លោកវ៉ាត់ ចំរើន និយាយពីហេដ្ឋារចនាសម្ព័ន្ធ សម្រាប់ស៊ីហ្គេម ឆ្នាំ២០២៣ នៅកម្ពុជា
ភ្នំពេញ៖វ៉ាត់ចំរើនអគ្គលេខាធិការគណៈកម្មាធិការជាតិអូឡាំពិកកម្ពុជា(NOCC)និងអគ្គលេខាធិការគណៈកម្មាធិការជាតិរៀបចំកីឡាស៊ីហ្គេមលើកទី៣២ឆ្នាំ២០២៣(CAMSOC)បានគូសបញ្ជាក់ឲ្យដឹងកាលមេសាថាកាលពីពេលថ្មីនេះ សម្តេចពិជ័យសេនា ទៀ បាញ់ ជាប្រធានគណៈកម្មាធិការជាតិរៀបចំស៊ីហ្គេមឆ្នាំ២០២៣(CAMSOC) ក៏ដូចជាលោកបណ្ឌិត ថោង ខុន អនុប្រធានអចិន្ត្រៃយ៍CAMSOC បានសង្កត់ធ្ងន់លើការរៀបចំហេដ្ឋារចនាសម្ព័ន្ធ ដែលជាតម្រូវការចាំបាច់ត្រៀមស៊ីហ្គេមនោះ ឲ្យបានចប់សព្វគ្រប់នៅដំណាច់ឆ្នាំ២០២០នេះ។
លោកវ៉ាត់ចំរើនបញ្ជាក់ទៀតថាចំពោះការសាងសង់កីឡដ្ឋានធំ(Main Stadium)នៃពហុកីឡដ្ឋានជាតិ
មរតកតេជោ កំពុងដំណើរការសាងសង់តាមធម្មតាមិនមានការផ្អាកនោះទេដោយមានកម្មករខ្មែរ២០០នាក់ និងកម្មករចិន២០០នាក់ដែរ ស្ថិតនៅក្នុងការគ្រប់គ្រងយ៉ាងល្អ មិនអនុញ្ញាតឲ្យចេញចូលនោះទេ។ ពេលនេះ ការសាងសង់កីឡដ្ឋានធំ ដែលជាកន្លែងប្រារព្ធពិធីបើក-បិទនៃស៊ីហ្គេម២០២៣ គឺសម្រេចបានប្រមាណ៨០% និយាយរួម តែសម្រាប់ផ្នែកសំណង់រឹងគឺត្រូវបានធ្វើសម្រេចបាន១០០%ហើយដោយនៅសល់តែការបំពាក់ដំបូល កៅអី កញ្ចក់…និង ការរៀបចំហេដ្ឋារចនាសម្ព័ន្ធមួយចំនួនទៀត ដែលត្រូវបំពាក់នៅខាងក្រោមអគារនៃកីឡដ្ឋាន ដែលមានផ្សារទំនើប សណ្ឋាគារ សាលហ្វឹកហាត់មួយចំនួនទៀត នៅខាងក្រោមនោះដែរ ។
ភាគីចិនបានប្តេជ្ញាថានឹងសាងសង់ឲ្យរួចរាល់ជាស្ថាពរនាថ្ងៃទី៣១ខែធ្នូឆ្នាំ២០២០នេះហើយចាប់ពីឆ្នាំ២០២១តទៅយើងនឹងអាចប្រើប្រាស់នូវពហុកីឡដ្ឋានជាតិមរតកតេជោសម្រាប់ការហ្វឹកហាត់បន្សាំទៅនឹងទីលាន
ទាំងនោះ។លោកអគ្គលេខាធិការCAMSOC មានប្រសាសន៍ថា “ហេដ្ឋារចនាសម្ព័ន្ធកីឡាសម្រាប់ស៊ីហ្គេម យើងមិនព្រួយបារម្ភខ្លាំងទេ ប៉ុន្តែអ្វីដែលជាក្តីបារម្ភខ្លាំងនោះ គឺការកសាងសមត្ថភាពកីឡាករ កីឡាការិនីជម្រើសជាតិកម្ពុជា។
ក្រោមការចង្អុលបង្ហាញរបស់សម្តេចពិជ័យសេនាទៀបាញ់ប្រធានCAMSOCឲ្យប្រតិបត្តិករកីឡាសម្រួចគោលដៅលើផ្នែកបច្ចេកទេសកីឡារបស់អត្តពលិកហើយនៅដើមឆ្នាំ២០២០នេះ ប្រសិនបើគ្មានជំងឺកូវីដ-១៩ កម្ពុជាបានបញ្ជូនអត្តពលិក១១០នាក់គ្រប់ប្រភេទកីឡាទាំងអស់ទៅហ្វឹកហាត់នៅប្រទេសចិនរួចហើយ។ប៉ុន្តែឡូវនេះមានភាពប្រែប្រួលថ្មីៗដែលកម្ពុជាគ្រោងនឹងត្រូវបញ្ជូនអត្តពលិក១១០នាក់ទៅហ្វឹកហាត់នៅប្រទេសចិនដដែលនាខែវិច្ឆិកាឆ្នាំ២០២០ខាងមុខប្រសិនបើ២ឬ៣ខែឆាប់ៗនេះមានលក្ខណៈល្អប្រសើរហើយត្រូវតែអនុវត្តវិធានការសុខាភិបាល១៤ថ្ងៃនៅកម្ពុជា និងបន្ត១៤ថ្ងៃនៅចិនទៀត ” ។
ទោះជាយ៉ាងណាលោកអគ្គលេខាធិការCAMSOCបញ្ជាក់ថា ប្រសិនបើមិនអាចបញ្ជូនក្នុងខែវិច្ឆិកា២០២០ គឺនឹងត្រូវបញ្ជូនទៅនាខែមីនា ឆ្នាំ២០២១ ដើម្បីគោលដៅដណ្តើមនូវមេដាយឲ្យបានច្រើននៅស៊ីហ្គេមលើកទី៣១ ឆ្នាំ២០២១ នៅប្រទេសវៀតណាម ដើម្បីជាសញ្ញាណល្អមួយ ឬជោគជ័យមួយជំហានទៀត ក្នុងដំណើរឆ្ពោះទៅស៊ីហ្គេម ២០២៣ នៅកម្ពុជា ៕
