ឡាននិងម៉ូតូបុកគ្នា របួស៣នាក់ នៅខណ្ឌបឹងកេងកង
ភ្នំពេញ ៖ បុរសម្នាក់រួមដំណើរជាមួយប្រពន្ធនិងកូនតូចម្នាក់ បានបើករថយន្តកូរ៉ូឡាមួយគ្រឿង បត់ឆ្លងផ្លូវមិនប្រ័យត្នត្រូវយុវជន៣នាក់ជិះម៉ូតូមួយគ្រឿងឌុបគ្នាយ៉ាងលឿន និងចាប់ហ្វ្រាំងមិនទាន់ជ្រុលទៅបុកចំហៀងខាងមុខពេញទំហឹងបណ្តាលឲ្យដួលរងរបួសធ្ងន់ទាំង៣នាក់ កាលពីរំលងអធ្រាត្រ ឈានចូលថ្ងៃទី១៩ ខែសីហាឆ្នាំ២០១៩ ស្ថិតនៅលើកំណាត់មហាវិថីម៉ៅសេទុង កែងនិងផ្លូវ២០៥ ក្នុងសង្កាត់ទួលស្វាយព្រៃទី២ ខណ្ឌបឹងកេងកងរាជធានីភ្នំពេញ។
ព័ត៌មានពីកន្លែងកើតហេតុនយាយថា នាមុនពេលកើតហេតុខាងលើ គេឃើញបុរសម្នាក់រួមដំណើរជាមួយប្រពន្ធនិងកូនតូចម្នាក់ បើករថយន្តកូរ៉ូឡា ពណ៌សមួយគ្រឿង គ្មានផ្លាកលេខ បានធ្វើដំណើរតាមបណ្តោយមហាវិថីម៉ៅសេទុង ទិសដៅពីជើងទៅត្បូង មកដល់ចំណុចកើតហេតុខាងលើ ផ្លូវបែកជាបួន បានបត់ឆ្វេងដៃឆ្លងមកផ្លូវ២០៥ ពេលនោះក៏មានម៉ូតូមួយគ្រឿងម៉ាកQBX ពណ៌ខ្មៅ ពាក់ស្លាកលេខភ្នំពេញ1HR-9930 ជិះដោយយុវជន៣នាក់ធ្វើដំណើរបញ្ច្រាសទិសដៅគ្នា ពីត្បូងទៅជើងយ៉ាងលឿនដូចហោះ និងជាន់ហ្វ្រាំងមិនទាន់ជ្រុលទៅបុកចំហៀរថយន្តផ្នែកពីមុខខាងស្តាំពេញទំហឹង បណ្តាលឲ្យដួលបោកនិងថ្នល់រងរបួសធ្ងន់ទាំង៣នាក់ រដូករណែលពេញផ្លូវហើយត្រូវបានរថយន្តសង្គ្រោះបន្ទាន់ក្លីនិក ហុងហាក់ ដឹកយកទៅសង្គ្រោះភ្លាមៗ។
ក្រោយកើតហេតុ សមត្ថកិច្ចមូលដ្ឋានបានចុះមកដល់ ហើយទំនាក់ទងទៅសមត្ថកិច្ចជំនាញឲ្យចុះមកធ្វើការវាស់វែង យករថយន្តនិងម៉ូតូ ទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ រង់ចាំដោះស្រាយ៕