រូវជួប U-23 ហុងកុង នាថ្ងៃទី២៣-តុលា មុនជួបក្រុមម្ចាស់ផ្ទះ U-23 ជប៉ុន នាថ្ងៃទី២៦-តុលា នៅកីឡដ្ឋាន J-Village ខេត្ត Fukushima ។

សង្ឃឹមថាក្រុមជម្រើសជាតិ U-23 កម្ពុជា ជួបតែសំណាងល្អ និងទទួលបានជោគជ័យក្នុងការប្រកួតជម្រុះពានរង្វាន់ AFC U23 Asian Cup Uzbekistan 2022 Qualifiers ដើម្បីឡើងទៅវគ្គបន្ដ ហើយក៏សូមជូនពរកីឡាករ ៦រូប រួមមាន ចាន់ វឌ្ឍនាកា, គួច សុកុម្ភៈ, សឿយ វិសាល, សារ៉េត គ្រីយ៉ា, កែវ សុខសិលា និង អ៊ាន ពិសី ដែលកំពុងសម្រាកព្យាបាលនៅប្រទេសបារ៉ែន ឆាប់ជាសះស្បើយ និងត្រឡប់មកកម្ពុជាវិញផងដែរ៕