ក្រុមឈ្មួញដឹកសត្វឆ្កែចំនួន៦១ក្បាល ចេញពីសៀមរាបទៅកំពង់ចាម ត្រូវសមត្ថកិច្ចស្ទាក់ចាប់ យកមកការថែទាំសុខភាព និងធ្វើចត្តាឡីស័ក
ខេត្តសៀមរាប ៖ លោក ព្រំ វិច ប្រធានការិយាល័យផលិតកម្ម និងបសុព្យាបាល ដោយទទួលបានការចង្អុលបង្ហាញពីលោក ទា គឹមសុទ្ធ ប្រធានមន្ទីរកសិកម្មរុក្ខាប្រមាញ់ និងនេសាទខេត្តសៀមរាប បានចាត់មន្ត្រីបច្ចេកទេស រួមមានលោក ភី ចាន់ធា លោក ព្រំ ពិសិដ្ឋ និងលោក អ៊ុ សុខេន សហការជាមួយស្នងការនគរបាលខេត្ត (ការិយាល័យចរាចរណ៍ផ្លូវគោក) បានឃាត់ចាប់សត្វសុនខ ចំនួន ៦១ក្បាល ដឹកតាមរថយន្តម៉ាកសាំយ៉ុង ផ្លាកលេខ 2S 2158 ចេញពីខេត្តបន្ទាយមានជ័យ ឆ្ពោះទៅខេត្តកំពង់ចាម។
សត្វសុនខទាំង ៦១ក្បាលនេះ មន្រ្តីជំនាញបសុពេទ្យ យកមករក្សាទុក ធ្វើចត្តាឡីស័ក តាមលក្ខណៈបច្ចេកទេស (ដោយសហការជាមួយអង្គការ Four Paws ) នៅស្ថានីយស្រាវជ្រាវសុខភាពសត្វ និងផលិកម្មសត្វទឹកវិល ។
លោក ព្រំ វិច បានប្រាប់សារព័ត៌មាន នៅព្រឹកថ្ងៃទី២៤ខែកុម្ភៈឆ្នាំ២០២១នេះថា ការឃាត់បានសត្វឆ្កែជិន៦១ក្បាលនេះធ្វើឡើងដោយមន្ត្រីជំនាញញបសុពេទ្យ នៃមន្ទីរកសិកម្មរុក្ខាប្រមាញ់ និងនេសាទខេត្តសៀមរាប ។
លោកបានលើកឡើងថាចំណាត់ការនេះដោយមានកិច្ចសហការជាមួយក្រុមការងារអង្គការ Four Paws បានកំពុងអនុវត្តវិធានការថែទាំសុខភាពសត្វសុនខ ដែលកំពុងធ្វើចត្តាឡីស័កចំនួន៥៨ក្បាលនៅស្ថាននីយស្រាវជ្រាវផលិតកម្ម និងបសុព្យាបាលសត្វទឹកវិល ដោយមន្ត្រីជំនាញបានចាក់ថ្នាំការពារជំងឺឆ្កែឆ្កួត និងការពារជម្ងឺ DHPP ប្រើថ្នាំកំចាត់ចៃ ដោយAlprocide និងថ្នាំទម្លាក់ព្រូនដោយ Canex/Mebendazole ចាក់មីក្រូឆីប/Animal ID ។
ឥឡូវសត្វឆ្កែទាំងនេះបានប្រគល់ទៅឱ្យអង្គការ Four Paws ជាអ្នកគ្រប់គ្រងនិងអនុវត្តន៍និតិវិធីបន្ត។ សត្វឆ្កែទាំងនេះកំពុងតែត្រូវបានថែទាំសុខភាព និងរៀបចំកន្លែងដាក់ពួកវាឱ្យបានត្រឹមត្រូវ បន្ទាប់មកក្រុមការងាររបស់អង្គការនិងស្វែងរកអ្នកដែលចង់ចិញ្ចឹមនិងប្រគល់ពួកវាទៅឱ្យគេចិញ្ចឹម ប៉ុន្តែក្នុងករណីមិនទាន់រកអ្នកចិញ្ចឹមបានអង្គការនិងបន្តមើលថែសត្វឆ្កែទាំងនេះបន្ត ដោយមិនលែងពួកវាឱ្យដើរផ្តេសផ្តាសនោះទេ។
ចំណាត់ការខាងលើក៏មានការគាំទ្រដោយឯកឧត្តម តាន់ ផាន់ណារ៉ា ប្រតិភូរាជរដ្ឋាភិបាលកម្ពុជា ទទួលបន្ទុកអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ អភិបាលខេត្តសៀមរាប ធ្វើឱ្យមន្ទីរកសិម្មខេត្តសៀមរាក៏បានចេញសេចក្តីជូនដំណឹងមួយលេខ២៩មកខ.សជណ ចុះថ្ងៃទី ០៦ ខែកក្កដា ឆ្នាំ២០២០ ស្តីពីការហាមឃាត់ការធ្វើអាជីវកម្មទិញ លក់ ពិឃាដសត្វសុនខ(ឆ្កែ) ផងដែរ
គួររំលឹកថា កាលពីថ្ងៃទី២០ ខែកុម្ភៈ ឆ្នាំ២០២១ វេលាម៉ោង២៣ និង១០នាទី នៅចំណុចភូមិវាល សង្កាត់គោកចក ក្រុងសៀមរាប មានរថយន្តមួយគ្រឿងម៉ាកស៊ាំយ៉ុង ពាក់ស្លាកលេខ:ភ្នំពេញ2S2158 បើកបរដោយឈ្មោះ ផាត សៀងហាក់ ចេញពីខេត្តបន្ទាយមានជ័យ ឆ្ពោះទៅខេត្តកំពង់ចាម បានបង្កគ្រោះថ្នាក់ចរាចរណ៍ ដោយពិនិត្យឃើញក្នុងរថយន្តមានដឹកសត្វសុនខចំនួន៦១ក្បាល ធ្វើអាជីវកម្ម មន្ត្រីនគរបាលចរាចរណ៍ក៏បានបញ្ជូនសត្វឆ្កែទាំងនោះមកមន្ត្រីជំនាញបសុព្យាបាល៕
