សិស្សប្រុសទំនើង ៤ នាក់ ព្រួតគ្នាវាយសិស្សស្រីម្នាក់ បែកចិញ្ចើមដេរ ៣ ថ្នេរ
បាត់ដំបង៖ សិស្សស្រីម្នាក់បានរងរបួសចិញ្ចេីមដេរអស់ ៣ ថ្នេរ បន្ទាប់ពីសិស្សប្រុសទំនើង ៤ នាក់ ព្រួតគ្នាវាយកាលពីរសៀលថ្ងៃទី ២២ ខែ មករា ឆ្នាំ ២០២០ នៅ សាលាអនុវិទ្យាល័យ កូនភ្នំមិត្តភាព ស្រុក សំពៅលូន ខេត្តបាត់ដំបង ។
លោកឧត្ដសេនីយ៍ត្រី ជេត វ៉ាន់នី ស្នងការរងនគរបាលខេត្តបាត់ដំបង ទទួលបន្ទុកព្រហ្មទណ្ឌ បានប្រាប់ឲ្យ ដឹងនៅរសៀលថ្ងៃទី ២៥ ខែ មករា នេះថា ពិតជាមានករណីនេះមែន ហេីយ សមត្ថកិច្ចរបស់លោកកំពុងតែធ្វើការងារនេះ ដើម្បីរកយុត្តិធម៌អោយក្មេងស្រីរងគ្រោះ ។
គួរបញ្ជាក់ថាមួយរយៈចុងក្រោយនេះ សកម្មភាពក្មេងទំនេីង ហាក់កម្រេីកឡេីងច្រេីន ដែលក្មេងទំនេីងទាំងនោះ មានទាំងស្រី មានទាំងប្រុស បង្ករហឹង្សារជាបន្តបន្ទាប់រហូតបណ្ដាលអោយស្លាប់ក៏មាន ។
សកម្មភាពគួរអោយព្រួយបារម្ភនេះ ស្ថាប័នពាក់ព័ន្ធរួមទាំងអាណាព្យាបាលផងគួររឹតបន្តឹងវិន័យអោយបានខ្លាំងក្លាចំពោះកូនចៅរបស់ខ្លួន ។
លោកផែង វណ្ណៈ បានថ្លែងថា
បន្ទាប់ពីទទួលបានដំណឹងថា ក្មួយស្រីម្នាក់រៀននៅសាលាអនុវិទ្យាល័យ កូនភ្នំមិត្តភាព ស្រុក សំពៅលូន ខេត្តបាត់ដំបង រងរបួសដោយសារតែ សិស្សប្រុសទំនេីង ៤ នាក់ រៀននៅថ្នាក់ទី ៧ A ព្រួតគ្នាវាយកាលពី រសៀលថ្ងៃទី ២២ ខែ មករា ឆ្នាំ ២០២០ វេលាម៉ោង ១:៣០ នាទី នៅមុននេះបន្តិច ខ្ញុំបានទាក់ទងសុំអន្តរាគមន៍ទៅ លោក ឧត្ដមសេនីយ៍ត្រី ជេត វ៉ាន់នី ស្នងការរងនគរបាលខេត្តបាត់ដំបង ទទួលបន្ទុកព្រហ្មទណ្ឌ ដេីម្បីចុះស្រាវជ្រាវករណីនេះ រកយុត្តិធម៌អោយក្មួយស្រីរងគ្រោះ ។ លោកឧត្ដមសេនីយ៍ត្រី ជេត វ៉ាន់នី បានអោយដឹងថា លោកនឹងស្រាវជ្រាវករណីនេះដេីម្បីចាប់ខ្លួនជនដៃដល់មកទទួលខុសត្រូវចំពោះមុខច្បាប់ ។
ក្រុមការងារប្រតិកម្មរហ័សនៃស្នងការដ្ឋាននគរបាលខេត្តបាត់ដំបង បានចេញសេចក្តីបំភ្លឺសូមជម្រាបជូនសាធរណ:ជនពិសេសអ្នកនិយមប្រេីប្រាស់បណ្តាញព័ត៌មានសង្គមជ្រាបថា នារសៀលថ្ងៃទី២៥ ខែ មករាឆ្នាំ២០២០នេះពេលទទួលបានព័ត៌មានពីលោក ផែង វណ្ណ: អំពីករណីហិង្សាលេីសិស្សសាលាអនុវិទ្យាល័យកូនភ្នំមិត្តភាព ស្ថិតក្នុងភូមិស្រឡៅជ្រុំ ឃុំសិរីមានជ័យ ស្រុកសំពៅលូន ខេត្តបាត់ដំបង រួចមក ននិងតាមបទបញ្ជារបស់លោក ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដបង លោកឧត្តមសេនីយ៍ត្រី ជេត វណ្ណនី ស្នងការរងផែនការងារព្រហ្មទណ្ឌ បានដឹកនាំធ្វេីការស្រាវជ្រាវលេីករណីនេះជាបន្ទាន់។
រហូតមកដល់ពេលនេះ សមត្ថកិច្ចនគរបាលបានស្រាវជ្រាវរកឃេីញអំពីអង្គហេតុដែលនាំ ឲ្យកេីតមានករណីហិង្សាខាងលេី និងកំណត់បានអំពីសាវតាជាតិរបស់(អ្នកប្រព្រឹត្តិហិង្សា) ចំពោះយុវតីឈ្មោះ គី លីណា អាយុ១៣ឆ្នាំ សិស្សសាលាអនុវិទ្យាល័យកូនភ្នំមិត្តភាព រួចរាល់ហេីយ នៅពេលបន្ទាប់ទៀតនេះសម្ថកិច្ចនគរបាលនឹងចាត់វិធានការតាមផ្លូវច្បាប់ចំពោះ (អ្នកប្រព្រឹត្តិហិង្សា) ដេីម្បីផ្តល់យុត្តិធម៌ចំពោះជនរងគ្រោះ។
ជាមួយនេះក្រុមការងារប្រតិកម្មរហ័សនៃស្នងការដ្ឋាននរបាលខេត្តបាត់ដំបងសូមគោរពថ្លែងអំណរគុណយ៉ាងជ្រាលជ្រៅបំផុតចំពោះការចូលរួមពី មហាជននៅគ្រប់មជ្ឈដ្ឋានពិសេសអ្នកនិយមប្រេីប្រាស់បណ្តាញព័ត៌មានសង្គម ក្នុងការផ្តល់ព័ត៌មានបានទាន់ពេលវេលាដល់សមត្ថកិច្ចនគរបាល ៕
