ក្រុមគ្រូពេទ្យចាក់ដូសទី ៥ នៅមន្ទីរពេទ្យព្រះកេតុមាលា
ភ្នំពេញ៖ ថ្ងៃទី៩ ខែមិថុនា ឆ្នាំ២០២២ គឺជាថ្ងៃទី២ ដែលមន្ទីពេទ្យព្រះកេតុមាលា ទទួលបទបញ្ជា ពីសម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ត្រូវទទួលរ៉ាប់រងការចាក់វ៉ាក់ការពារជំងឺកូវីដ-១៩ ដូសទី៥ ជូនកងយោធពលខេមរភូមិន្ទ និងប្រជាពលរដ្ឋប្រជាពលរដ្ឋទូទៅ ដែលមកទទួលវ៉ាក់សាំង តបតាមសេចក្តីប្រកាសជូនដំណឹង របស់ក្រសួងសុខាភិបាល ក៏ដូចជាការលើកឡើង ពី សម្ដេចតេជោ ហ៊ុន សែន ដែលជារឿយៗ សម្តេចលោកបានអំពាវនាវ ដល់កងកម្លាំង និងប្រជាពលរដ្ឋ ចូលមកទទួលវ៉ាក់សាំង ឱ្យបានទៀងទាត់ពេលវេលា និងគ្រប់ៗគ្នា នៅគ្រប់ទីកន្លែង ដែលមានក្រុមគ្រូពេទ្យចាក់វ៉ាក់សាំងនេះ រួសរាន់ ដើម្បីជៀសចាកឆ្ងាយពីរោគកូវីដ-១៩។
ក្នុងផែនការចាក់វ៉ាក់សាំងកូវីត-១៩ ដូសទី ៥ ផែនការក្រសួងការពារជាតិ ចាក់ជូនកងទ័ព និងគ្រួសារ កីឡាករ អតីតយុទ្ធជន សរុបប្រមាណ ១១.៣០៩ នាក់។ ដោយមានការចង្អុលបង្ហាញផ្ទាល់ ពីសំណាក់ ឧត្តមសេនីយ៍ឯក វេជ្ជបណ្ឌិត លី សុវណ្ណ អគ្គនាយករង អគ្គនាយកដ្ឋាន ភស្តុភារ-ហិរញ្ញវត្ថុ ក្រសួងការពារជាតិ នាយកមន្ទីរពេទ្យព្រះកេតុមាលា ឧត្តមសេនីយ៍ត្រី វេជ្ជបណ្ឌិត សេង ឈុន នាយករងមន្ទីពេទ្យព្រះកេតុមាលា និងជាប្រធានទទួលបន្ទុកចាក់វ៉ាក់ សាំងកូវីដ-១៩ របស់មន្ទីរពេទ្យព្រះកេតុមាលាបញ្ជាក់បា្រប់ក្រុមព័ត៌មានថា៖ អនុវត្តតាមបទបញ្ជា របស់ប្រមុខការពារជាតិ ក៏ដូចជានាយកមន្ទីរពេទ្យ ក្រុមគ្រូពេទ្យនៃមន្ទីរពេទ្យព្រះកេតុ មាលា ដែលមានបទពិសោធន៍ និងសមត្ថភាពគ្រប់គ្រាន់ ទទួលភារកិច្ច ចាក់វ៉ាក់សាំងដូសទី ៥ ជូនដល់កងកម្លាំង និងប្រជាជន តាមផែនការ ដូចដែលបានគ្រោងទុក នឹងចាក់ជូនរហូតដល់អស់ អ្នកមកទទួលការចាក់វ៉ាក់សាំងដោយមិនមានកំណត់រយៈពេល ។
ជាក់ស្ដែងក្នុងរយះ ២ ថ្ងៃកន្លងនឹងចូលដល់ថ្ងៃទី ៨ខែ មិថុនា ឆ្នាំ ២០២២ សកម្មភាពកងកម្លាំងនិងប្រជា ពលរដ្ឋមកទទួលដូសទី ៥ មមាញឹក ជាបន្តបន្ទាប់តាំងពីព្រឹករហូត ដល់រសៀលក្រោមទឹកមុខរីករាយ និងភារកិច្ចរបស់ខ្លួន ជាក្រុមគ្រូពេទ្យ ។ ក្នុងនោះផងដែរ មន្ទីរពេទ្យព្រះកេ តុមាលា ក៏មាន ការចាក់ជូនដូសទី ១ ទី ២ ទី ៣ ទី ៤ ជូនកងកម្លាំង និងប្រជាពលរដ្ឋ ដែលកន្លងមកពុំទាន់ទទួលបានវ៉ាក់សាំងទាំងនេះ ដើម្បីប្រយុទ្ធប្រឆាំងជំងឺកូវីដ-១៩ ពិសេសពពួកបំប្លែងខ្លួនថ្មី “អូមីក្រុង”។ លោកឧត្តមសេនីយ៍ វេជ្ជបណ្ឌិត សេង ឈុន សង្ឃឹមនិងជឿជាក់លើកងកម្លាំង ក៏ដូចជាប្រជាពលរដ្ឋ និងរួសរាន់ស្ម័គ្រចិត្តមកទទួល ការចាក់វ៉ាក់សាំងទាំងលើកទី ១ រហូតដល់ទី ៥ តាមការកំណត់របស់ក្រុមគ្រូពេទ្យ ដើម្បីសុវត្ថិភាព និងសេចក្តីសុខក្នុងក្រុមគ្រួសារ សង្គមជាតិ ចាកជៀសឆ្ងាយផុតពីជំងឺកូវីដ-១៩ នេះផងដែរ ៕ សំរិត
