ការកសាងព្រែកជីកហ្វូណនតេជោគឺជាការយកលំនាំផ្លូវពាណិជ្ជកម្មតាមដូនតាជំនាន់មុនធ្វើឲ្យខ្មែរកាន់តែរឹងមាំនិងមានភាពម្ចាស់ការលើគ្រប់វិស័យ, ព្រែកជីកហ្វូណនតេជោមិនជាប់គាំងនោះទេនៅតែបន្តដំណើរការទៅតាមផែនការ

ភ្នំពេញ៖សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា ការសាងសង់ព្រែកជីកហ្វូណនតេជោ គឺជាការឆ្លុះបញ្ចាំងពីការប្តេជ្ញាចិត្តរបស់រាជរដ្ឋាភិបាល ក្នុងការកសាងឱ្យបាននូវបណ្តាញផ្លូវទឹកប្រវត្តិសាស្ត្រ។ ផ្លូវទឹកប្រវត្តិសាស្រ្ត ដែលយកលំនាំផ្លូវពាណិជ្ជកម្ម តាមដូនតាជំនាន់មុន នឹងធ្វើឲ្យខ្មែរកាន់តែរឹងមាំ និងមានភាពម្ចាស់ការលើគ្រប់វិស័យ។ សម្ដេចថ្លែងបែបនេះនៅក្នុងឱកាសដែលសម្ដេច និងលោក វ៉ាង វិនពីន ឯកអគ្គរដ្ឋទូតចិនប្រចាំនៅកម្ពុជា អញ្ជើញជាអធិបតីភាពរួមគ្នាបើកការដ្ឋានសាងសង់ព្រែកជីកហ្វូណនតេជោដំណាក់កាលទី២ នៅព្រឹកថ្ងៃទី១១ ខែមេសា ឆ្នាំ២០២៦។

សម្ដេចនាយករដ្ឋមន្រ្តីនៃកម្ពុជាបានបញ្ជាក់ថា គោលដៅធំនៃគម្រោងនេះគឺ ដើម្បីលើកស្ទួយកិត្តិយស លើកស្ទួយសមត្ថភាពរបស់ជាតិយើង លើកស្ទួយជីវភាពរបស់ប្រជាជនបានរីកចម្រើន និងធ្វើឲ្យកម្ពុជាកាន់តែរឹងមាំ នេះហើយគឺជាគោលដៅនៃការកសាងព្រែកជីកនេះ។ បើតាមសម្ដេចព្រែកជីកហ្វូណនតេជោ មិនមែនគ្រាន់តែបញ្ជាក់ពីការអភិវឌ្ឍនាពេលបច្ចុប្បន្ន និងអនាគតនោះទេ ប៉ុន្តែក៏ជាការបង្ហាញពីពីការយកលំនាំផ្លូវសេដ្ឋកិច្ច ពាណិជ្ជកម្ម តាមដូនតាជំនាន់មុនផងដែរ។

សម្ដេចធិបតី ហ៊ុន ម៉ាណែត បានថ្លែងយ៉ាងដូច្នេះថា៖ «ពិតណាស់ព្រែកជីក មានប្រវត្តិសាស្រ្តពីដើមដែលនៅទីនេះអង្គរបុរី ក៏ជាកន្លែងមជ្ឈមណ្ឌលពាណិជ្ជកម្មពីមុន អញ្ចឹងការកសាងព្រែកជីកនេះក៏ដើរតាមលំនាំ ពីជំនាន់មុន ដែលខាងពាណិជ្ជកម្មរបស់យើង បានប្រទាក់ក្រឡាជាមួយពិភពលោកតាមរយៈផ្លូវទឹកផងដែរ។ដូចនៅអូរកែវ អតីតផែធំ ហើយមានឆ្លងកាត់តាមអង្គរបុរីនេះ អញ្ចឹងការកសាងនេះគឺជាការពង្រីកបន្ថែមយកលំនាំតាមដូនតាយើង បានឃើញសក្កដានុពលនៅទីនេះ ហើយក៏យើងកូនចៅជំនាន់ក្រោយ បានកសាង និងបន្តកសាងតទៅទៀត ទិសដៅយ៉ាងណាគឺធ្វើឲ្យខ្មែរយើងកាន់តែរឹងមាំ ភាពម្ចាស់ការនៅក្នុងការធានានូវជីវភាពរស់នៅ និងសមត្ថភាពរបស់កម្ពុជា នៅក្នុងការធានាម្ចាស់ការលើគ្រប់វិស័យ។ ការផ្ដល់នូវសារៈសំខាន់មិនថាផ្លូវទឹក ផ្លូវគោក ផ្លូវអាកាស ដែលជាគោលដៅមួយ ជាអាទិភាពមួយនៃគោលនយោបាយរបស់រាជរដ្ឋាភិបាលកម្ពុជា ច្រើនអាណត្តិមកនេះ គឺមានចក្ខុវិស័យម្ចាស់លាស់នៅក្នុងការបង្កើន នូវសមត្ថភាព ឯករាជ្យភាព ក៏ដូចជាភាពម្ចាស់ការនៅក្នុងការបង្កើនកម្លាំងសេដ្ឋកិច្ចរបស់ខ្លួន»។ 

ជាការកត់សម្គាល់ គម្រោងព្រែកជីកហ្វូណនតេជោ គឺជាគម្រោងប្រវត្តិសាស្ត្រតភ្ជាប់ផ្លូវទឹករវាងទន្លេមេគង្គ និងសមុទ្រកម្ពុជា ដោយឆ្លងកាត់ខេត្តកណ្តាល តាកែវ កំពត និងកែប ដែលមានប្រវែងជិត ១៨០គីឡូម៉ែត្រ ហើយគ្រោងចំណាយ ១,៧០០លានដុល្លារអាមេរិក ប្រើពេលសាងសង់៤ឆ្នាំ និងបញ្ចប់នៅឆ្នាំ២០២៨ខាងមុខ។ តាមការសិក្សាគម្រោងនេះនឹងកាត់បន្ថយរយៈពេល-ចម្ងាយ និងតម្លៃដឹកជញ្ជូន បង្កើតតំបន់ពាណិជ្ជកម្ម អភិវឌ្ឍផែរណប ពង្រីកតំបន់កសិកម្ម និងបង្កើតការងារបន្ថែម ព្រមទាំងជួយរំដោះជំនន់ទឹកភ្លៀង និងកាត់បន្ថយផលប៉ះពាល់ពីគ្រោះទឹកជំនន់ និងគ្រោះរាំងស្ងួតផងដែរ។

សូមរំលឹកថា គម្រោងព្រែកជីកហ្វូណនតេជោនេះ ត្រូវបានផ្តួចផ្តើមដោយសម្តេចតេជោ ហ៊ុន សែន ហើយបន្តអនុវត្តដោយសម្តេចបវរធិបតី ហ៊ុន ម៉ាណែត ដោយមានទុនវិនិយោគភាគច្រើនជារបស់ខ្មែរ និងមួយផ្នែកទៀតមកពីក្រុមហ៊ុនវិនិយោគចិន CRBC ។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា ព្រែកជីកហ្វូណនតេជោ មិនបានជាប់គាំងនោះទេ គឺនៅតែបន្តដំណើរការទៅតាមផែនការដែលបានគ្រោងទុក ខណៈដែលព្រែកជីកនេះពេលសាងសង់រួចនឹងផ្តល់គុណតម្លៃដ៏ធំធេងសម្រាប់សេដ្ឋកិច្ច ពាណិជ្ជកម្ម និងការលើកកម្ពស់ជីវភាពប្រជាពលរដ្ឋ។

សម្តេចមហាបវរធិបតី ហ៊ុន ម៉ាណែត បានថ្លែងដូចនេះថា «ព្រែកជីកហ្វូណននេះ យើងឃើញធ្វើការសម្ពោធបើកការដ្ឋានកំណាត់ទី១ នៅថ្ងៃទី០៥ ខែសីហា ឆ្នាំ២០២៤ ឥលូវបើកកំណាត់ទី២ ដែលមានអ្នកខ្លះថា គាំហើយគម្រោងព្រែកជីកនេះ កាពិតគឺអត់ទេយើងបានធ្វើការជាប្រចាំ និងការដោះស្រាយជាប្រចាំ, បើសួរថាស្រួលទេ? គឺមិនស្រួលនោះទេ យើងមានបញ្ហាប្រឈម»។

សម្តេចមហាបវរធិបតី ហ៊ុន ម៉ាណែត បានបន្ថែមថា ការកសាងព្រែកជីកហ្វូណនតេជោនេះ បានផ្តល់អត្ថប្រយោជន៍ជាច្រើនដល់ប្រជាពលរដ្ឋ ដោយបានជួយកែរប្រែកន្លែងដែលធ្លាប់ជាដីកប់នៅខាងក្នុងចោលឆ្ងាយពីផ្លូវ ក្លាយជាមុខមួយនៃផ្លូវទឹក និងជាតំបន់ឧស្សាហកម្ម ពេលការសាងសង់ព្រែកជីកហ្វូណនតេជោនេះរួចរាល់, នៅតាមបណ្តោយព្រែកជីកនេះនឹងមានការរៀបចំជាមជ្ឈមណ្ឌលភស្តុភារកម្ម ឧស្សាហកម្ម ប្រព័ន្ធធារាសាស្ត្រជូនប្រជាពលរដ្ឋ ដើម្បីជួយកែរប្រែជីវភាពរបស់ប្រជាពលរដ្ឋឱ្យកាន់តែល្អប្រសើរឡើង។

សម្តេចមហាបវរធិបតី ហ៊ុន ម៉ាណែត បានបន្ថែមថា ការសាងសង់ព្រែកជីកហ្វូណនតេជោនេះ គឺរាជរដ្ឋាភិបាលមានចក្ខុវិស័យច្បាស់លាស់ ដែលមិនមែនត្រឹមតែជាគម្រោងប្រវត្តិសាស្ត្រ និងដើរតាមគន្លងដូនតាយើង ដែលយកភូមិសាស្ត្រព្រែកជីកនេះជាកម្លាំងសេដ្ឋកិច្ចតាមរយៈពាណិជ្ជកម្មនោះទេ ប៉ុន្តែយើងបានធ្វើតាមបច្ចេកវិទ្យាថ្មីដើម្បីអនាគតនៃការឯករាជ្យ និងភាពម្ចាស់ការក្នុងការតភ្ជាប់ផ្ទៃក្នុងប្រទេសគ្រប់មធ្យោបាយ ទាំងផ្លូវគោក និងផ្លូវទឹក។

យោងតាមប្រភពព័ត៌មានពី Fresh AI បានបញ្ជាក់ឱ្យដឹងថា គម្រោងព្រែកជីកហ្វូណនតេជោ គឺជាគម្រោងដឹកជញ្ជូនផ្លូវទឹក តភ្ជាប់រវាងទន្លេ និងសមុទ្រដ៏មានសក្តានុពលមួយរបស់កម្ពុជា។ គម្រោងនេះតភ្ជាប់ពីទន្លេទៅសមុទ្រ មានប្រវែង ១៧២.៦គីឡូម៉ែត្រ ចាប់ផ្តើមពីព្រែកតាកែវ នៃទន្លេមេគង្គ ឆ្លងកាត់តាមព្រែកពោធិ៍ នៃទន្លេបាសាក់ រួចចូលតាមព្រែកតាហ៊ីង នៃទន្លេបាសាក់ និងបន្តរហូតដល់សមុទ្រខេត្តកែប ដោយឆ្លងកាត់ភូមិសាស្រ្តខេត្តចំនួន៤ រួមមាន ខេត្តកណ្តាល ខេត្តតាកែវ ខេត្តកំពត និងខេត្តកែប។

គម្រោងព្រែកជីកនេះនឹងត្រូវសាងសង់ស្ទើរទាំងស្រុងលើតម្រាយខ្សែផ្លូវទឹកធម្មជាតិ និងផ្លូវទឹកបុរាណដែលបានបន្សល់ទុកស្រាប់តាំងពីសម័យអាណាចក្រហ្វូណនមកម្ល៉េះ។ គម្រោងនេះប្រើប្រាស់ទុនវិនិយោគសរុបប្រមាណ ១,៧ពាន់លានដុល្លារអាម៉េរិក។ គម្រោងនេះក៏ជួយក្នុងការបង្កើតតំបន់ពាណិជ្ជកម្ម និងតំបន់សេដ្ឋកិច្ចពិសេស ព្រមទាំងការអភិវឌ្ឍផែរណបថ្មីៗជាច្រើន ក៏ដូចជាការបង្កើនប្រព័ន្ធធារាសាស្ត្រ ការអភិវឌ្ឍកសិកម្ម វារីវប្បកម្ម ទេសចរណ៍ ការជួយរំដោះទឹកជំនន់ក្នុងរដូវវស្សា ការជួយបង្កើនផលត្រីទឹកសាបនៅតាមព្រែក និងការពង្រីកវិស័យអចលនទ្រព្យ ព្រមទាំងការវិនិយោគផ្សេងៗទៀត៕