បុរសម្នាក់ចំណាស់ម្នាក់ ប្រកបរបធាក់ស៊ីក្លូ ដេកស្លាប់មិនដឹងមូលហេតុនៅលើស៊ីក្លូ
ភ្នំពេញ ៖ បុរសម្នាក់ចំណាស់ម្នាក់ប្រកបរបធាក់ស៊ីក្លូ បានដេកស្លាប់មិនដឹងមូលហេតុនៅលើស៊ីក្លូ នៅតាមបណ្ដោយផ្លូវ ព្រះមុនីវង្ស ស្ថិតនៅក្នុងសង្កាត់មនោរម្យ ខណ្ឌ៧មករា រាជធានីភ្នំពេញ ហេតុការណ៍នេះ បានកើតឡើងនៅវេលាម៉ោង ៧ ព្រឹកថ្ងៃទី៣១ ខែធ្នូ ឆ្នាំ២០២០ ។
តាមប្រភពពីសន្ដិសុខនៅកន្លែងកើតហេតុ បានឲ្យដឹងថា រាល់ថ្ងៃគាត់តែងតែឃើញបុរស ចំណាស់ខាងលើផឹកស្រាមិនហូបបាយ រាល់ថ្ងៃធ្វើឲ្យគាត់មានអាការៈខ្សោយសង្ស័យស្លាប់ដោយសារខ្យល់គ ។
សន្ដិសុខ នៅយាមកន្លែងនោះបន្ដទៀតថា បុរសស្លាប់លើស៊ីក្លូខាងលើ មិនមានអ្នកណាស្គាល់អត្ដសញ្ញាណនៅឡើយទេ ដោយគាត់ប្រាប់ថា ស៊ីក្លូរបស់ជនរងគ្រោះ ដែលស្លាប់នោះមានលេខសម្គាល់ ៤១ និង សរសេរពាក្យថា ( សមាគម៍ស៊ីក្លូកម្ពុជា ) លេខទូរស័ព្ទ ០១២ ៤៦៦ ១៤៥ ។
ក្រោយទទួលបានថា មានមនុស្សស្លាប់នៅស៊ីក្លូ កម្លាំងសមត្ថកិច្ចមូលដ្ឋានក៏បានចុះ ទៅដល់កន្លែងកើតហេតុ ហើយរាយការណ៍ទៅជំនាញកោសលវិច័យ ដើម្បីត្រួតពិនិត្យ និងទាក់ទងទៅសមាគម៍ស៊ីក្លូកម្ពុជា ដើម្បីស្វែងរក សាច់ញាតិបន្ដមកទទួលយកសាកសព ទៅធ្វើបុណ្យតាមប្រពៃណីផងដែរ៕
