កីឡាករគ្រប់គ្នា ពេលត្រឡប់ទៅកាន់ភូមិស្រុកវិញ សូមឱ្យបន្តការពារសន្តិភាព ដើម្បីបន្តការអភិវឌ្ឍ
ភ្នំពេញ៖ លោក វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មាធិការជាតិអូឡាំពិកកម្ពុជា បានប្រកាសផ្ដាំផ្ញើដល់ក្រុមកីឡាករទាំងអស់ ដែលបានចូលរួមក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុកថា នៅពេលត្រឡប់ទៅកាន់ភូមិស្រុកវិញ សូមចូលរួមថែរក្សាការពារសន្តិភាពបន្តទៀត ដើម្បីបន្តការអភិវឌ្ឍក្នុងប្រទេស និងមានឱកាសមកចូលរួមប្រណាំងទូកនៅឆ្នាំក្រោយៗទៀត។
ការថ្លែងបែបនេះរបស់លោក វ៉ាត់ ចំរើន ត្រូវបានធ្វើឡើងនាឱកាសលោកចូលរួមសំណេះសំណាល និងថ្លែងអំណរគុណដល់ក្រុមកីឡាករចំណុះទូកទាំង៣
មកពីស្រុកបារាយណ៍ ខេត្តកំពង់ធំ (ទូកងចំនួន២ និងទូកចែវចំនួន១) ក្នុងនាមតំណាងលោក ថោង ខុន រដ្ឋមន្ត្រីក្រសួងទេសចរណ៍ នារាត្រីថ្ងៃ១២ ខែវិច្ឆិកា។
នាឱកាសនោះ លោក វ៉ាត់ ចំរើន បានថ្លែងថា យើងទាំងអស់គ្នាឃើញភាពរុងរឿងនៅនឹងភ្នែក យើងកំពុងកសាងវប្បធម៌ខ្មែរស្រឡាញ់ខ្មែរ ស្រឡាញ់ជាតិ សាសនា ព្រះមហាក្សត្រ។ ការស្រឡាញ់គ្នា ឱ្យតម្លៃគ្នាទៅវិញទៅមក លើកទឹកចិត្តគ្នាទៅវិញទៅមក គឺជាពេលវេលាដែលយើងកសាងសង្គមយើង ឱ្យរីកចម្រើនទៅថ្ងៃមុខ ដូច្នេះសូមចូលរួមរក្សាសន្តិភាព ដើម្បីបន្តការរីកចម្រើន។
លោកថា ចាញ់និងឈ្នះមិនមែនជាទីបញ្ចប់នៃការប្រឡងនោះទេ វាគ្រាន់ជាការវាស់ស្ទង់នូវសមត្ថភាពកីឡា ហើយគ្មានអ្វីប្រសើរជាងការវាស់ស្ទង់នោះទេ។ ការចូលរួមសំខាន់ជាងការប្រកួតប្រជែង។ ស្មារតីកីឡា គេជួយគាំទ្រទាំងអ្នកចាញ់ និងអ្នកឈ្នះ ដែលគេហៅស្មារតីដែលលេងដោយយុត្តិធម៌ (Fair Play)។
លោក វ៉ាត់ ចំរើន បានបន្ថែមទៀតថា ការខិតខំរបស់ប្រជាពលរដ្ឋ និងកីឡាករគ្រប់គ្នា គឺបានបង្ហាញនូវសុឆន្ទៈនៃការស្រឡាញ់ ការចូលចិត្ត និងបានបង្ហាញពីការខិតខំប្រឹងប្រែងដែរ ហើយអ្វីដែលកើតឡើងក្នុងរយៈពេល៣ថ្ងៃនេះ បានបន្សល់ទុកនូវអនុស្សាវរីយ៍នៃការសាមគ្គីភាព នៃការធ្វើការរួមគ្នា នៃការចេះពីរបៀបធ្វើការជាក្រុម (Team Work Spirit)។
លោកបានដាស់តឿនដែរថា គូប្រកួតណាក៏មិនចង់ចាញ់ដែរ តែក៏មិនត្រូវលោភលន់ចង់ឈ្នះដោយអសីលធម៌ដែរ ដែលនាំឱ្យបាត់សេចក្ដីថ្លៃថ្នូរ និងបរិយាកាសល្អក្នុងព្រះរាជពិធីបុណ្យ៕