រថយន្តម៉ាកស្តារិចដឹកថ្នាំពេទ្យលក់ បានឆេះសន្ធោរសន្ធៅនៅកណ្តាលក្រុងសៀមរាប ដោយសារឆ្លងចរន្តអគ្គិសនី
សៀមរាប ៖ សមត្ថកិច្ចខេត្តសៀមរាប បានឲ្យដឹងថា រថយន្តម៉ាកស្តារិច( Starex) ជាកម្មសិទ្ធិរបស់ក្រុមហ៊ុន Medibest បានឆាបឆេះដោយសារឆ្លងចរន្តអគ្គិសនីនៅមុខតាប្លូមុខរថយន្ត នៅចំណុចផ្សារកណ្ដាល ខាងមុខឱសថស្ថានព្រះវិហារ។
ហេតុការណ៍ឆាបឆេះនេះ បានកើតឡើងនៅវេលាម៉ោង១៤នឹង០០ នាទីថ្ងៃទី១៧ ខែមីនា ឆ្នាំ២០២១ ស្ថិតក្នុងភូមិមណ្ឌល២ សង្កាត់ស្វាយដង្គំ ក្រុងសៀមរាប។
អធិការនគរបាលក្រុងសៀមរាប បានឲ្យដឹងថា មានករណីឆេះឡានមួយគ្រឿងនៅចំណុចមុខឱសថស្ថានព្រះវិហារ ស្ថិតក្នុងក្រុមទី២ ភូមិមណ្ឌល២ សង្កាត់ស្វាយដង្គំ ក្រុង/ខេត្តសៀមរាប ដែលបើកបរបដោយឈ្មោះ ជ្រែង វៃ ភេទប្រុស អាយុ ២៧ឆ្នាំស្រកំណើត ភូមិ ឈ្លីតលើ ឃុំខ្ជាយខាងត្បូង ស្រុកដងទងខេត្តកំពត។
លោកបន្ថែមថា ការខូចខាតអស់រថយន្តចំនួន០១ម៉ាក Starex ពណ៌ទឹកប្រាក់ ផ្លាកលេខ ភ្នំពេញ 2Y-5865 ជាកម្មសិទ្ធ ក្រុមហ៊ុនMedibest នៅភ្នំពេញ ថ្នាំពេទ្យ ប្រហែល២០០០ដុល្លារ រថយន្តខូចខាតទាំងស្រុង ហើយរថយន្តនេះជាកម្មសិទ្ធិ ក្រុមហ៊ុនMedibest នៅភ្នំពេញ។
លោកបញ្ជាក់ថា ករណីនេះ សមត្ថកិច្ចបានប្រើប្រាស់រយន្តពន្លត់អគ្គិភ័យចំនួន០១គ្រឿង។
មូលហេតុ នៃការឆេះនេះបណ្តាលមកពីឆ្លងចរន្តអគ្គិសនីនៅតាប្លូខាងមុខរថយន្ត៕
