រថយន្ដបុកម៉ូតូ ស្លាប់ក្មេងស្រីម្នាក់ និងបុរសជាសង្សាររបួសធ្ងន់
ភ្នំពេញ ៖ រថយន្តមិនស្គាល់ម៉ាកមួយគ្រឿង បានបេីកបុកម៉ូតូCPX មួយគ្រឿង បណ្ដាលឲ្យនារីរូបស្រស់ម្នាក់ស្លាប់យ៉ាងអាណោចអាធ័ម៌ និងបុរសម្នាក់ជាសង្សាររងរបួសធ្ងន់ រួចបេីករថយន្តគេចបាត់ភ្លាមៗ ដោយបង្កការភ្ញាក់ផ្អេីលដល់ប្រជាពលរដ្ឋកាលពីវេលាម៉ោង១រំលងអធ្រាត្រ ឈានចូលថ្ងៃទី២៧ ខែមិថុនា ឆ្នាំ២០២០ ស្ថិតនៅតាមបណ្ដោយផ្លូវ១៤៣ កែងផ្លូវ៣១០ ក្នុងសង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ ។
សពនារីជនរងគ្រោះ មានឈ្មោះ គ្រី សុដាឡែន អាយុ១៨ឆ្នាំ រៀនថ្នាក់ទី១២ នៅវិទ្យាល័យទួលទំពូង ស្នាក់នៅក្នុងសង្កាត់បឹងសាឡាង ខណ្ឌទួលគោក និងមានស្រុកកំណើតនៅ ខេត្តបាត់ដំបង ។
បើយោងតាមប្រភពពីកន្លែងកើតហេតុប្រាប់ឲ្យដឹងថា មុនពេលកើតហេតុគេឃេីញម៉ូតូមួយគ្រឿងម៉ាក PCX ពណ៌សពាក់ផ្លាកលេខ ព្រះសីហនុ 1 i -7873 បុរសម្នាក់ និងនារីម្នាក់ បានតាមធ្វេីដំណេីរត្រឡប់មកពីខួបកំណើតមិត្តភត្តិវិញតាមបណ្ដោយផ្លូវ៣១០ ទិសដៅពីកេីតទៅលិច មកដល់ចំណុចកេីតហេតុស្រាប់តែមានរថយន្តមួយគ្រឿងមិនចាំម៉ាក គ្រាន់តែដឹងថាពណ៌ខ្មៅ បានធ្វេីដំណេីរតាមបណ្ដោយផ្លូវ១៤៣ ទិសដៅពីជេីងទៅត្បូង ក្នុងល្បឿនយ៉ាងលឿន ហេីយក៏បុកម៉ូតូចំពីចំហៀងពេញទំហឹង បណ្ដាលឲ្យម៉ូតូអូសជាង៥០ម៉ែត្រ និងធ្វេីឲ្យបុរសម្នាក់ជាអ្នកឌុបរងរបួសធ្ងន់ និងនារីម្នាក់រួមដំណេីរជាមួយគ្នាបានស្លាប់យ៉ាងអាណោចអាធ័ម ។
ក្រោយកេីតហេតុ សមត្ថកិច្ចមូលដ្ឋាននិងជំនាញចរាចរណ៍ខណ្ឌបានចុះមកដល់ ហេីយធ្វេីការវាស់វែងយកម៉ូតូជនរងគ្រោះទៅរក្សាទុក និងធ្វេីកំណត់ហេតុប្រគល់សពឲ្យទៅក្រុមគ្រួសារយកទៅបុណ្យតាមប្រពៃណី៕