សម្តេចប្រធានព្រឹទ្ធសភា អញ្ជើញជួបសំណេះសំណាលជាមួយមន្ត្រីរាជការ នៅ សាលាខណ្ឌកំបូល ដើម្បីផ្ដល់ការលើកទឹក ចិត្ដ ធ្វើការងារល្អជូនពលរដ្ឋនៅមូលដ្ឋាន
ភ្នំពេញ៖ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជាបានអញ្ជើញជួបសំណេះសំណាល សួរសុខទុក្ខមន្ត្រីរាជការនៅសាលាខណ្ឌកំបូល រាជធានីភ្នំពេញ ដើម្បីស្ដាប់របាយការណ៍ និងការផ្ដល់សេវាសាធារណៈជូនប្រជាពលរដ្ឋនៅមូលដ្ឋាន។ ពិធីជួបសំណេះសំណាលនេះ បានធ្វើឡើងកាលពីព្រឹកថ្ងៃអង្គារ៍ ៤កើត ខែមាឃ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៨ ខែមករា ឆ្នាំ២០២០។ នេះបើយោងតាមការផ្សាយរបស់ព្រឹទ្ធសភា។
សម្តេចវិបុលសេនាភក្ដីបានលើកឡើង និងជម្រាបសួរសុខទុក្ខ អំពីស្ថានភាពមុខរបរ ការងារ និងជីវភាពរស់នៅប្រចាំថ្ងៃ របស់បងប្អូនជាមន្ត្រី និងប្រជាពលរដ្ឋនៅមូល ដ្ឋាន។ សម្តេចប្រធានព្រឹទ្ធសភាបានផ្តោតការយកចិត្តទុកដាក់ និងលើកសរសើរចំពោះមន្រ្តី និងអាជ្ញា ធរខណ្ឌដែលកន្លងមកបានប្រឹងប្រែងដោះស្រាយរាល់បញ្ហាលំបាកស្មុកស្មាញនៅក្នុងភូមិសាស្រ្តខណ្ឌដែលទើបបង្កើតឡើងថ្មីនេះ ជាពិសេសលើបញ្ហាផ្តល់សេវាសាធារណៈជូនប្រជាជន និងបញ្ហារក្សាការពារសន្តិសុខ សណ្តាប់ធ្នាប់សង្គម នៅក្នុងមូលដ្ឋានបានល្អ និងប្រកបដោយសុខសុវត្ថិភាព។
សម្តេចវិបុលសេនាភក្តីក៏បានជម្រាបជូនផងដែរអំពីសភាពការណ៍វិវត្តន៍រីកចម្រើនថ្មីៗលើគ្រប់វិស័យរបស់ប្រទេសជាតិក្រោម ការដឹកនាំរបស់សម្តេចតេជោ ហ៊ុន សែន នា យក រដ្ឋមន្រ្តី និងការខិតខំរបស់គ្រប់ថ្នាក់គ្រប់ផ្នែក ទាំងថ្នាក់ជាតិ ថ្នាក់ក្រោមជាតិ និងការចូលរួមចំណែកយ៉ាងសស្រាក់សស្រាំពីផ្នែកឯកជន ពីកម្លាំងមហាសាមគ្គីរបស់ប្រជាពលរដ្ឋយើងនៅគ្រប់មជ្ឈដ្ឋាន រហូតមានលទ្ធផលដូចសព្វថ្ងៃ។ ចំពោះបញ្ហាប្រឈមការខ្វះខាត និងបាតុភាពអសកម្មមួយចំនួន គឺតែងតែនៅមានសេសសល់ដែលទាំងនេះគឺជាប្រធានបទក្តៅ ដែលរាជ រដ្ឋាភិបាល ក្រសួងជំនាញ ស្ថាប័នពាក់ព័ន្ធ និងអាជ្ញាធរគ្រប់ថ្នាក់សុទ្ធតែកំពុងអនុវត្តន៍នូវកំណែទម្រង់ស៊ីជម្រៅលើគ្រប់វិស័យ ដើម្បីដោះស្រាយទប់ស្កាត់លុបបំបាត់ឱ្យស្ថិតនៅក្នុងកម្រិតតិចតួច ហើយដែលមិនប៉ះពាល់ធ្ងន់ធ្ងរដល់ប្រជាជននោះទេ។
សម្តេចវិបុលសេនាភក្ដីបានក្រើនរម្លឹកដល់អាជ្ញាធរខណ្ឌ សង្កាត់ទាំងអស់ បន្តយកចិត្តទុកដាក់ក្នុងការបម្រើសេវាសាធារណៈ ជូនប្រជាជនយើងដោយមិនរើសអើង និងប្រកបដោយតម្លាភាព ហើយឆាប់រហ័ស។ ទន្ទឹមនេះ ត្រូវខិតខំអនុវត្តន៍គោលនយោបាយភូមិ សង្កាត់មានសុវត្ថិភាព ដោយផ្តោតជាចម្បងលើបញ្ហារក្សាការពារសន្តិសុខ សណ្តាប់ធ្នាប់សាធារណៈឱ្យបានរឹងមាំទប់ស្កាត់ លុបបំ បាត់ ដើម្បីកាត់បន្ថយបទល្មើស (ជាពិសេសសកម្មភាពជួញដូរ ប្រើប្រាស់គ្រឿង ញៀន) និងភាពអសកម្មនានាឱ្យនៅតិចតួចបំផុត និងខិតខំដោះស្រាយបញ្ហាប្រឈម ទុក្ខលំបាករបស់ប្រជាជនឱ្យបានកាន់តែច្រើន។ ក្រៅពីនេះ ចំពោះបញ្ហាសុខភាពផ្ទាល់ខ្លួនម្នាក់ៗ ត្រូវប្រយ័ត្នប្រយែង ថែទាំសុខភាពឱ្យបានល្អ ជាពិសេសត្រូវប្រុងប្រយ័ត្នចំពោះហានិភ័យនៃការឆ្លង និងចម្លងជំងឺរលាកសួតប្រភេទថ្មី ដែលកំពុងកើតមានរាប់ពាន់ករណីនៅក្នុងប្រទេសចិន និងបានឆ្លងរាលដាលជាច្រើនករណីទៀតនៅបណ្តាប្រទេសជាច្រើនទៀត។
សម្ដេចវិបុលសេនាភក្ដីក៏បានណែនាំដល់អាជ្ញាធរគ្រប់ថ្នាក់ចាប់អារម្មណ៍តាមដាននូវសេចក្តីប្រកាសព័ត៌មាន សេចក្តីណែនាំថ្មីៗ សារអប់រំសុខភាពសំខាន់ៗរបស់ក្រសួងសុខាភិបាលសម្រាប់កិច្ចការពារសុខភាពពីការឆ្លងជំងឺនេះ ហើយបន្តផ្សព្វផ្សាយ អប់រំ ណែនាំឱ្យបានទូលំទូលាយ និងឆាប់រហ័សដល់គ្រប់មជ្ឈដ្ឋានប្រជាជនយើងនៅក្នុងមូលដ្ឋាន៕. ដោយ៖ សំរិត
