សម្តេចតេជោ បញ្ជាឲ្យស្រាវជ្រាវករណីធ្វើទារុណកម្ម ប្រជាពលរដ្ឋតវ៉ាដីធ្លី រហូតដល់ស្លាប់ ឯកងរាជអាវុធហត្ថលើផ្ទៃប្រទេស បានចេញសេចក្តីសម្រេច បង្កើតគណៈកម្មការចំពោះកិច្ចធ្វើអធិការកិច្ច
ភ្នំពេញៈ សម្តេចនាយករដ្ឋមន្ត្រី ហ៊ុន សែន បានបញ្ជាឲ្យនាយឧត្តមសេនីយ៍ សៅ សុខា មេប៉េអឹមលើផ្ទៃប្រទេស និងគណៈកម្មាធិការសិទ្ធិមនុស្សកម្ពុជា ស្រាវជ្រាវករណីប្រជាពលរដ្ឋតវ៉ារឿងជម្លោះដីធ្លី នៅខេត្តបន្ទាយមានជ័យ ត្រូវបានគេធ្វើទារុណកម្ម រហូតដល់ស្លាប់។ ដោយសម្តេចបានបញ្ជាឲ្យចាប់អ្នកដែលប្រព្រឹត្តធ្វើទារុណកម្ម លើប្រជាពលរដ្ឋដល់ស្លាប់ យកមកផ្តន្ទាទោស។
ការថ្លែងរបស់សម្តេចតេជោ ហ៊ុន សែន បានធ្វើឡើងនៅក្នុងជំនួបលើកទី៤ ជាមួយអ្នកសារព័ត៌មាននារសៀលថ្ងៃទី១៤ ខែមករា ឆ្នាំ២០២០ នៅកោះពេជ្រ។
ចំណែកកងរាជអាវុធហត្ថលើផ្ទៃប្រទេស បានចេញសេចក្តីសម្រេច បង្កើតគណៈកម្មការចំពោះកិច្ច ធ្វើអធិការកិច្ចនូវបាតុភាព ដែលបានកើតឡើងនៅ បញ្ជាការដ្ឋានកងរាជអាវុធហត្ថខេត្តបន្ទាយមានជ័យ។ ត្រួតពិនិត្យសកម្មភាពការងារ របស់នាយទាហានកងរាជអាវុធហត្ថខេត្តបន្ទាយមានជ័យ ក្នុងការប្រតិបត្តិការតួនាទី ភារកិច្ច។
ក្រុមការងារចំពោះកិច្ច បានទៅដល់ខេត្តបន្ទាយមានជ័យ កាលពីយប់ថ្ងៃទី១៣ ខែមករា ឆ្នាំ២០២០។
សម្តេចតេជោ ហ៊ុន សែន បានបញ្ជាអោយ មានការចាប់ខ្លួនអ្នកដែលធ្វើទារុណកម្ម បណ្តាលអោយពលរដ្ឋម្នាក់ស្លាប់ នៅខេត្តបន្ទាយមានជ័យ ។
សម្តេចតេជោ ហ៊ុន សែន បានមានប្រសាសន៍ធ្ងន់ៗថា ក្នុងរឿងទំនាស់ដីធ្លី គឺ មិនអាចចាប់ខ្លួន ប្រជាពលរដ្ឋបានទេ ។ ករណីនេះ គឺ សមត្ថកិច្ច ត្រូវចាប់ខ្លួនអោយខានតែបាន មិនអាចលើកលែង បានទេ ចំពោះអ្នកធ្វើទារុណកម្ម នេះ ។
សូមបញ្ជាក់ថា អ្នកដែលស្លាប់នេះ មានឈ្មោះ ទុយ ស្រស់ អាយុ៣៤ឆ្នាំ មានទីលំនៅ ក្នុងភូមិជ្រៃ ឃុំ សឹង្ហ ស្រុកអូរជ្រៅ ខេត្តបន្ទាយមានជ័យ ត្រូវបានចាប់ខ្លួននៅក្នុងសកម្មភាពតវ៉ារឿងដីធ្លី នៅមុខសាលាខេត្តបន្ទាយមានជ័យ កាលពីថ្ងៃទី៣១ ខែធ្នូ ឆ្នាំ២០១៩ ថ្មីៗនេះ ។
ក្រុមគ្រួសារនៃសពអះអាងថា ការស្លាប់របស់ឈ្មោះ ទុយ ស្រស់ គឺ ព្រោះតែការធ្វើទារុណកម្មបែកថ្លើម របស់សមត្ថកិច្ចកងរាជអាវុធហត្ថខេត្តបន្ទាយមានជ័យ។ ចំណែកអ្នកដែលនៅរស់បានអោយដឹងថា ពេលសមត្ថកិច្ចអាវុធហត្ថខេត្តចាប់ខ្លួនពួកគាត់ទៅគឺ មន្ត្រីអាវុធហត្ថពិតជាបានប្រើហឹង្សាធ្វើទារុណកម្មលើឈ្មោះ ទុយ ស្រស់ រហូតដល់ស្លាប់មែន ។
ចំណែកសមត្ថកិច្ចកងរាជអាវុធហត្ថខេត្តបន្ទាយមានជ័យ បានបដិសេធការចោទប្រកាន់នេះ ហើយបំភ្លឺថា ជនរងគ្រោះស្លាប់ដោយសារញៀនថ្នាំ ។
សម្តេចតេជោ ហ៊ុន សែន បានបញ្ជាអោយ លោក កែវ រ៉ាមី និង លោកនាយឧត្ដមសេនីយ៍ សៅ សុខា ស្រាវជ្រាវករណីនេះដោយមិនលើកលែងអ្នកប្រើហឹង្សា បណ្ដាលឲ្យពលរដ្ឋស្លាប់នោះទេ ។
