កម្ពុជា និង វៀតណាម រៀបចំកិច្ចប្រជុំពិភាក្សាកំណត់ទីតាំងតភ្ជាប់ ផ្លូវល្បឿនលឿនភ្នំពេញ-បាវិត ជាមួយនឹង ផ្លូវល្បឿនលឿនហូជីមិញ-ម៉ុកបៃ

ភ្នំពេញ ៖ ឯកឧត្តម សូរ វ៉ិចទ័រ រដ្ឋលេខាធិការ ក្រសួងសាធារណការ និងដឹកជញ្ជូន នៃព្រះរាជាណាចក្រកម្ពុជា រួមជាមួយ ឯកឧត្តម Le Anh Tuan អនុរដ្ឋមន្រ្តីក្រសួងដឹកជញ្ជូន នៃសាធារណរដ្ឋសង្គមនិយមវៀតណាម បានអញ្ជើញដឹកនាំកិច្ចប្រជុំស្តីពីការកំណត់ទីតាំងតភ្ជាប់ ផ្លូវល្បឿនលឿនភ្នំពេញ-បាវិត របស់កម្ពុជា ជាមួយនឹងផ្លូវល្បឿនលឿនហូជីមិញ-ម៉ុកបៃ របស់វៀតណាម ។

កិច្ចប្រជុំបានប្រព្រឹត្តទៅនៅទីក្រុងហូជីមិញ ប្រទេសវៀតណាម នាថ្ងៃទី២៦ ដល់ថ្ងៃទី២៧ ខែតុលា ឆ្នាំ២០២៣ ដោយមានការចូលរួមពីសំណាក់ មន្រ្តីជាន់ខ្ពស់នៃក្រសួង ស្ថាប័ន និងរដ្ឋបាលខេត្តពាក់ព័ន្ធ របស់ភាគីទាំងសងខាង ព្រមទាំងសម្រេចបានលទ្ធផលប្រកបដោយផ្លែផ្កា។ ក្នុងនោះភាគីទាំងពីរបានឯកភាព ពន្លឿនការអនុវត្តគម្រោង និងការងារពាក់ព័ន្ធដើម្បីជាប្រយោជន៍រួម ទាំងផ្នែកសេដ្ឋកិច្ច និងសង្គម។ សូមជម្រាបដែរថា នេះជាកិច្ចប្រជុំលើកទី២ បន្ទាប់ពីកិច្ចប្រជុំកម្រិតបច្ចេកទេសលើកទី១ នៅខេត្តតៃនីញ៕