ថ្ងៃនេះ គណៈកម្មាធិការព្រំដែនកម្ពុជា-ថៃ បានជួបប្រជុំគ្នាដើម្បីជួយដោះស្រាយដំណើរការសេដ្ឋកិច្ចក្នុងតំបន់
បាត់ដំបង៖ គណៈកម្មាធិការព្រំដែនកម្ពុជា-ថៃ នាថ្ងៃទី១៧ ខែធ្នូ ឆ្នាំ២០២០ នេះបានធ្វើការជួបប្រជុំគ្នានៅច្រកទ្វារព្រំដែនខៅឌិន-ភ្នំដី ស្រុកខ្លងហាត ខេត្តស្រះកែវព្រះរាជាណាចក្រថៃ ទល់នឹងស្រុកសំពៅលូនខេត្តបាត់ដំបង ព្រះរាជាណាចក្រកម្ពុជា។
កិច្ចប្រជុំពិភាក្សាការងារពិគ្រោះយោបល់ទៅលើការបន្ធូរបន្ថយច្បាប់ស្ដីពីការគ្រប់គ្រងស្ថានការក្នុងគ្រាអាសន្នដើម្បីជួយដោះស្រាយដំណើរការសេដ្ឋកិច្ចក្នុងតំបន់ដែលមានរបៀបវារ:ដូចខាងក្រោមនេះ ។ទី១,ឲ្យពលករកម្ពុជាចូលទៅធ្វើការក្នុងវិស័យកសិកម្មក្នុងព្រះរាជាណាចក្រថៃ។ទី២,ឲ្យអាជីវករកម្ពុជា ចូលទៅប្រកប អាជីវកម្មក្នុងផ្សាររោងក្លឿស្រុកអារញ្ញប្រាថេត ខេត្តស្រះកែវព្រះរាជាណាចក្រថៃ ។ទី៣, បើកប្រើប្រាស់ច្រកទ្វារព្រំដែនអន្តរជាតិស្ទឹងបត់-បានណងអៀន បណ្ដោះអាសន្នជាច្រកដឹកទំនិញដើម្បីកាត់ បន្ថយការកកស្ទះនៅច្រកព្រំដែនអន្តរជាតិប៉ោយប៉ែត ខ្លងឡឹក ។
ក្នុងកិច្ចប្រជុំនេះមានការចូលរួមពីសំណាក់លោកអភិបាលខេត្តបន្ទាយមានជ័យ លោកអភិបាលខេត្តបាត់ដំបង លោកឧត្តមសេនីយ៍ទោច័ន្ទ រដ្ឋា មេបញ្ជាការរង យោធភូមិភាគទី៥ ទទួលបន្ទុកការងារព្រំដែន ព្រមទាំងក្រុមការងារទំនាក់ទំនងព្រំដែនទាំងអស់។ ភាគីថៃ ដឹកនាំដោយអភិបាលខេត្តស្រះកែវ មេបញ្ជាការកងការពារកម្លាំងបូព៌ា នាយសេនាធិការរងសន្តិសុខផ្ទៃក្នុងខេត្តស្រះកែវ តំណាងក្រសួងមហាផ្ទៃ កុងស៊ុល ព្រមទាំងមន្ត្រីជំនាញពាក់ព័ន្ធការងារព្រំដែន ។ លទ្ធផលប្រជុំបានឯកភាពសម្រេចលើគោល ការណ៍មួយចំនួនដូចជា។ ទី១,ឲ្យពលរដ្ឋកម្ពុជាចូលទៅធ្វើការក្នុងវិស័យកសិកម្មក្នុងប្រទេសថៃទៅព្រឹកមក ល្ងាចតែត្រូវអនុវត្តវិធានការទប់ស្កាត់ការរីករាលដាល នៃកូវិដ-១៩ បញ្ហានេះសម្រេចលើភាគីទាំងសងខាងត្រូវពិចារណាវិធានការសុខាភិបាលជាកត្តាចាំបាច់។ទី២,ឲ្យអាជីវករខ្មែរចូលទៅប្រកបអាជីវកម្មក្នុងផ្សាររោងក្លឿស្រុកអារញ្ញជាធម្មតាវិញ តែតម្រូវឲ្យធ្វើចត្តាឡីស័ករយ:ពេល ១៤ថ្ងៃ ហើយអាចរស់នៅទីនោះរយៈពេល២-៣ខែ ។ ទី៣,បើកឲ្យប្រើប្រាស់ច្រកទ្វារព្រំដែនអន្តរជាតិស្ទឹងបត់-បានណងអៀម បណ្ដោះអាសន្នជាច្រកដឹកទំនិញដើម្បីកាត់បន្ថយការកកស្ទះនៅតាមច្រកព្រំដែនអន្តរជាតិប៉ោយប៉ែត ។
ចំពោះបញ្ហាដែលនៅសល់ភាគីទាំងពីរ ក៏បានឯក ភាពគ្នាដោះស្រាយបន្តទៀតនៅក្នុងកិច្ចប្រជុំនារសៀលថ្ងៃនេះភាគីទាំងពីរ កម្ពុជា-ថៃ បានឯកភាពគ្នា និងធ្វើរបាយការណ៍រួមគ្នាមួយ ដើម្បីសម្រេចរាល់ការពិភាក្សា និងដំណោះស្រាយនៅក្នុងពិធីប្រជុំក្នុងថ្ងៃនេះ ដើម្បីរកដំណោះស្រាយដែល ប្រឈមនានា តាមកាលៈទេសៈ ជាក់ស្ដែង ៕. សំរិត
