ខ្មាន់កាំភ្លើងម្នាក់ដែលជំរុញដោយការស្អប់ខ្ពើមពូជសាសន៍ បាញ់ប្រហារផ្តាច់ជីវិតជនស្បែកខ្មៅចំនួន៣នាក់ នៅទីក្រុង Jacksonville
វ៉ាស៉ីនតោន៖ អាជ្ញាធរនៅសហរដ្ឋអាមេរិក បានឱ្យដឹងថា កាលពីថ្ងៃសៅរ៍សប្តាហ៍នេះ ខ្មាន់កាំភ្លើងម្នាក់ដែលជំរុញដោយការស្អប់ខ្ពើមពូជសាសន៍ បានធ្វើសកម្មភាពបាញ់ប្រហារផ្តាច់ជីវិតជនស្បែកខ្មៅចំនួន៣នាក់ នៅទីក្រុង Jacksonville នៃរដ្ឋ Florida ហើយក្រោយមកក៏បានបាញ់សម្លាប់ខ្លួនឯង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអាទិត្យ ទី២៧ ខែសីហា ឆ្នាំ២០២៣។
ប៉ូលិសអាមេរិកបាននិយាយថា ជនសង្ស័យខាងលើដែលជាបុរសស្បែកសម្នាក់ ស្ថិតក្នុងវ័យខ្ទង់២០ឆ្នាំ មានពាក់អាវការពារ ហើយប្រដាប់ដោយអាវុធវែងមួយដើមនិងអាវុធខ្លីមួយដើម នៅពេលដែលរូបគេបានបើកការវាយប្រហារ នៅក្នុងម៉ាតលក់សម្ភារៈ General Dollar មួយកន្លែង។ ប៉ូលិសអាមេរិកបានបន្តថា ការបាញ់ប្រហារនោះ មានគោលដៅលើក្រុមមនុស្សជាក់លាក់មួយ គឺក្រុមជនស្បែកខ្មៅ រីឯខាង FBI បាននិយាយថា ពួកគេនឹងបើកការស៉ើបអង្កេតលើករណីនេះ ក្នុងទម្រង់ជាបទឧក្រិដ្ឋស្អប់ខ្ពើមពូជសាសន៍។
គួរបញ្ជាក់ថា ជនរងគ្រោះ៣នាក់ ដែលបានបាត់បង់ជីវិត គឺ២នាក់ជាបុរសនិងម្នាក់ជាស្រ្តី។ ដោយឡែក ហាក់ដូចជាពុំមានអ្នករងរបួសនោះឡើយ។ ករណីខាងលើគឺជាករណីថ្មីចុងក្រោយគេ នៃអំពើហិង្សាដោយកាំភ្លើងក្នុងសប្តាហ៍នេះ នៅសហរដ្ឋអាមេរិក រួមមាននៅទីក្រុង Boston, Chicago និងនៅរដ្ឋ Oklahoma៕
