វិស័យឯកជននៅកម្ពុជា បានចូលរួមបរិច្ចាគនូវធនធាន ដើម្បីជួយដល់ប្រជាពលរដ្ឋចំនួន៨០៤ គ្រួសារដែលមានជីវភាពខ្វះខាតដោយសារវិបត្តិកូវីដ-១៩ នៅខណ្ឌចំការមន
ភ្នំពេញ ៖ វិស័យឯកជននៅកម្ពុជា បានចូលរួមយ៉ាងសស្រាក់ស្រាំជាមួយ រាជរដ្ឋាភិបាលកម្ពុជា ដោយបានបរិច្ចាកនូវធនធានយ៉ាងច្រើនសន្ឌឹកសន្ធាប់ ដើម្បីរួមចំណែកក្នុងការលើកម្ពស់ជីវភាពរបស់បងប្អូនប្រជាពលរដ្ឋ ដែលគ្រោះដោយសារវិបត្តិកូវីដ-១៩ បានរាតត្បាតនៅក្នុងសហគមន៍ ជាពិសេសក្នុងព្រឹត្តិការណ៍២០កុម្ភះនៅរាជធានីភ្នំពេញ។
ជាក់ស្តែងក្រុមហ៊ុនព្រីនស៍ហូលឌីងគ្រុបបាននាំយកអំណោយជាគ្រឿងឧបភោគបរិភោគយ៉ាងច្រើនសន្ធឹកសន្ធាប់មក ផ្តល់ជូនរដ្ឋបាលខណ្ឌចំការមន ដើម្បីនាំយកទៅជួយដល់ប្រជាពលរដ្ឋ ដែលមានជីវភាពខ្វះខាត ជាង៨០០គ្រួសារ ដែលរងផលប៉ះពាល់ដោយសារវិបត្តិកូវីដ-១៩។
នៅក្នុងពិធីប្រគល់និងទទួលអំណោយសប្បុរសធម៌ នាព្រឹកថ្ងៃទី១៨ ខែមីនា ឆ្នាំ២០២១នេះ លោក ហ្កាប្រ៊ីល តាន់ ប្រធាននាយកដ្ឋានទំនាក់ទំនងកិច្ចការសាធារណៈ និងជាតំណាងក្រុមហ៊ុនព្រីនស៍ ហូលឌីងគ្រុប បានឱ្យដឹងថា នេះគឺជាឱកាសសំខាន់សម្រាប់បង្ហាញការគាំទ្រដល់សហគមន៍ដែលរងគ្រោះដោយសារកូវីដ-១៩ ។
លោកបន្តថា ចាប់តាំងពីការផ្ទុះឡើងនូវព្រឹត្តិការណ៍២០កុម្ភៈមក ខណ្ឌចំការមន បានរងផលប៉ះពាល់យ៉ាងខ្លាំង។ នៅក្នុងគ្រាដ៏លំបាកនេះ មានកើតមាននូវភាពមិនច្បាស់លាស់ ការព្រួយបារម្ភ និងកង្វល់ជាច្រើន។ ក្នុងនាមក្រុមហ៊ុនឯកជន ចាំបាច់ត្រូវទទួលស្គាល់ថា ពួកគេត្រូវបានចាត់ទុកជាសសរស្តម្ភដ៏សំខាន់ សម្រាប់ទ្រទ្រង់ដល់សង្គម និងមានតួនាទីសំខាន់ ដែលត្រូវតែចូលរួមចំណែកក្នុងការថែរក្សាសហគមន៍ដែលយើងកំពុងស្ថិតនៅនិងប្រតិបត្តិការអាជីវកម្ម។
លោកបញ្ជាក់ថា ក្រុមហ៊ុនបានចាត់វិធានកម្មយ៉ាងឆាប់រហ័ស និងសហការជាមួយសាលាខណ្ឌចំការមន ដើម្បីធ្វើការបរិច្ចាគនេះ ដែលរួមមានសម្ភារៈប្រើប្រាស់ប្រចាំថ្ងៃ ដូចជា៖ អង្ករ មី និងសម្ភារផ្សេងទៀត ដល់ប្រជាពលរដ្ឋចំនួន៨០៤គ្រួសារ ដែលត្រូវការជំនួយបន្ទាន់នៅក្នុងសហគមន៍។ ក្រៅពីនេះ យើងក៏បានឧបត្ថម្ភទឹកបរិសុទ្ធ និងភេសជ្ជៈចំនួនរាប់រយកេសទៀតដល់កម្លាំងការពារដែលធ្វើការទាំង២៤ម៉ោង ដោយមិនចេះនឿយហត់នៅតាមគោលដៅ ក្នុងភូមិសាស្ត្រខណ្ឌចំការមន ដើម្បីធានានូវសុខភាពនិងសុវត្ថិភាពរបស់ប្រជាពលរដ្ឋ។ តាមរយៈកិច្ចខិតខំរបស់ថ្នាក់ដឹកនាំគ្រប់ជាន់ថ្នាក់លោកសង្ឃឹមថា ការបរិច្ចាគរបស់នេះ ក្រុមហ៊ុននឹងជួយរាជរដ្ឋាភិបាលកម្ពុជា ដើម្បីឆ្ពោះទៅរកគោលដៅចាក់វ៉ាក់សាំងជូនប្រជាជនយ៉ាងតិច៨០% ឬចំនួនជិត១៣លាននាក់។
ក្នុងឱកាសនោះ លោក ថេង សុថុល អភិបាលខណ្ឌចំការមន បានសម្តែងនូវអំណរគុណ ចំពោះទឹកចិត្តដ៏ថ្លៃថ្លា របស់ក្រុមហ៊ុនដែលបានបរិច្ចាកធនធានជួយដល់ប្រជាពលរដ្ឋ ដែលមានជីវភាពខ្វះខាតនៅក្នុងសហគមន៍ខណ្ឌចំការមននេះ។ លោកចាត់ទុកអំណោយនេះ ពិតជាវិសេសវិសាល និងចំពេលវេលាដែលរដ្ឋបាលខណ្ឌចំការមន កំពុងត្រូវការសម្ភារៈទាំងនេះ ជួយដល់ប្រជាពលរដ្ឋជាង៨០០គ្រួសារនៅក្នុងសហគមន៍ ដែលកំពុងជួបបញ្ហាជីវភាព ដោយសារ កូវីដ~១៩ ។
លោកអភិបាលខណ្ឌសន្យាថា នឹងនាំយកអំណោយទាំងនេះ ទៅជួយដល់ដៃប្រជាពលរដ្ឋដែលមានជីវភាពខ្វះខាត ជាពិសេសប្រជាពលរដ្ឋក្រីក្រ ទាំង៨០៤គ្រួសារក្នុងសហគមន៍ខណ្ឌចំការមន។ បន្ថែមពីនេះ រដ្ឋបាលខណ្ឌចំការមន បានត្រៀមខ្លួនជានិច្ចក្នុងការធ្វើកិច្ចសហប្រតិបត្តិការជាមួយក្រុមហ៊ុនព្រីនស៍ ទៅតាមអនុសារណៈយោគយល់គ្នា ដែលបានចុះហត្ថលេខាដោយលោក ឃួង ស្រេង អភិបាលរាជធានីភ្នំពេញ និងលោកអគ្គនាយកក្រុមហ៊ុនព្រីសន៍ ហូលឌីង គ្រប់កាលពីពេលកន្លងទៅនេះ ឱ្យមានប្រសិទ្ធភាពខ្ពស់៕
