កម្លាំងនគរបាលស្រុកតាលោសែនជ័យ បង្ក្រាបសង្វៀនជល់មាន ឃាត់ខ្លួនអ្នកលេងចំនួន៥នាក់
ពោធិ៍សាត់ ៖ សមត្ថកិច្ចនៃអធិការដ្ឋាននគរបាលស្រុកតាលោសែនជ័យសហការជាមួយរដ្ឋបាលប៉ុស្តិ៍នគរបាលមូលដ្ឋានបានចុះបង្ក្រាបករណីល្បែងស៊ីសង(ជល់មាន់) ១ករណី ឃាត់ខ្លួនបានមនុស្សចំនួន០៥នាក់ រួមទាំងវត្ថុតាងនៅនឹងកន្លែងមួយចំនួន ។ ការចុះបង្ក្រាបនេះគឺធ្វើឡើងកាលពីវេលាម៉ោង១៥និង៤៦នាទីនារសៀលថ្ងៃចន្ទ ៥រោច ខែមាឃ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី២១ ខែកុម្ភ: ឆ្នាំ២០២២ នៅចំណុចច្រាបអញ្ជ័យ ស្ថិតក្នុងភូមិតាំងគោក ឃុំតាលោ ស្រុកតាលោសែនជ័យ ខេត្តពោធិ៍សាត់ ។
លោក វរសេនីយ៍ទោ អ៊ុល ហៃ អធិការដ្ឋាននគរបាលស្រុកតាលោសែនជ័យ បានឲ្យដឹងថា ដោយទទួលបានព័ត៌មានពីភ្នាក់ងារ លោកបានដឹកនាំកម្លាំងអធិការដ្ឋាននិងកម្លាំងប៉ុស្តិ៍នគរបាលរដ្ធបាលចុះដល់កន្លែងលេងល្បែងស៊ីសងខុសច្បាប់(ជល់មាន់) នៅចំណុចផ្ទះរបស់ឈ្មោះ ភឿន ភេទប្រុស អាយុប្រហែល ៣៥ ឆ្នាំ រស់នៅចំណុចខាងលើ បានរត់គេចខ្លួនបាត់។ លោកអធិការបន្តថា យើងបានធ្វើការឃាត់ខ្លួន អ្នកលេងជល់មាន់បានចំនួន ០៥ នាក់ នៅនឹងកន្លែង រួមនឹងដកហូតវត្ថុតាងមួយចំនួន ។
ចំពោះសង្វៀនជល់មាន់ សមត្ថកិច្ចបានធ្វើការដុតកម្ទេចចោល នៅនឹងកន្លែង រីឯ អ្នកលេងចំនួន០៥នាក់ និងវត្ថុតាំងខាងលើ សមត្ថកិច្ចបានបញ្ជូនទៅកាន់អធិការដ្ឋានដើម្បីធ្វើការសួរនាំបន្ត ។
ក្រោយមកសមត្ថកិច្ច បានស្នើសុំគោលការណ៍ទៅឯកឧត្តម កូយ កាន់យ៉ា ព្រះរាជអាជ្ញាអមសាលាដំបូងខេត្តពោធិ៍សាត់ នាថ្ងៃទី២១.០២.២០២២ វេលាម៉ោង ១៨ និង១០នាទី បានបញ្ជាឲ្យសមត្ថកិច្ច ធ្វើការឃាត់ខ្លួនអ្នកលេងចំនួន ០៥នាក់ខាងលើជាបណ្ដោះអាសន្ន និងដើម្បីធ្វើការស្រាវជ្រាវនិងសួរនាំបន្ត ៕
