ប្រជាកសិករ ៣២៤គ្រួសារ២ ស្រុក ក្នុងខេត្ដកំពង់ចាម មកទទួលស្រូវពូជជាង ៣០តោនពីសម្ដេចមហាបវរធិបតី ហ៊ុន ម៉ាណែត
កំពង់ចាម៖ ស្រូវពូជ ប្រមាណជាង ៣០តោនដែលជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ត្រូវយកមកផ្តល់ជូនប្រជាកសិករ ចំនួន៣២៤គ្រួសារនៅស្រុកស្ទឹងត្រង់ និងស្រុកជេីងព្រៃ ។
ពិធីផ្តល់ជូនត្រូវបានធ្វើក្នុងសាលាស្រុក ស្ទឹងត្រង់ខេត្តកំពង់ចាម នាព្រឹកអង្គារ ១រោចខែអស្សុជឆ្នាំថោះបញ្ចស័កព.ស២៥៦៧ត្រូវនឹងថ្ងៃទី៣១ ខែតុលា ឆ្នាំ២០២៣ក្រោយអធិបតីភាពរបស់ ឯកឧត្តម អ៊ុន ចាន់ដា អភិបាលខេត្តកំពង់ចាមនិង ឯកឧត្តម អ៊ុង សំអាត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ
ថ្លែង ក្នុងឱកាសនោះ លោក អ៊ុន ចាន់ដា អភិបាលខេត្តកំពង់ចាម បានថ្លែងអំណរគុណយ៉ាងជ្រាលជ្រៅចំពោះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជានិងលោកជំទាវ ក៏ដូចជាគណៈកម្មាធិការជាតិគ្រប់គ្រងគ្រោះមហន្តរាយ និងក្រសួងកសិកម្ម រុក្ខាប្រមាញ់ និងនេសាទ ដែលបានសម្រេចផ្តល់នូវពូជស្រូវជាប្រព័ន្ធស្បៀងបំរុង កម្ពុជាចំនួន ៣២.៧០០គីឡូក្រាមនេះ ជូនដល់បងប្អូនប្រជាកសិករទាំង៣២៤ក្នុងស្រុក ស្ទឹងត្រែងនិងស្រុកជើងព្រៃដើម្បីផ្តល់លទ្ធភាពឲ្យពួកគាត់បានដាំដុះស្តារឡើងវិញ បន្ទាប់ពីរងគ្រោះដោយជំនន់ទឹកភ្លៀងនាពេលកន្លងមក។
លោក អ៊ុង សំអាត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានណែនាំដល់ មន្ទីរកសិកម្មរុក្ខាប្រមាញ់និងនេសាទខេត្តត្រូវបញ្ចុះនូវមន្ត្រីជំនាញនៃមន្ទីរកសិកម្ម ត្រូវចុះទៅដល់ទីតាំងដោយផ្ទាល់ ដេីម្បីស្វែងយល់ និងរៀនសូត្រពីអ្វីដែលកសិករកំពុងតែអនុវត្ត ពិសេស ផ្សព្វផ្សាយរាល់បច្ចេកទេសកសិកម្មជូនដល់ពួកគាត់នេះជារឿងសំខាន់បំផុត ក្នុងការជួយដល់កសិករឱ្យទទួលបានទិន្នផលខ្ពស់ ។
លោក អ៊ុង សំអាត ក៏បានបញ្ជាក់ថា ក្រសួងកសិកម្មសំរិតសម្រាងពូជ គឺពូជស្រូវ OM5451 ជាពូជដែលមិនប្រកាន់ចំពោះរដូវកាលទេ ហើយរយៈពេលនៃការប្រមូលផលគឺ ៩០ទៅ៩៥ថ្ងៃ នេះជារយៈពេលខ្លី ដែលអាចទទួលបានទិន្នផលខ្ពស់ ដូច្នេះនៅពេលដែលបងប្អូនទទួលបានពូជស្រូវនេះហើយ សូមយកទៅធ្វើការដាំដុះឱ្យបានទាន់ពេលវេលា ដើម្បីស្តារជីវភាពគ្រួសារឡើងវិញផងដែរ ។
សូមបញ្ជាក់ថាប្រជាកសិករទាំង ៣២៤គ្រួសារ ក្នុង ១គ្រួសារទទួលបានពូជស្រូវ ១០០គីឡូក្រាមនិងថវិកា ២ម៉ឺនរៀល ដែល ក្នុងនោះប្រជាពលរដ្ឋ ក្នុងឃុំព្រែកក់ ស្រុកស្ទឹងត្រង់ មានចំនួន ២៨៧គ្រួសារ និងប្រជាពលរដ្ឋ នៅឃុំសំពងជ័យ ស្រុកជើងព្រៃ មានចំនួន ៣៧គ្រួសារ៕ សំរិត
