មន្ទីរសាធារណការខេត្តព្រះវិហារ បន្តអនុវត្តសកម្មភាពការងារកាត់ស្មៅសម្អាតរុក្ខជាតិ ដើម្បីថែរក្សាសោភ័ណភាពតាមដងផ្លូវ , ធ្វើសកម្មភាពជួសជុលផ្លូវខេត្តលេខ ២PVH៧ ក្នុងភូមិសាស្ត្រស្រុកជាំក្សាន្ត
ព្រះវិហារ៖នាថ្ងៃទី ១៥ ខែ ឧសភា ឆ្នាំ២០២៦ ក្រោមការដឹកនាំចង្អុលបង្ហាញដោយលោក សំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ បានឲ្យក្រុមការងារមន្ទីរ ចុះបន្តអនុវត្តការងារកាត់ស្មៅសម្អាតរុក្ខជាតិសងខាងផ្លូវ លើផ្លូវជាតិលេខ62 មានប្រវែងសរុប 155.46គីឡូម៉ែត្រ ចាប់ពីគីឡូម៉ែត្រលេខ82+300 ស្ថិតនៅភូមិអូរត្រលោក ឃុំរមទម ស្រុករវៀង ដល់គីឡូម៉ែត្រលេខ237+760 (ជើងភ្នំប្រាសាទព្រះវិហារ)ស្រុកជាំក្សាន្ត ដើម្បីថែរក្សាសោភ័ណភាពតាមដងផ្លូវ បង្កើនសុវត្ថិភាពចរាចរណ៍ និងធានាបរិស្ថានស្អាតជូនបងប្អូនប្រជាពលរដ្ឋក្នុងការធ្វើដំណើរ។
នាថ្ងៃដដែលនេះដែរក្រុមការងារមន្ទីរសាធារណការ និងដឹកជញ្ជូនខេត្តព្រះវិហារ បានបន្តសកម្មភាពជួសជុលផ្លូវខេត្តលេខ ២PVH៧ ក្នុងភូមិសាស្ត្រស្រុកជាំក្សាន្ត។ ការងារនេះមានគោលដៅបង្កើនល្បឿន និងសុវត្ថិភាពដល់ការធ្វើដំណើររបស់ប្រជាពលរដ្ឋ។
ក្នុងនោះក្រុមការងារបានអនុវត្តការងារ កៀរសម្រួល ថែមដីល្បាយថ្ម និងកិនបង្ហាប់តាមបច្ចេកទេស នៅលើកំណាត់ផ្លូវខេត្តលេខ ២PVH៧ ត្រង់ចន្លោះគីឡូម៉ែត្រ គម ០០+០០០ ដល់ គម ០៧+០០០។ ការជួសជុលនេះជាផ្នែកមួយនៃផែនការថែទាំផ្លូវជាប្រចាំ ដើម្បីធានាថាផ្លូវនៅតែមានគុណភាពល្អ និងអាចប្រើប្រាស់បានយូរអង្វែង៕
