សហព័ន្ធកីឡាវាលកូនបាល់កម្ពុជា ដាក់កាលបរិច្ឆេទ រៀបចំការប្រកួតជើងឯកថ្នាក់ជាតិ២០២០
ភ្នំពេញ៖សហព័ន្ធកីឡាវាលកូនបាល់កម្ពុជា បានប្រកាសជូនដំណឹងជាផ្លូវការស្តីពីការប្រកួតកីឡាវាលកូនបាល់កម្ពុជាជ្រើសរើសជើងឯកថ្នាក់ជាតិប្រចាំឆ្នាំ២០២០ដែលគ្រោងនឹងរៀបចំឡើងពីថ្ងៃទី៧ដល់ថ្ងៃទី១០ខែកុម្ភៈឆ្នាំ២០២១នៅទីលានសហព័ន្ធនៃពហុកីឡដ្ឋានជាតិអូឡាំពិក។
លោកជា ពៅ អគ្គលេខាធិការរងសហព័ន្ធកីឡាវាលកូនបាល់កម្ពុជា បានបញ្ជាក់នៅក្នុងសេចក្តីជូនដំណឹងថា នេះជាការប្រកាសជូន
ដំណឹងជូនដល់ប្រធានសមាគម ក្លិបកីឡាវាលកូនបាល់ នៅតាមក្រសួង ស្ថាប័ន រាជធានី-ខេត្ត ដើម្បីបញ្ជូនកីឡាករ-កីឡាការិនីរបស់ខ្លួនចូលរួមប្រកួតប្រជែងមេដាយ នៅក្នុងព្រឹត្តិការណ៍ថ្នាក់ជាតិ ប្រចាំឆ្នាំ២០២០។
វិញ្ញាសាដែលដាក់ឲ្យប្រកួតប្រជែងមានចំនួន៤គឺវិញ្ញាសាវាយឯកត្តជនបុរស១នាក់ទល់១នាក់វិញ្ញាសាវាយឯកត្តជននារី១នាក់ទល់១នាក់ វិញ្ញាសាវាយឯកត្តជនអាយុក្រោម១៨ឆ្នាំ ១នាក់ទល់១នាក់ និងវិញ្ញាសាវាយគូ។
ចំពោះសមាគមក្លិបអាចចុះឈ្មោះចូលរួមប្រកួតនៅតែបន្តរហូតដល់ថ្ងៃទី៥ខែកុម្ភៈឆ្នាំ២០២១ នៅទីស្នាក់ការសហព័ន្ធកីឡាវាលកូនបាល់កម្ពុជាក្នុងពហុកីឡដ្ឋានជាតិ ខណៈការប្រជុំចាប់ឆ្នោតចាប់ពូលប្រកួតគ្រោងនឹងធ្វើឡើង នាថ្ងៃទី៦ ខែកុម្ភៈ ឆ្នាំ២០២១ វេលាម៉ោង១០ព្រឹកនៅទីស្នាក់ការសហព័ន្ធ។
សូមបញ្ជាក់ថា ប្រភេទកីឡាវាយកូនបាល់សម្រាប់កម្ពុជាគឺជាប្រភេទកីឡា ដែលមានសក្ដានុពលមួយដែលតែងតែដណ្ដើមបានមេដាយពីព្រឹត្តិការណ៍ស៊ីហ្គេមមិនដែលលស់ពេលឡើយ ៕