សង្ស័យបែកថ្នាំ ជនជាតិបរទេស១រូប ត្រូវបានប្រជាពលរដ្ឋ ឃាត់ទុក ខ្លាចលោតទឹក ពីលើស្ពាន
ភ្នំពេញ៖ នារីជនជាតិបរទេស១រូប សង្ស័យបែកថ្នាំរវើលវវាយ បានដើរពីវត្តភ្នំ រហូតមកដល់ទឹកដី ខណ្ឌច្បារអំពៅ ភូមិច្រាំងបាក់ ដោយខ្លាចនារីរងគ្រោះ លោតទឹក ទើបប្រជាពលរដ្ឋនំាគ្នា ឃាត់ខ្លួនទុក រងចាំសមត្ថកិច្ច យកទៅប៉ុស្តិ៍បូលីស ដើម្បីសួរនាំ ។
ហេតុការណ៍នេះ ដែលបង្កការភ្ញាក់ផ្អើលនេះ កើតឡើងនៅវេលាម៉ោង៣៖៣២នាទី រំលង់អាធ្រាត្រឈានចូល ថ្ងៃទី១៤ ខែសីហា ឆ្នាំ២០១៨ ដោយតាមការបញ្ជាក់ ពីប្រជាពលរដ្ឋដែលបានឃើញហេតុការណ៍ បានឲ្យដឹងថា គេឃើញនារីបរទេសម្នាក់ បានដើរជើងទទេ កណ្ដាលថ្នល់ រហូតទាល់តែរលាត ដាច់បាតជើង ចេញឈាម និងរវើរវាយ តាំងពីម្ដុំវត្តភ្នំ ខណ្ឌដូនពេញ រហូតដល់ស្ពាន អាកាសក្បាលថ្នល់ រួចរត់សំដៅឡើងទៅលើ ស្ពានព្រះមុនីវង្ស (ស្ពានច្បារអំពៅថ្មី) ពេលនោះ ត្រូវប្រជាពលរដ្ឋ នំាគ្នាដេញចាប់ព្រោះខ្លាច នារីរងគ្រោះ លោតទឹកទន្លេ ខណៈដែលនារីបរទេសនេះ នៅតែបន្តស្រែក និងរើបម្រះយ៉ាងខ្លាំង តែប្រជាពលរដ្ឋ មិនព្រមលែងដែល ។
ប្រភពបន្តថា រហូតអស់រយៈពេលច្រើនម៉ោង ដោយនារីរងគ្រោះ ហាក់មានភាពរវើរវាយ និងមានភាពភ័យខ្លាច ណាមួយសមត្ថកិច្ចមូលដ្ឋាន ពុំមានការឈឺឆ្អាលទៀតនោះ ប្រជាពលរដ្ឋ ក៏បានហៅកង់បី ដឹកនារីរងគ្រោះ ទៅនាយកដ្ឋានអន្តោប្រវេសន៍ ដើម្បីរក្សាសុវត្ថិភាព៕