តៃកុងរថយន្តឡិចស៊ីស បុករះ ស្លាប់២នាក់ មានផ្ទុកសារធាតុញៀន និងខឹងគេមិនហៅផឹកស៊ី
ភ្នំពេញ:តៃកុងរថយន្តជាជនបង្កគ្រោះថ្នាក់ចរាចរនៅសង្កាត់បឹងសាឡាងត្រូវ បានបញ្ជូនមកការិយាល័យនគរបាលចរាចរណ៍ផ្លូវគោករាជធានីភ្នំពេញ ហើយបានធ្វើតេស្តទឹកនោម ឃើញថាលទ្ធផលវិជ្ជមាន គឺមានផ្ទុកសារធាតុញៀន។
មន្រ្តីនគរបាលនៃការិយាល័យនគរបាលចរាចរណ៍ផ្លូវគោករាជធានីភ្នំពេញ បានបញ្ជាក់ថា ” ជនបង្កគ្រោះថ្នាក់ចរាចរនៅសង្កាត់បឹងសាឡាង ខណ្ឌទូលគោក ឈ្មោះ ទីម គីមទិចដែលបានបុករះ បណ្តាលអោយមនុស្ស២នាក់ស្លាប់ របួសធ្ងន់១នាក់ និងស្រាល៥នាក់ បានបញ្ជូនមកការិយាល័យនគរបាលចរាចរណ៍ផ្លូវគោករាជធានីភ្នំពេញ នៃស្នងការដ្ឋាននគរបាលរាជធានីភ្នំពេញ ដេីម្បីសាកសួរ និងចាត់ការតាមផ្លូវច្បាប់”។
នៅម៉ោងប្រមាណ១២ថ្ងៃត្រង់ នាថ្ងៃទី២៨មីនានេះ មានរថយន្តម៉ាកឡិចស៊ីសមួយគ្រឿង បានបុករះ នៅក្រោយអធិការខណ្ឌទួលគោក ស្ថិតក្នុងសង្កាត់បឹងសាឡាន សង្កាត់ទួលគោក រាជធានីភ្នំពេញ ដែលបណ្តាលឲ្យមនុស្ស២នាក់ បាត់បង់ជីវិត និងជាច្រើននាក់ បានរងរបួស។
តាមសេចក្ដីរាយការណ៍ បានឲ្យដឹងថា មានករណីគ្រោះថ្នាក់ចរាចរណ៍ រថយន្តឡិចស៊ីស RX300 ពាក់ស្លាកលេខ ភ្នំពេញ 2AN-2395 បុកចូលផ្ទះប្រជាពលរដ្ឋ សង្ស័យមានអ្នកស្លាប់ និងរងរបួសជាច្រើននាក់ ហើយតែកុងឡានត្រូវ បានឃាត់ខ្លួន។
ហេតុការណ៍គ្រោះថ្នាក់ចរាចរណ៍ដ៏រន្ធត់មួយ នេះ គឺមកពីបុរសម្នាក់ ខឹងគេមិនហៅផឹកស៉ី បែរជាបេីករថយន្តបុករះ បណ្តាលឲ្យមានអ្នករងរបួស និង ស្លាប់ ។
ជនបង្កមានឈ្មោះ ទឹម គឹមតិចអាយុ ៣៥ឆ្នាំ មុខរបរ ធ្វេីស្លាធម៌ដូង ស្នាក់នៅផ្ទះលេខ២៥ ផ្លូវលេខ៣២៤ ភូមិ៤ ក្រុម១៣ សង្កាត់បឹងសាឡាង ខណ្ឌទួលគោក រាជធានីភ្នំពេញ។ ចំណែកឯជនរងគ្រោះដែលរងរបួសធ្ងន់មានឈ្មោះ ថា បញ្ញា (របួសធ្ងន់), ឈ្មោះ សំបូរ ដា (របួសធ្ងន់), ឈ្មោះ សំបូរ ទិត្យ (របួសធ្ងន់), ឈ្មោះ យាយ ហាន (របួសធ្ងន់) រីឯអ្នកស្លាប់ទាំង ២នាក់មានឈ្មោះ យាយ យ៉ុម ភេទស្រី ស្លាប់នៅកន្លែង និងម្នាក់ទៀតឈ្មោះ ស៊ុយ សឿន ភេទប្រុស ស្លាប់ពេលបញ្ជូនដល់ពេទ្យ។
តាមប្រភពព័ត៌មានពីបងប្អូនប្រជាពលរដ្ឋ ដែលនៅកន្លែងកេីតហេតុ បានប្រាប់ឲ្យដឹងថា មុនពេលកេីតហេតុ បងប្អូនប្រជាពលរដ្ឋបាននាំគ្នារៀបចំធ្វេីពិធីសែនលោកតារួច ក៏មានកម្មវិធីផឹកស៉ីតិចតួចជារៀងរាល់ឆ្នាំពេលនោះ បងប្អូនប្រជាពលរដ្ឋបានឃេីញជនបង្ក រួចក៏បាននាំគ្នាហៅមកហូបអីជុំគ្នា តែជនបង្កមិនបានមកហូបអីនោះទេ ដោយបានអង្គុយនៅមុខផ្ទះរបស់ខ្លួន។ មួយស្ទុះ ក្រោយមក ជនបង្កបានដេីរចូលទៅក្នុងផ្ទះ ឮសំឡេងឈ្លោះ ប្រកែតគ្នា រួចជនបង្កក៏បានវាយកញ្ចក់ផ្ទះបែក ហេីយក៏ថយរថយន្តខាងលេីចេញមកក្រៅ។
ភ្លាមៗនោះ ស្រាប់តែឃេីញជនបង្ក ក៏បានបេីករថយន្ត ទៅបុករះតែម្តង ដោយនៅខាងមុខនោះ គឺមានបងប្អូនប្រជាពលរដ្ឋដែលកំពុងអង្គុយហូបអីនៅទីនោះ បណ្តាលឲ្យមានមនុស្សជាច្រេីននាក់បានរងរបួសធ្ងន់ ៦នាក់ ក្នុងនោះមាន ២នាក់បានស្លាប់បាត់បង់ជីវិត។ ក្រោយពេលកេីតហេតុ ជនបង្កបានព្យាយាមរត់គេចខ្លួន តែត្រូវបានកម្លាំងសមត្ថកិច្ចចេញមកអន្តរាគមន៍ឃាត់ខ្លូនបានជនបង្ក៕
