កម្លាំងនគរបាលស្រុកបសេដ្ឋ ចាប់ខ្លួនឃាតករ ពាក់ព័ន្ធករណីឃាតកម្មកាប់សម្លាប់ទាំងពីរនាក់ម្តាយ និងកូនយ៉ាងព្រៃផ្សៃ
កំពង់ស្ពឺ៖ កាលពីថ្ងៃទី២៦ ខែមិថុនា ឆ្នាំ២០២៣ វេលាម៉ោង ០៧និង០០នាទីព្រឹក មានករណីឃាតកម្ម កើតឡើងនៅចំណុចផ្ទះជនរងគ្រោះស្ថិតនៅភូមិត្រពាំងឈូក ឃុំកក់ ស្រុកបសេដ្ឋ ខេត្តកំពង់ស្ពឺ ជនសង្ស័យឈ្មោះ ឡាយ ទ្រី ភេទប្រុស អាយុ៣៣ឆ្នាំ រស់នៅភូមិ-ឃុំកើតហេតុខាងលើ បានធ្វើសកម្មភាព កាប់ទៅលើជនរងគ្រោះ ឈ្មោះ ឈៀវ សុខគឿន ភេទស្រី អាយុ២៤ឆ្នាំ ចំនួន ៧ កាំបិត និងកាប់ទៅលើទារិការអាយុ ៦ខែ ជាកូនស្ត្រីរងគ្រោះខាងលើ បណ្តាលអោយទាំងពីរនាក់ម្តាយ និងកូនស្លាប់ភ្លាមៗ ក្រោយពេលធ្វើសកម្មភាពរួច ជនសង្ស័យបានរត់គេចខ្លួនឡើងទៅលើភ្នំបាត់ ។
លុះដល់ថ្ងៃទី ២៧ ខែមិថុនា ឆ្នាំ២០២៣ ដោយបានការចង្អុលណែនាំពីលោកឧត្ដមសេនីយ៍ទោ សម សាមួន ស្នងការនគរបាលខេត្ដកំពង់ស្ពឺ លោកវរសេនីយ៍ឯក ចន សុភីត អធិការស្រុកបសេដ្ឋ បានដឹកនាំកម្លាំងសហការស្រាវជ្រាវរហូតតាមចាប់ជនល្មើសបាន និងបញ្ជូនមកអធិការដ្ឋានគរបាលស្រុកបសេដ្ឋ ដើម្បីសាកសួរតាមនីតិវិធី ។
យោងតាមការអោយដឹងបន្ថែមពីសមត្ថកិច្ចថាមូលហេតុដំបូងឈានទៅដល់សកម្មភាពកាប់សំលាប់ម្ដាយនិងកូនតូច យ៉ាងសាហាវព្រៃផ្សៃយ៉ាងឃោរឃៅនេះ ដោយសារគំនុំ ក្នុងនោះប្រវត្តិជនសង្ស័យ ជាមនុស្សប្រើប្រាស់ថ្នាំញៀនផងដែរ ៕
