អភិបាលខណ្ឌដង្កោ នាំយកអំណោយ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ចែកជូនពលរដ្ឋក្រីក្រ៥០គ្រួសាររស់នៅសង្កាត់ជើងឯក
ភ្នំពេញ ៖ លោកស្រី គឹម ញឹប អភិបាលខណ្ឌដង្កោ រួមជាមួយព្រះសង្ឃ មន្ត្រីរាជការ សាលាខណ្ឌ សង្កាត់ បាននាំយកអំណោយកាកបាទក្រហមកម្ពុជា ក្រោមការដឹកនាំដ៏ខ្ពង់ខ្ពស់ពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ទៅចែកជូនដល់ជនចាស់ជរានិងប្រជាពលរដ្ឋទីទ័លក្រប្រមាណ៥០គ្រួសាររស់នៅសង្កាត់ជើងឯក ខណ្ឌដង្កោ ដែលកំពុងប្រឈមនឹងការខ្វះខាតស្បៀងអាហា ក្នុងអំឡុងពេលនៃជំងឺកូវីដ១៩ ។
អំណោយដែលលោកស្រីអភិបាលខណ្ឌចែកជូនពលរដ្ឋក្រីក្រទាំង ៥០គ្រួសារ នាព្រឹកថ្ងៃទី១៩ ខែមករា ឆ្នាំ២០២១ នោះដោយក្នុងមួយគ្រួសារៗទទួលបាន អង្ករ២៥គីឡូក្រាមមី១កេសទឹកស៊ីអ៊ីវ១យួរឆ្នាំបាយចានស្រាក់ កំសៀវទឹក បំពង់ទឹកក្ដៅខ្ទះឆា វែកឆា ឃីត ១កញ្ចប់និងថវិកា២០.០០០រៀល ។
ក្នុងឱកាសនោះ លោកស្រី គឹម ញឹប អភិបាលខណ្ឌដង្កោ បានពាំនាំនូវការសាកសួរសុខទុក្ខពីសំណាក់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនដល់បងប្អូនប្រជាពលរដ្ឋក្រីក្រទាំងអស់ ដែលជានិច្ចកាល សម្តេចទាំងពីរ តែងបានគិតគូរ និងយកចិត្តទុកដាក់ចំពោះបងប្អូនប្រជាពលរដ្ឋទាំងអស់នៅតានមូលដ្ឋាននានា ជាពិសេសចំពោះបងប្អូនក្រីក្រ ជួបការលំបាក ទុរគតជន ជនពិការ អ្នកផ្ទុកមេរោគអេដស៍ ជម្ងឺអេដស៍ ជាពិសេសក្នុងអំឡុងពេល នៃជំងឺ កូវីដ ១៩ នេះជាដើម ហើយសម្តេចទាំងទ្វេរបានផ្តាំផ្ញើដល់អាជ្ញាធរគ្រប់លំដាប់ថ្នាក់ឲ្យគិតគូរពីសុខទុក្ខ និងការលំបាកនានារបស់បងប្អូន ដើម្បីដោះស្រាយឲ្យបានទាន់ពេលវេលា។
លោកស្រីអភិបាល ក៏បានលើកឡើងអំពីការអភិវឌ្ឍន៍រីកចម្រើនឥតឈប់ឈររបស់ប្រទេសជាតិយើង ពីមួយថ្ងៃទៅមួយថ្ងៃ ក្រោមការដឹកនាំប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ដែលសម្តេចបានខិតខំតស៊ូរំដោះប្រទេសពីរបបប្រល័យពូជសាសន៍ អភិវឌ្ឍន៍ជាតិឲ្យបានរីកចម្រើនលើគ្រប់វិស័យ ក្រោមដំបូលសន្តិភាព។
ជាមួយគ្នានេះផងដែរ លោកស្រីអភិបាល ក៏បានផ្តាំផ្ញើឲ្យបងប្អូនទាំងអស់ ពិសេសលោកតា លោកយាយ សូមយកចិត្តទុកដាក់ថែរក្សាសុខភាព អនាម័យការរស់នៅជាប្រចាំ ដើម្បីរស់នៅបានយូរអង្វែងមើលការអភិវឌ្ឍន៍រីកចម្រើនរបស់ជាតិយើងបន្តទៀត៕
