ហៅមិនឈប់ ប៉ូលិសខណ្ឌ៧មករាម្នាក់ យកអាយកូម វាយទៅលើនារីម្នាក់បែកក្បាល ធ្លាក់ពីលើម៉ូតូ
ភ្នំពេញ ÷ សមត្ថកិច្ចនគរបាលម្នាក់ នៃអធិការដ្ឋាននគរបាលខណ្ឌ៧មករា ប្រើប្រាស់អំពើហិង្សាទៅលើនារីម្នាក់ ដែលជិះគេចពីគោលដៅ រឹតបន្តឹងច្បាប់ចរាចរណ៍ ដោយយកអាយកូមវាយចំក្បាល បណ្តាលឲ្យបែករយះ ហូរឈាមដេរ៣ថ្នេរ។
ហេតុការណ៍នេះដែរ បានកើតឡើងនៅវេលាម៉ោងជិត៨យប់ ថ្ងៃទី៨ ខែកញ្ញា ឆ្នាំ២០២១ នៅប៉ុស្តិ៍ត្រួតពិនិត្យបទល្មើសនឹងច្បាប់ចរាចរណ៍ របស់សមត្ថកិច្ចនគរបាល នៃអធិការដ្ឋាននគរបាលខណ្ឌ៧មករា ចំណុចម្ដុំអាងទឹកពហុកីឡដ្ឋានជាតិអូឡាំពិក នៅតាមបណ្ដោយផ្លូវ ២១៥ សង្កាត់វាលវង់ ខណ្ឌ៧មករា រាជធានីភ្នំពេញ ។
បើយោងតាមគណនីហ្វេសប៊ុកឈ្មោះ Mo Nich បានអះអាងថា ប្អូនស្រីខ្លួនបានជិះម៉ូតូមួយគ្រឿង ដែលបុរសម្នាក់ជាអ្នកឌុបត្រូវជាប្អូន ដោយមិនមានពាក់មួកសុវត្ថិភាពនោះទេ ខណៈពេលជិះដល់គោលដៅសមត្ថកិច្ចខណ្ឌ៧មករា ចុះត្រួតពិនិត្យនៅផ្លូវ២១៥ ឃើញដូចនេះ ក៏បុរសជានាក់ឌុបបានជិះម៉ូតូត្រឡប់ក្រោយវិញ ស្រាប់តែភ្លាមនោះដោយមន្ត្រីនគរបាលមួយរូប ពុំស្គាលឈ្មោះពិត ក៏បានយកអាយកូមវាយទៅលើនារីរងគ្រោះចំក្បាលពីក្រោយ បណ្តាលឲ្យបែកក្បាលហូរឈាម និងធ្លាក់នាងពីលើម៉ូតូតែម្តង ។
ប្រភពបន្តពីគណនីហ្វេសប៊ុកឈ្មោះ Mo Nich បានឲ្យដឹងទៀតថា ក្រោយកើតហេតុ កម្លាំងសមត្ថកិច្ច នៃអធិការដ្ឋាននគរបាលខណ្ឌ៧ មិនឲ្យទៅណានោះទេ ដោយរង់ចាំការអនុញ្ញាត ពីមេជាមុនសិន ហើយថែមទាំងនិយាយថា នារីរងគ្រោះ គ្រាន់តែធ្វើសម្តែង តែប៉ុណ្ណោះ ខណៈនារីរងគ្រោះបានបែកក្បាលហូរឈាមស្រោចខ្លួន ។
យ៉ាងណានោះ នៅមិនទាន់មានការបកស្រាយបញ្ជាក់ជុំវិញ ករណីមន្ត្រីនគរបាលម្នាក់ រងការចោទពីនារីម្នាក់ថា បានវាយនាងបែកក្បាល ធ្លាក់ពីលើម៉ូតូ នៅឡើយ ៕