អភិបាលខណ្ឌចំការមន ចាត់ក្រុមការងារចុះបាញ់ថ្នាំសម្លាប់មូសតាមសាលារៀន សំរាប់ការប្រឡងសញ្ញាបត្រមធ្យមសិក្សាទុតិយភូមិ នាពេលខាងមុខ
ភ្នំពេញ ៖ ថ្ងៃចន្ទ ១រោច ខែអស្សុជ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី៣០ ខែតុលា ឆ្នាំ២០២៣ លោក កៀង ល័ក្ស អភិបាល នៃគណៈអភិបាលខណ្ឌចំការមន បានចាត់ក្រុមការងារខណ្ឌ ដោយសហការជាមួយក្រុមការងារសង្កាត់ ចុះបាញ់ថ្នាំសម្លាប់មូស ក្នុងបរិវេណសាលារៀនចំនួន ០៣ រួមមាន៖ វិទ្យាល័យបឹងត្របែក, វិទ្យាល័យផ្សារដើមថ្កូវ និងវិទ្យាល័យទួលទំពូង ក្នុងមូលដ្ឋានខណ្ឌចំការមន រាជធានីភ្នំពេញ ។
ការចុះបាញ់ថ្នាំមូសនេះ ក៏មានការចូលរួមពីលោកគ្រូ-អ្នកគ្រូ, លោកមេភូមិ-អនុភូមិ, កម្លាំងសណ្ដាប់ធ្នាប់ខណ្ឌ, កម្លាំងប្រជាការពារសង្កាត់ និងអ្នកបាញ់ថ្នាំផងដែរ ។
ក្រោយពីក្រុមការងារចុះទៅបាញ់ថ្នាំសម្លាប់មូស នាយកវិទ្យាល័យ, លោកគ្រូ-អ្នកគ្រូ, សិស្សានុសិស្ស បានថ្លែងអំណរគុណយ៉ាងជ្រាលជ្រៅដល់រដ្ឋបាលខណ្ឌចំការមន ដែលបានគិតគូរពីសុខភាពរបស់បេក្ខជនត្រូវចូលរួមប្រឡងសញ្ញាបត្រមធ្យមសិក្សាទុតិយភូមិ នៅតាមមណ្ឌលប្រឡងទាំងអស់ ក្នុងខណ្ឌចំការមន ។
ជាមួយគ្នានោះ អភិបាលខណ្ឌចំការមនសន្យាបន្តដោះស្រាយបញ្ហាបរិស្ថាន អនាម័យ ជូនពលរដ្ឋក្នុងមូលដ្ឋានថែមទៀត ពាក់ព័ន្ធនិងបញ្ហាផ្សេងៗ រួមមានបរិស្ថាន អនាម័យ សន្តិសុខ សណ្តាប់ធ្នាប់ ដើម្បីធានាបាននូវសុវត្ថិភាពជូនប្រជាពលរដ្ឋនៅក្នុងមូលដ្ឋានខណ្ឌ៕
