កុដិមួយខ្នង នៅវត្តគគី ស្រុកប្រាសាទបាគង ត្រូវភ្លើងឆេះខ្ទេច
សៀមរាប ៖ លោកវរសេនីយ៍ឯក លឹម សម្បត្តិ អធិការនគរបាលស្រុកប្រាសាទបាគង បានដឹកនាំកម្លាំង បញ្ចេញ រថយន្តពន្លត់អគ្គីភ័យ នៃអធិការដ្ឋាននគរបាលស្រុកប្រាសាទបាគង ជួយអន្តរាគមន៍បាញ់ទឹកពន្លត់ ករណីអគ្គិភ័យឆាប់ឆេះ កុដិមួយខ្នង ស្ថិតក្នុងបរិវេណវត្តគគី ក្នុងភូមិស្រិតខាងកើត ឃុំកន្ទ្រាំង ស្រុកប្រាសាទបាគង ខេត្តសៀមរាប។
លោកវរសេនីយ៍ឯក បានឲ្យដឹងថា ករណីអគ្គីភ័យនេះ ទទួលសេចក្តីរាយការណ៍នាវេលាម៉ោង២១និង១៥នាទី ថ្ងៃទី១៤ ខែធ្នូ២០២០ នេះ បណ្តាលឲ្យខូចខាត អស់កុដិចំនួន១ខ្នង ទំហំ៦ម៉ែត្រគុណ៩ម៉ែត្រកម្ពស់៥ម៉ែត្រ ធ្វើអំពីឈើប្រក់ស៊ីប្រូ និងសម្ភារៈដូចជា កន្ទេលខ្នើយចាស់ៗ ស្បង់ជីពរចាស់ៗ ខ្សែភ្លើងទុប្រើប្រាស់ក្នុងវត្ត១ដុំ គ្រែ១ ចានឆ្នាំង
និងសម្ភារៈផ្សេងៗទុកប្រើប្រាស់ក្នុងវត្ត មួយចំនួនទៀតផងដែរ។
ករណីអគ្គីភ័យនេះ យើងបានប្រើប្រាស់ទឹកបាញ់ពន្លត់ អស់ទឹកចំនួន១ឡាន និងដោយមានការចូលរួមជួយពន្លត់ ពីបងប្អូនប្រជាពលរដ្ឋ ប្រជាការពារ រួមទាំងព្រះសង្ឃផងនោះ បានរលត់ទៅវិញនៅម៉ោង២១និង៣០នាទីថ្ងៃដដែល។
ករណីនេះអគ្គីភ័យនេះ តាមការសន្និដ្ឋាន បឋមគឺបណ្តាលមកពីទុស្សេខ្សែភ្លើង តែមិនបណ្តាលឲ្យនរណាម្នាក់ រងគ្រោះថ្នាក់ឡើយ ព្រោះកុដិនេះមានសភាពចាស់ទ្រុឌទ្រោម និងពុំមានព្រះសង្ឃឬមនុស្សស្នាក់នៅឡើយ៕