ប្រភពព័ត៌មានទាន់ហេតុការណ៍ក្រុងភ្នំពេញ

គណៈកម្មការផ្សារអូរឬស្សីបន្តរៀបចំសណ្តាប់ធ្នាប់ សំអាតបរិស្ថាននិងសហការជាមួយវិទ្យាស្ថានប៉ាស្ទ័រ និងបសុពេទ្យចុះពិនិត្យសត្វ មាន់ ទាស្វែងរកជម្ងឺផ្តាសាយបក្សី

127

ភ្នំពេញ៖ គណៈកម្មការផ្សារអូរឬស្សីនៅតែបន្តរៀបចំសណ្តាប់ធ្នាប់ សំអាតបរិស្ថាននិងសហការជាមួយវិទ្យាស្ថានប៉ាស្ទ័រ និងបសុពេទ្យប្រចាំខណ្ឌ៧មករា ដឹកនាំដោយលោកស្រី គែប ច័ន្ទសោភា ចុះពិនិត្យ មាន់ចំនួន១០ក្បាល ទាចំនួន១០ក្បាល ទឹកលាងមាន់ ទា ដើម្បីរកមើលជម្ងឺមេរោគផ្តាសាយបក្សី H5 . H7 . H9 ។

  មន្ត្រីនៅក្នុងជួរគណៈកម្មការផ្សារអូរឬស្សីបានអោយដឹងថា កាលពីថ្ងៃសៅរ៍ ទី១៦ ខែមិនា ឆ្នាំ២០១៩ អាជីវករបើកតូបលក់ដូរ និងអតិថិជនចេញចូលផ្សារជាធម្មតា។តែពួកគាត់មិនសូវសប្បាយចិត្តគឺមកពីបញ្ហាទឹកចេញខ្សោយ ភ្លើងដាច់ញឹកញាប់នៅតាមគេហដ្ឋានរបស់ពួកគាត់។

   ការងារសន្តិសុខ-សុវត្ថិភាព គណៈកម្មការផ្សារអូរឬស្សីបាន បន្តពង្រឹងការងារសន្តិសុខតាមគោលដៅ ល្បាតចល័តការពារសុវត្ថិភាពជាប្រចាំ ទាំងវេនថ្ងៃ និងវេនយប់។ចំណែកការងារភាស៊ី បានបន្តពង្រឹង និងណែនាំម្ចាស់អាជីវកម្មភាសុីផ្ញើកង់ម៉ូតូឲ្យដាក់តាមការកំណត់ដែលគណៈកម្មការផ្សារបានកំណត់ឲ្យ និងយកតម្លៃតាមសៀវភៅបន្ទុករបស់ក្រសួងសេដ្ឋកិច្ចនិងហិរញវត្ថុ។

  ចំពោះ ការងារសណ្ដាប់ធ្នាប់ គណៈកម្មការផ្សារ ដឹកនាំកម្លាំងចុះរៀបចំសណ្ដាប់ធ្នាប់តាមតូបខាងក្នុងនិងខាងក្រៅ ជុំវិញបរិវេណផ្សារ ហើយបានណែនាំឲ្យអាជីវករដាក់តាំងទំនិញលក់ដូរតាមការកំណត់របស់គណៈកម្មការផ្សារ និងបានណែនាំឲ្យប្រុងប្រយ័ត្នពីបញ្ហាភ្លើងផ្សែង បញ្ហាចាក់សោតូប ត្រូវវេចខ្ចប់ទុកដាក់សម្រាមឲ្យបានត្រឹមត្រូវ។

  ចាប់ពីវេលាម៉ោង៨.៣០នាទីព្រឹក រហូតដល់ម៉ោង១៩.៣០នាទីយប់ ប្រធានគណៈកម្មការផ្សារ បន្តដឹកនាំកម្លាំងចូលរួមសហការជាមួយគណបញ្ជាការឯកភាពខណ្ឌ៧មករា ដឹកនាំដោយលោក គ្រួច សុធន នាយករងរដ្ឋបាលខណ្ឌ៧មករា តំណាងលោក លីម សុភា អភិបាលនៃគណៈអភិបាលខណ្ឌ៧មករា បន្តចុះរៀបចំសណ្តាប់ធ្នាប់នៅផ្លូវលេខ ១៣៩ . ១៦៦ និងបន្តធ្វើការអប់រំណែនាំដល់អ្នកលក់ទាំងអស់ដែលយកចិញ្ចើមផ្លូវធ្វើអាជីវកម្ម ឲ្យអនុវត្តតាមការណែនាំរបស់រដ្ឋបាលរាជធានីភ្នំពេញ និងរដ្ឋបាលខណ្ឌ៧មករា។ ថ្ងៃនេះចរាចរណ៍នៅតាមបណ្តោយផ្លូវ១៨២មានការកកស្ទះបន្តិចបន្តួច តែកម្លាំងប្រចាំការនៅតាមគោលដៅសហការជាមួយកាម្លាំងការិយាល័យសណ្ដាប់ធ្នាប់ខណ្ឌ៧មករា និងកម្លាំងការិយាល័យសណ្ដាប់ធ្នាប់រាជធានីភ្នំពេញ ជួយសម្រួលចរាចរណ៍កុំឲ្យមានការកកស្ទះដើម្បីងាយស្រួលឲ្យប្រជាពលរដ្ឋធ្វើដំណើរ។

  ពាក់ព័ន្ធការងារអនាម័យ-បរិស្ថាន កាលពីល្ងាចថ្ងៃទី១៥ ខែមិនា ឆ្នាំ២០១៩ កម្លាំងសន្តិសុខយាមយប់ធ្វើការចាក់ទឹក ដុសលាង សម្អាតនៅតាមផ្លូវធំខាងក្នុងផ្សារឲ្យបានស្អាតបន្ថែមទៀត។

 ភ្នាក់ងារអនាម័យបានបន្តការបោសសម្អាត ប្រមូល សម្រាម នៅជុំវិញបរិវេណផ្សារជារៀងរាល់ពេលព្រឹកនិងពេលល្ងាច ហើយបានសហការជាមួយក្រុមហ៊ុន ស៊ីនទ្រី ដឹកជញ្ជូនកាកសំណល់ឲ្យបានស្អាតជាប្រចាំ។

   វេលាម៉ោង៨.៤៥នាទីព្រឹក ប្រធានគណៈកម្មការផ្សារសហការជាមួយវិទ្យាស្ថានប៉ាស្ទ័រ និងបសុពេទ្យប្រចាំខណ្ឌ៧មករា ដឹកនាំដោយលោកស្រី គែប ច័ន្ទសោភា ចុះពិនិត្យ មាន់ចំនួន១០ក្បាល ទាចំនួន១០ក្បាល ទឹកលាងមាន់ ទា ដើម្បីរកមើលជម្ងឺមេរោគផ្តាសាយបក្សី H5 . H7 . H9 ៕

 

អត្ថបទដែលជាប់ទាក់ទង